Taro na Dauwiliwili
Ni sega nodra ivotavota ni qele na Livai e Isireli makawa, a rawa ga vakacava vua na Livai o Anameli me volitaka e dua na tikiniqele vei tavalena o Jeremaia, me vaka e tukuni ena Jeremaia 32:7?
Me baleti ira na Livai, a kaya o Jiova vei Eroni: “Ko na sega ni vakaivotavota ena nodra vanua, ia ena sega na nomui votavota e na kedra maliwa [na Isireli].” (Tiko Voli mai na Lekutu 18:20) Ia, ena Vanua Yalataki, a soli vei ira na Livai e 48 taucoko na koro kei na vanua ni nodra vakana manumanu. Na koro nei Jeremaia o Anacoci, e dua vei ira na koro a soli vei ira na “luve i Eroni na bete.”—Josua 21:13-19; Tiko Voli mai na Lekutu 35:1-8; 1 Veigauna 6:54, 60.
Ena Vunau ni Soro 25:32-34, e tukuni kina ni solia o Jiova na ivakaro matata me baleta na kena “tara me ra volia tale” na qele era taukena na Livai. Kena irairai ni tu vei ira yadua na vuvale era Livai na dodonu me baleta na qele era taukena, mera vakayagataka, kei na kena mera volitaki. Kena ibalebale ni na okati e ke na volitaki kei na voli tale ni qele.a E levu na sala era tautauvata kina na Livai kei na vo ni yavusa e Isireli ena taukeni kei na vakayagataki ni qele.
E kena irairai ni taukeni ni qele vaka oqo e dewa ga mai ena nodra ivotavota vakavuvale na Livai. Ia na kena “tara me ra voli tale” vaka oqo na qele, e vakatarai ga ena kedra maliwa na Livai. Kena irairai ni qele ga e koto ena loma ni nodra koro e rawa nira volitaka se volia tale, baleta na “vanua sa volita na nodra veikoro” e sega ni dodonu mera volitaka “ni ra sa taukena ka tawa mudu.”—Vunau ni Soro 25:32, 34.
Kena ibalebale na qele a volia tale o Jeremaia mai vei Anameli e rairai kena mataqali e rawa ni volitaki. E rairai koto tale ga ena lomanikoro. E vakadeitaka tale ga o Jiova ni “vanua” e veivosakitaki tiko oqo e nei Anameli qai ‘tara me volia tale’ o Jeremaia. (Jeremaia 32:6, 7) E vakayagataka vakatayaloyalo o Jiova na veivoli oqo me vakadeitaka nona yalayala nira na lesu tale na Isireli mera taukena nodra ivotavota ni vanua ni oti nodra tu vakavesu mai Papiloni.—Jeremaia 32:13-15.
E sega ni dua na kena ivakadinadina ni cala na nona taukena na qele e Anacoci o Anameli. E sega tale ga ni dua na ka e vakaraitaka ni a beca na lawa i Jiova ena nona sureti Jeremaia me volia na qele e Anacoci, se a vakayagataka vakailoa o Jeremaia nona dodonu me volia lesu.—Jeremaia 32:8-15.
[iVakamacala e ra]
a Ena imatai ni senitiuri S.K., a volitaka na nona qele o Panapasa mai na yavusa i Livai, qai solia na kena ivoli mera vukei kina na imuri i Karisito era gadreva na veivuke e Jerusalemi. A rairai tiko na tikiniqele oya e Palesitaina se e Saipurusi. Se oqo e tikiniqele ni ibulubulu sa volia rawa tu o Panapasa ena yasayasa e Jerusalemi.—Cakacaka 4:34-37.