Ra Taroga na iTabagone . . .

Cava Meu Cakava ni Taleitaki Au e Dua na Goneyalewa?

“A vakaraitaka e liu o Susan nona taleitaki au, qai sega sara ga ni dua na kena leqa vei au. Au taleitaka tale ga.”​—James.a

“Ke sega ni dau dina e dua na cauravou ena nona veikilai kei ira na yalewa, ena rawa ni vakavuleqa ga.”​—Roberto.

DUA wale tiko ga na gauna oqo a kaya e dua na goneyalewa ni via tukuna vei iko e dua na ka. O sa dau rairai raici koya tiko ni maliwai ira toka na nona ilala, dau ka ni marau tale ga na talanoa se na gade wale tu ga kei koya. Ia, o kurabui sara ena ka e kaya. Sa tukuna sara ga mai vakadodonu ni vinakata mo drau sa veitau, qai via kila tale ga na lomamu.

Sega ni vakabekataki ni o na kurabui ke o dau nanuma tu ni o ira ga na tagane era dau tekivuna na veivosaki vaka oqori. Dina ni dau yaco oya, ia na nona vakaraitaka mai e liu e dua na goneyalewa na lomana, e sega ni kena ibalebale oya ni beca na ivakavuvuli vakaivolatabu.b Koya gona ni tiko vei iko na rai oqori ena vukea sara vakalevu nomu sauma na ka e kaya.

Ni o sa vakasamataka na ka e kaya, de dua ena tiko vei iko na rai ni o se gone ga, se sega tale ga ni kena gauna mo vakaitau, se ni sega sara ga ni bau vaka oya na nomu rai me baleti koya. De dua o na nanuma ni nomu cala ga, o dau cakava beka e so na ka e lai vaka kina oya na nona rai. Na cava gona mo cakava? Kena imatai mo kauaitaka na loma i goneyalewa.

Kauaitaka na Lomana

Vakasamataka sara vakavinaka na ivakarau ni lomana ena gauna oqori. De dua sa vakatovotovotaka toka ena vica na siga na ka me kaya mo na vinakati koya kina. Sa qai vakasamataka na sala me na tukuna kina lako vata kei na nona matadredredre, ia e lomaleqataka tale de o na vakuakua. E yalodoudou ga qai torovi iko yani me vakaraitaka na lomana.

Cava sara mada e via bolea tu kina na ka dredre oqori na goneyalewa oya? De dua a dau wainidivataki iko voli. Ena yasana adua, de talei vua na nomu itovo vinaka, qai nanuma ni levu era sega ni raica. Na nona vosa gona ena via kamica toka qai kainaka sara ga e so na ka o sega beka ni dau rogoca me tukuni baleti iko e veisiga.

Na veika era tukuni toka mai oqori e sega ni kena inaki me moica na nomu vakatulewa, ia me vukei iko ga mo dau veikauaitaki. E kaya o Julie, e dua na goneyalewa: “Kevaka mada ga e sega ni taleitaki koya o cauravou, e dodonu me vakavinavinaka ga ni bau dua e vinakati koya tu. Me kua ni sa kena isau ga mai na sega, ia me tukuni vakavinaka vei goneyalewa ni duatani nona rai me kua ni yaloca kina.” Kaya mada ke o cakava na ka oqo​—mo “tukuna vua ni duatani nomu rai,” se saga e dua na sala malumu mo tukuna kina vua ni o sega ni taleitaki koya.

Ia, vakacava ke sega ni imatai ni gauna mo vakuakua kina vua? O na rairai nanuma mo sa na vosataki koya sara ga. Saga mo valuta na yalo oqori. E kaya na Vosa Vakaibalebale 12:18: “Sa dua sa vosa me vaka sa suaka e nai seleiwau: ia na yamedra na vuku sa ia na veivakabulai.” Ena kune vakacava vei iko ‘na yame vuku’?

Taumada, o rawa ni vakavinavinakataki koya ni vakaraitaka vei iko na lomana, kei na nona taleitaki iko. Kerea nona veivosoti ke o dau cakava e so na ka e vakavuna nona rai cala. Vakamatatataka vua qai tukuna vakayalovinaka ni o sega ni taleitaki koya me vaka nona taleitaki iko. Kevaka e sega ni taura rawa na ka o tukuna tiko, de vinaka mo vakamatatataka sara vua, ia kua ga ni o cudru se mo tauca na vosa mosimosi. Mo qarauna ni oqori e vauci tiko kina na lomana, ena gadrevi gona na nomu yalovosovoso. Vakasamataka mada ke o a cakava na ka oqori, sega ni vakabekataki ni o na vinakata tale ga me tukuna vakavinaka vei iko ni duatani nona rai, se vakaevei?

