“Dou a Rawata Walega, Mo Dou Solia Walega”
“DOU a rawata walega, mo dou solia walega.” (Maciu 10:8) Oqo na ivakaro i Jisu vei iratou nona yapositolo ena gauna a talai iratou kina me ratou vunautaka na itukutuku vinaka. Eratou muria beka na yapositolo na ivakaro oqo? Io, eratou muria tiko ga ena gauna mada ga sa biuti vuravura kina o Jisu.
Kena ivakaraitaki, o Saimoni o koya a dau vakacuru e liu, ni raica na kaukaua mana levu i Pita kei Joni, e via saumi rau me rau solia vua na kaukaua mana oya. Ia, e qai cudruvi koya o Pita, ni kaya: “Mo drau rusa vata kei na nomu siliva, e na vuku ni ko sa nanuma sa voli rawa nai solisoli ni Kalou e nai lavo.”—Cakacaka 8:18-20.
E vaka tale ga oya na yalo e kune vua na yapositolo o Paula. E rawa vei Paula me vakatautaka vei ira na tacina lotu Vakarisito na veika me bula kina. Ia, e sega ni vaka kina ni a cakacaka ga me qaravi koya. (Cakacaka 18:1-3) Oya na vuna e rawa ni kaya kina ena yalodei ni ‘sega ni saumi’ nona vunautaka na itukutuku vinaka vei ira mai Korinica.—1 Korinica 4:12; 9:18, VV.
Ia, e rarawataki dina ni vuqa vei ira era kaya nira imuri i Karisito, era sega ni lomarawarawa mera “solia walega.” E vuqa na iliuliu ni lotu ni Veivanua Vakarisito era “vakavuvuli me ra vakaivoli [ga] kina.” (Maika 3:11) Era vutuniyau e so na iliuliu ni lotu ena ilavo e kumuni mai vei ira nodra lewenilotu. Ena 1989, e totogitaki e dua na dauvunau e Mereke me 45 na yabaki e valeniveivesu. Na vuna? E dau “vakalaboci ira na lewenilotu ena nona kania e vica vata na milioni na dola ena nona voli vale, motoka, lako vagade bau kina na vakabatabatataki ni nona vale na koli.”—People’s Daily Graphic, 7 Okotova, 1989.
E kaya na Ghanaian Times ni 31 Maji, 1990 mai Ghana, ni a taura e dua na bete ni lotu Katolika na ilavo e kumuni ena dua na soqo ni lotu, qai kaburaka tale vei ira na lewe ni ivavakoso. “Na vuna,” e kaya na niusipepa, “e namaki vei ira na uabula mera solia na noti lelevu.” E sega ni kurabuitaki ni vuqa na lotu era dau uqeti ira na lewena mera gumatuataka na veimauilavo kei na so tale na sala ni rawailavo.
E veibasai sara ga kei ira na iVakadinadina i Jiova nira saga mera muria na ivakaraitaki i Jisu kei ira na nona tisaipeli. Era sega ni saumi na nodra bete. Era italatala kece na iVakadinadina, ra qai vakacolati ena itavi ni kena vunautaki na “iTukutuku Vinaka ni matanitu” vei ira kece na tamata. (Maciu 24:14, VV) E sivia e ononamilioni na iVakadinadina e vuravura raraba era vakaogai ira ena nodra kauta na “wai ni bula” e sega ni saumi vei ira na tamata. (Vakatakila 22:17) Ena sala oqo, o ira mada ga na ‘sega vei ira na ilavo’ e se rawa tiko ga ni yaga vei ira na itukutuku mai na iVolatabu. (Aisea 55:1) Dina ga ni vakailavotaki tiko na cakacaka oqo ena cau, era se sega vakadua ni bau kere ilavo. Nira italatala dina ni Kalou, era sega ni “dauvakatanitaka na vosa ni Kalou,” ia nira vosa “era sa dina sara, me vaka sa mai vua na Kalou.”—2 Korinica 2:17.
Cava era vaka kina oya na iVakadinadina i Jiova, era vukei ira na tani ena nodra vakayagataka ga na nodra iyau? Cava e uqeti ira? Nira soli ka wale, e kena ibalebale beka oya nira na sega ni saumi kina?
