Taro na Dauwiliwili

Na cava e kaya kina Na Vale ni Vakatawa ni 1 Epereli, 2002, tabana e 11, parakaravu e 7, ni nodra papitaiso na Jiu vakabauta vou ena Penitiko 33 S.K. era a vakadinadinataka kina “nira sa yalataki ira vua na Kalou ena vuku i Karisito,” ia e liu e dau vakabauti ni nodra papitaiso na Jiu mai na 33 S.K. ina 36 S.K. a sega ni gadrevi kina e dua na yalayala vaka oya?

A dolava na Kalou o Jiova ena 1513 B.S.K. na sala mera nona matanitu tabu kina na Isireli, ia mera na ‘vakarorogo mada ina domona ra qai vakabauta nona yalayala.’ Era mani sauma: “A ka kecega sa kaya ko Jiova keimami na cakava.”​—Lako Yani 19:​3-8; 24:​1-8.

Ena nodra vakadonuya mera muria na veiyalayalati ni Lawa i Mosese na Isireli, era yalataki ira sara ga kina vua na Kalou. Era sucu gona na itaba Jiu era qai muri mai ina matanitu yalataki oqo. Ia, na nodra papitaiso na Jiu era qai yaco mera imuri i Jisu Karisito me tekivu mai na Penitiko 33 S.K. lako mai, era sega wale ga ni vakaraitaki ira vua na Kalou nira lewe ni matanitu yalataki. Ia, era yalataki ira vua na Kalou o Jiova ena dua na veiwekani vou kei koya ena vuku i Jisu Karisito. E rawa vakacava oqo?

Ni oti ga na kena sovaraki na yalo tabu vei ira e rauta na 120 na tisaipeli ena dua na tabavale e cake mai Jerusalemi ena Penitiko 33 S.K., a tekivu vunau sara na yapositolo o Pita vei ira e lewe levu na Jiu kei ira na tavuki ina lotu Vakajiu era mai raica na ka a yaco tiko. Ni vunau oti vei ira na Jiu e vakaleqai tu na nodra lewaeloma e qai kaya: “O i kemuni yadua mo ni veivutuni ka papitaisotaki e na yaca i Jisu Karisito, me bokoci kina na nomuni i valavala ca.” Nira ciqoma na veivakadreti i Pita, “Era sa mani papitaisotaki ko ira era vakabauta na nona vosa; ka rauta e 3,000 na tamata e vakaikuritaki kina na kedra i wiliwili.”​—Cakacaka 2:​1-​41, VV.

Era a sa lewe tu beka ni matanitu yalataki o ira na Jiu qai papitaiso oqo ena nona veivakadreti o Pita? Era a sa marautaka tiko beka e dua na veiwekani lavotaki kei na Kalou? Sega. E vola na yapositolo o Paula ni ‘a kauta tani sara na Kalou na Lawa ni sa vakota ina kaunirarawa.’ (Kolosa 2:​14, NW) Na mate i Jisu ena 33 S.K. e sa bokoca kina na Kalou o Jiova na veiyalayalati ni Lawa​—o koya sara ga na vu ni nodrau veiwekani lavotaki na Isireli kei na Kalou. Ia oqo sa sega ni ciqoma na Kalou na matanitu a besetaki Luvena. Na “Isireli vakayago” sa sega tale ni rawa ni kaya me matanitu yalataki vua na Kalou.​— 1 Korinica 10:18; Maciu 21:43.

Sa mai oti na veiyalayalati ni Lawa ena 33 S.K., ia a sega ni mai cava e kea na nona vakadonui ira qai kauaitaki ira tiko na Jiu na Kalou.a E kauaitaki ira tiko ga me yacova sara na 36 S.K. ni a vunau o Pita vua e dua na turaga ni Itali e dau rerevaka na Kalou o Konilio kei na nona matavuvale vaka kina vei ira e so tale na kai Matanitu Tani. (Cakacaka 10:​1-​48) Na cava mada e vakadonui ira tiko ga kina me yacova sara na gauna oqori?

E tukuni ena Taniela 9:​27 ni na “vakadeitaka ko koya [na Mesaia] na veiyalayalati kei ira e lewe vuqa ka me dua na kena wiki.” Na veiyalayalati a muri tiko me vitu na yabaki, se “dua na wiki,” mai na gauna a papitaiso kina o Jisu kei na nona tekivu vunau e matanalevu ena 29 S.K. oya na veiyalayalati kei Eparama. E dodonu me kawa sara ga mai vei Eparama o koya e lewe ni veiyalayalati oqori. Na veiyalayalati oya e sega ni solia vua e dua me lai veiwekani lavotaki kina kei Jiova. O ira gona na Jiu era sa mai vakabauta era a papitaiso ni vosa oti o Pita ena Penitiko 33 S.K., dina ga nira dau kauaitaki nira Jiu era na sega ni kaya rawa nira veiwekani lavotaki kei na Kalou ena gauna sa bokoci kina na veiyalayalati ni Lawa. E dodonu mera yalataki ira yadudua sara ga vua na Kalou.

E dua tale na vuna e bibi kina nodra yalataki ira mera papitaiso o ira na Jiu yadua kei ira na tavuki ina lotu Vakajiu ena Penitiko 33 S.K. E uqeti ira na vakarorogo na yapositolo o Pita mera veivutuni ra qai papitaiso ena yaca i Jisu. Ena gadrevi kina mera biuta laivi na sala vakavuravura, mera ciqomi Jisu ni Turaga ka Mesaia, e Bete Levu, o koya sa dabe tiko ena liga imatau ni Kalou mai lomalagi. Mera masuta na yaca i Jiova ena vuku i Karisito Jisu, me na vakaraitaki kina na nodra vakabauta na Karisito ra qai ciqomi koya me nodra iLiuliu. Na nodra veiwekani kei na Kalou kei na vosoti ni nodra ivalavala ca e sa veisau. E dodonu mera ciqoma na ituvatuva vou oqo o ira na Jiu yadua. Ena sala cava? Nodra yalataki ira vua na Kalou ra vakadinadinataka oqori e matanalevu ena nodra tabadromuci e wai ena yaca i Jisu Karisito. Na nodra papitaiso ena wai e ivakadinadina ni nodra yalataki ira vua na Kalou, ra sa mai veiwekani vou kei koya ena vuku i Jisu Karisito.​—Cakacaka 2:​21, 33-​36; 3:​19-​23.

[iVakamacala e ra]