Ia, de na tukuna ni o nakita ga nomu vakacalai koya. Ena rairai tukuna e so na nomu ivukivuki e vakavuna me nanuma ni o taleitaki koya tiko. ‘Nanuma nomu solia vei au na senikau?’ ena rairai kaya o goneyalewa, se ‘Vakacava na ka o a tukuna vei au ena nodaru a taubale vata tu ena vula sa oti?’ Ena tikina oqori sa na gadrevi ga mo dikevi iko tale vakavinaka.

Tukuna Dina na Lomamu

O ira na dausoko ni gauna makawa e nodra inaki nira sa raica e dua na vanua oya mera rawa ra qai vakalolomataki ira na lewenivanua, ia e vaka tale ga oqori na nodra rai e so na tagane nikua me baleti ira na yalewa. Era taleitaka mera vakaitau, ia era sega ga ni vinakata mera vakamau. Ni sega ni lomadra taucoko na ka oqori, ra dau wedevi ira na yalewa ena nodra vakaisini ira. O ira sara ga na tagane vaka oqo era dau rawai ira na yalewa ena nodra veidabui. E kaya e dua na qase ni ivavakoso: “So na cauravou e dau ka ni qito vei ira na veiveisau ni yalewa era dau veitau vata. Ia, e sega ni vinaka me vaqitori vaka oqori na lomana e dua na yalewa.” Ena tini beka e vei na itovo tawaveinanumi oqori?

“Me vakataki koya na lialia dina sa veibiuyaka na bukawaqa, kei na gasau, kei na mate, sa vakakina na tamata sa vakaisina na kai nona, a qai kaya, na noqu veiwali ga.” (Vosa Vakaibalebale 26:​18, 19) Ni dua na cauravou e via vakaitau kei na dua na goneyalewa qai tiko vua na rai me marau ga kina, sega ni vakataratutu ni na qai raica ga o goneyalewa na rokana dina. Na nona veidabui e rawa sara ga ni vakamosia na loma i goneyalewa, me vaka ga e tukuni tiko ena ivakaraitaki e tarava.

E dua na cauravou e sa vinakata tiko e dua na goneyalewa me nona itau, ia e sega ga ni lomana me rau na vakamau. Rau dau lai kana ena valenikana vivinaka sara, so tale ga na soqo ni marau erau dau veitomani tu kina. E taleitaka o cauravou na nodrau dau gade vata tiko vaka oya, e taleitaka tale ga o goneyalewa, qai bucina ena nona vakasama o goneyalewa ni via vakamautaki koya. Ia, na gauna e qai kila kina ni a taleitaka wale tu ga o tagane me rau veilasamaki, sa dua na ka na kena mositi koya.

Kevaka mada ga o a sega ni nakita me vakacalai sara na nona vakasama na goneyalewa e sa mai tukuna vei iko na lomana, na cava o rawa ni cakava? Ke o via taqomaki iko, se o soli ulubale, e sa na qai vakamosia ga vakalevu na yalona. Vakasamataka mada na ivakavuvuli vakaivolatabu oqo: “O koya sa ubia na nonai valavala ca ena sega ni tamata yaco: ia ko koya sa vakatusa ka biuta ena lomani.” (Vosa Vakaibalebale 28:13) E bibi gona mo dau dina. Kua ni cakitaka ni o vakavuna nona nanuma cala, mo vosa tale ga vakadodonu. Kevaka o a vaqitora dina na lomana, vakatusa ni o a vakacalai koya dina. Me vu dina mai lomamu na nomu kere veivosoti.