Saumi na Bolebole i Setani
Na lotu Vakarisito dina nikua era uqeti ena nodra via vakamarautaki Jiova—sega ni nodra via vutuniyau ga vakataki ira. Ena sala oya e rawa nira sauma lesu na nona veibeitaki o Setani na Tevoro ena vica na senitiuri sa oti. A bolei Jiova o Setani me baleta e dua na tamata yalododonu o Jope ena nona taroga: “Sa sega li ni yaga vei Jope na nona rerevaka na Kalou?” E kaya o Setani na vuna ga e qarava tiko kina na Kalou o Jope baleta ni taqomaki koya tiko na Kalou. E kaya tale o Setani ni na vosavakacacataka na Kalou e matana o Jope ke kau tani kece na nona iyau!—Jope 1:7-11.
Me saumi na bolebole oya, a vakatarai Setani na Kalou me vakatovolei Jope ni kaya: “Sa soli ki ligamu na nona ka kecega.” (Jope 1:12) Cava e qai yaco? E qai vakadinadinataka o Jope ni lasu ga o Setani. Na leqa lelevu cava e sotava o Jope, e yalodina tiko ga. E kaya: “A noqu yalododonu ka’u sa taura matua, ka’u na sega ni biuta.”—Jope 27:5, 6.
O ira na qarava na Kalou dina nikua e tautauvata sara ga kei Jope na nodra rai. E sega ni uqeti ena iyau vakayago na nodra qarava na Kalou.
iSolisoli Wale ni Kalou Nona Yalololoma
Dua tale na vuna era tu vakarau kina na lotu Vakarisito dina mera “solia walega,” oya nira “rawata wale” mai vua na Kalou. E vesuki tu na kawatamata ena ivalavala ca kei na mate ena vuku ni ivalavala ca i Atama. (Roma 5:12) Ia, e solia mai vakayalololoma na Luvena o Jiova me mate vakaisoro—oqo e dua na ka e mosimosi dina vua na Kalou. E sega sara ga ni ganiti ira na kawatamata na isolisoli oqo. Ia, e isolisoli mai vua na Kalou.—Roma 4:4; 5:8; 6:23.
Me vaka e kaya na Roma 3:23, 24, e tukuna o Paula vei ira na lotu Vakarisito lumuti: “Ni sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou: a ra sa vakadonui walega e na nona loloma ni sa volia na bula ko Jisu Karisito.” O ira na nuitaka na bula tawamudu e vuravura era ciqoma tale ga na “[i]solisoli walega” oya. E okati tale ga ena isolisoli oya na itavi dokai ni rawa nira vakadonui mera itokani i Jiova.—Jemesa 2:23; Vakatakila 7:14.
Na isoro tale ga i Karisito e rawa kina vei ira na lotu Vakarisito mera veiqaravi vakaitalatala ni Kalou. E vola na yapositolo o Paula: “Ka’u a lesi kina me’u kenai talatala [ni ka vuni], me vaka nai solisoli ni loloma ni Kalou.” (Efeso 3:4-7) Nodra kacivi mera cakava na cakacaka oqo ena vuku ni isolisoli wale e sega ni ganiti ira e sega tale ga nira rawata vakataki ira, era sega gona kina ni namaka na italatala dina ni Kalou mera na saumi vakayago ena nodra wasea yani na itukutuku talei oqo vei ira na tamata.
Bula Tawamudu—E Ka Beka ni Nanumi Koya Ga?
Kena ibalebale beka oqo ni namaka na Kalou vei ira na lotu Vakarisito mera qaravi koya qai sega na nodra inuinui se na kedra isau? Sega, na yapositolo o Paula e tukuna vei ira era vakabauta vata: “Sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.” (Iperiu 6:10) E sega tale ga ni dau cala na cakacaka i Jiova. (Vakarua 32:4) E dau “saumi ira talega era sa dauvakasaqarai koya” o Jiova (Iperiu 11:6) Ia e sega li ni veivakamuai ina nanumi koya ga na vosa ni yalayala ni bula tawamudu ena Parataisi?—Luke 23:43.
