Taro na Dauwiliwili
Na cava e vakatarai kina vei ira na tagane ni Isireli mera vakawatitaki ira na yalewa era kau mai vakaitokinivalu ni vakatabui ena Lawa i Mosese na vakawati kei ira na kaitani?—Vakarua 7:13; 21:10, 11.
A vakatarai ga ena so na gauna. A vakaroti ira na Isireli o Jiova mera vaqeavutaka na nodra koro e vitu na matanitu era tiko e Kenani, mera vakamatei kece tale ga. (Vakarua 20:15-18) Me baleti ira e so tale na matanitu, o ira na uabula e rawa nira vakabulai mera itokinivalu, era yalewa se bera ni taratagane. (Tiko Voli mai na Lekutu 31:17, 18; Vakarua 20:14) E vakatarai vei ira na tagane ni Isireli mera vakawatitaki ira, ia mera cakava mada e liu na yalewa e so na ka.
E vakamacalataki vaka oqo ena iVolatabu na ka me cakava na yalewa: “Me tasia na uluna ko koya, ka civia na nonai taukuku; ka me luvata tani ko koya na nonai sulu ni bobula, ka tiko e na nomuni vale, ka tagicaki tamana kei tinana ka dua dina na vula: ka sa oti, ko na qai kauti koya mo drau veiwatini kaya.”—Vakarua 21:12, 13.
E laurai e ke ni vinakati me tasia na uluna na yalewa bobula e kau mai me watina e dua na Isireli. A dau kena ivakarau ena gauna makawa oya, mera tasia na uludra o ira era lolosi tiko se rarawa. (Aisea 3:24) Me kena ivakaraitaki, ni ratou mate kece na luve i Jope, yali tale ga na ka kece e taukena, e tasia na uluna me ivakatakilakila ni nona lolosi. (Jope 1:20) A vinakati tale ga vua na yalewa bobula me “civia” nona itaukuku, kena inaki beka me rairai ca kina na ligana, ke vakayagataka mada ga na iboroniliga ena rairai ca tiko ga na ligana. (Vakarua 21:12) Cava e tukuni kina “me luvata tani ko koya na nonai sulu ni bobula”? A dau kena ivalavala vei ira na yalewa ni vanua lotu butobuto mera dara nodra isulu totoka duadua nira siqema ni sa na vakavuai na nodra koro. Era cakava oqo mera vakarairaivinakataki ira kina. Ia, ke sa mani kau vakabobula e dua, ena luvata qai biuta vakatikitiki nona isulu rairai vinaka me ivakaraitaki ni nona lolosi.
Na yalewa e kau vakabobula oqori me watina e dua na tagane ni Isireli, ena tagicaki ira tiko na wekana era samuti mate me dua taucoko na vula. Sa ra kawaboko kece na wekana kei na nona veikilai ni sa vaqeavutaki na veikoro kece. Nodra veivakarusai tale ga na mataivalu ni Isireli, sa na sega kina ni vo vua na yalewa e dua na ka e dau vakayagataka ena nona sokalou. Na vula gona ni nona lolosi e gauna vinaka me vakasavasavataki koya kina, me kua tale ni galeleta na lotu a susu mai kina.
Ia, me baleti ira na vo ni yalewa tani e vauci ira na ivakavuvuli oqo: “Mo ni kakua . . . ni veiwatini kei ira; mo ni kakua ni musuka na luvemuni yalewa vua na luvena tagane, se kauta na luvena yalewa me nona na luvemuni tagane.” (Vakarua 7:3) Cava e vakatabuya kina o Jiova na vakawati kei ira na yalewa tani? E kaya na Vakarua 7:4: “Ni ra na vagolea tani na luvemuni me ra kakua ni muri au, ka me ra qarava eso na kalou tani.” Na vakatatabu gona oqo e itataqomaki vei ira na Isireli me kua kina ni vakadukai na nodra lotu savasava. Ia, na yalewa ni Kenani ena ituvaki e vakamacalataki ena Vakarua 21:10-13 ena sega ni veivakaleqai ena tikina oqori. Na vuna, baleta nira sa mate kece na wekana, sa ra vakarusai tale ga na kalou matakau e dau qarava. Sa sega tale ni rawa vua me veitaratara kei ira na dau sokalou lasu. E vakatarai gona kina me vakawatitaki koya e dua na Isireli.