Ia, kua tale ga ni nanuma ni nomu kere veivosoti oya me sa na yala kina. Ena rairai cudruvi iko tu o goneyalewa me dua toka na gauna. O na rairai vakamacalataka vei rau na nona itubutubu na ka o cakava. Ena tiko tale ga e so na ka o na rairai sotava kina. E kaya na Kalatia 6:7: “Na ka kecega sa kaburaka na tamata ena tamusuka talega ko ya.” Ia, ena nomu kere veivosoti o qai saga na veivakameautaki, o sa na vukei koya tiko kina me guilecava na ka a yaco. Na ka tale ga o sotava oqori ena vakavulici iko mo dau ‘tarova na yamemu mai na vosa ni veivakacalai’ ena ka kece o cakava, vakauasivi ni okati kina e dua drau na rawa ni veivinakati.​—Same 34:13.

Vakasama Vinaka ni Bera ni O Vosa

Ia, vakacava ke o via veikilai vinaka kei goneyalewa? Ke vaka oqori na nomu rai, mo nanuma tiko ni veibuku kei na veitaleitaki e sega ni sala duadua ga me kunei kina na marau. Na gagadre era dau vakila na tagane kei na yalewa era sa veibuku tiko e bucini kina na veidinadinati ni rau na vakamau. Ni rau sa vakamau na gagadre sara ga oqori ena vauci rau tiko vakaveiwatini. Ia, ena tarai iko sara mada vakacava nomu sa kila rawa tiko na veika oqori ena gauna oqo?

Ni o vakasamataka tiko beka na goneyalewa oqo, o na rairai taleitaka e so na ka me baleti koya. Sa rairai vakaraitaka na lomana vei iko, o via veikilai tale ga kei koya. Ia, kua ga ni vakariri sara mo drau sa veivosaki, saga mo taqomaki kemudrau me kua ni qai mosi na lomamudrau mai muri.

Yaco na gauna o na via kere ivakasala me baleti koya vei ira e so era matua ra qai kilai koya vinaka. O rawa tale ga ni vakatura vua me lai tarogi ira na kilai iko. Mo drau dui tarogi ira na matua ena veika era nanuma me baleta na nomudrau dui malumalumu kei na veika o drau vinaka kina. Rawa sara tale ga ni drau taroga na nodra nanuma na qase ni ivavakoso. E vinaka mo kila rawa ni o koya e sa taleitaki iko tiko e vinaka na kena itukutuku ena loma ni ivavakoso lotu Vakarisito.

Ia, o na rairai kaya, ‘Cava na nodra bisinisi na tani ena noqu bula?’ Na kena dina oqo, e ka vakayalomatua mo kila na nodra rai na tani ena ka mada ga e vauca na nomu bula me vaka na nomu sa taleitaka tiko e dua. Oqori tale ga e yavu vakaivolatabu, e kaya na Vosa Vakaibalebale 15:22: “Ni ra sa lewe vuqa na daubose, sa vakataudeitaki.” O ira na matua oni veitalanoa oqori era na sega sara ni vakatulewa ena vukumu. Ia ena nodra ‘bose vata mai na vu ni yalodra’ era na rairai vakaraitaka kina vei iko e so na ka o sega tu beka ni kila me baleti koya o taleitaka tiko, se na veika sara ga e baleti iko.​—Vosa Vakaibalebale 27:9.

Oqori sara ga na ka e cakava o James, a tukuni taumada. Dina ni sa lai bula taudua tu, ia e saga ga me veivosakitaka kei rau na nona itubutubu na veika e baleti Susan. Oti oya rau sa qai veisolitaka na yacadra na tacida matua era tukuna na nodra nanuma me baleti rau. Ni vinaka na veika era tukuna, rau sa qai tekivu veibuku sara na rua oqo me rau raica kina se na ganiti rau me rau vakamau se sega. Kevaka o cakava tale ga na ka oqori, ni bera ni tawa sara kina vakalevu na lomamu, o na nuidei ena nomu vakatulewa.

Koya e uasivi sara oya mo masu vei Jiova. Me vaka ni dua na ikalawa ina bula vakawati na veibuku, kerea na Kalou me vukei iko mo raica se na tini ena vakamau na veibuku kei na goneyalewa oqori se sega. E bibi duadua na nomu kerea na Kalou me vukei kemudrau ena nomudrau vakatulewa, me rawa kina ni drau volekati koya tiko ga. Ni oqori ga ena vu ni marau vei kemudrau.

[iVakamacala e ra]

[iYaloyalo ena tabana e 17]

Kevaka o sega dina ni taleitaki koya, qarauna sara me kua ni veivakacalai na nomu ivukivuki