Sega ni vaka kina. Dua na vuna oya na gagadre ni via bula tawamudu ena vuravura parataisi e vu mai vua na Kalou. A solia na isolisoli totoka oqo vei rau na imatai ni veiwatini. (Vakatekivu 1:28; 2:15-17) Gauna rau vakayalia kina o Atama kei Ivi na isolisoli oya vei ira na kawatamata, na Kalou ga e vakavuna me vakalesui tale mai. A yalataka kina na Kalou ena nona Vosa “ni na sereki talega ko vuravura mai na kena vakabobulataki ki na rusa, ka me lalaga tu ka vakaiukuukutaki vata kei ira na luve ni Kalou.” (Roma 8:21) E dodonu vinaka vei ira na lotu Vakarisito nikua me vakataki Mosese ga, mera ‘vakaraica matua na kedra isau.’ (Iperiu 11:26) Ia na isolisoli oqo ni Kalou e sega ni caka ena veivaqumi. E solia ena nona lomani ira dina na qaravi koya. (2 Cesalonaika 2:16, 17) Oqo na ka eda sauma kina, “eda sa lomani koya, e na vuku ni sa taumada na nona loloma vei keda.”—1 Joni 4:19.
iNaki Dodonu ni Qaravi Kalou
E dodonu gona vei ira na lotu Vakarisito nikua mera dikeva vinaka na inaki ni nodra qaravi Kalou. Eda wilika ena Joni 6:10-13, ni vakani ira vakacakamana e sivia na limanaudolu na tamata o Jisu. Ia, e so era kabiti Jisu ena nodra nanumi ira ga. E tukuna vei ira o Jisu: “Dou sa sega ni vakasaqarai au ni dou sa raica na veika-mana, ni dou a kania ga na veibuli madrai, ka sa mamau kina.” (Joni 6:26) Oti tale e rauta ni 30 na yabaki, e so na lotu Vakarisito yalayala era sega ni qaravi Jiova “e na yalo dina.” (Filipai 1:17, VV) O ira na ‘sega ni vinakata na vosa vinaka i Jisu Karisito’ era qara ga na sala mera rawa ka kina ena nodra dau vakasosoqoni vata kei ira na lotu Vakarisito.—1 Timoci 6:3-5.
Nikua, na lotu Vakarisito e qaravi Kalou baleta wale ga nona via bula tawamudu ena Parataisi, e rawa ni veiqaravi tiko ena yalo ni nona nanumi koya ga. Ni toso na gauna sa na rawa ni lai luluqa na nona ka vakayalo. Ni sa dede tiko mai oqo na toso ni ivakarau ca i Setani, ena rawa ni “oca,” ena nona nanuma ni sa vakaberaberataki na icavacava. (Kalatia 6:9) Ena rawa ni cudruvaka tale ga na ka vakayago e sa vakuai koya oti kina. E uqeti keda kina o Jisu: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega.” (Maciu 22:37) O koya ga e nona inaki taumada ni qaravi Kalou na nona lomani koya, ena sega ni yalana na nona veiqaravi. Ena nakita dei me qaravi Jiova me tawamudu! (Maika 4:5) Ena sega ni veivutunitaka na veika e sa vakuai koya mai kina me baleta nona qarava na Kalou. (Iperiu 13:15, 16) E uqeti koya na nona lomana na Kalou me vakaliuca ga kina na veika me baleta na Kalou.—Maciu 6:33.
Nikua, e sivia e ononamilioni na dauveiqaravi dina era ‘cabori ira’ ena veiqaravi vei Jiova. (Same 110:3) O iko beka e dua vei ira? Ke sega, dau vakananuma na veika e vakarautaka mai na Kalou: na kilaka dina; (Joni 17:3) sereki mai na ivakavuvuli ni lotu lasu; (Joni 8:32) na inuinui ni bula tawamudu. (Vakatakila 21:3, 4) E rawa nira vukei iko na iVakadinadina i Jiova mo vulica na sala e rawa kina ni o taukena na ka kece oya mai vua na Kalou—e sega ni saumi.
[Tikina bibi ena tabana e 22]
O ira na lotu Vakarisito dina nikua e uqeti ira ga na nodra gagadre mera vakamarautaki Jiova—sega ni nodra via vutuniyau ga vakataki ira
[iYaloyalo ena tabana e 21]
Na isolisoli wale ni Kalou, na isoro i Jisu, e uqeti ira na lotu vaKarisito mera wasea wale na itukutuku vinaka