Eda na Bula Vakacegu Beka ena Dua na Gauna?

ERA marau na gone nira qito vata toka kei ira na nodra itubutubu dau loloma​​—⁠o cei e sega ni marautaka me sarava oqori? Era qito welewelei na gone nira vakila na nodra dau veikauaitaki qai veitaqomaki na itubutubu vaka oqo. Ia, vei ira e levu na lalai na gauna marautaki vaka oqori e tu yadua sara. Ni so vei ira era lomaleqataka e veisiga na vanua mera na moce kina ena bogi. Na taro gona e tiko, e dua beka na nodra inuinui na gone e sega na nodra vale, kei ira e so tale na tamata e sega e dua me taqomaki ira?

E kena irairai ni sega na nodra inuinui me baleta na gauna mai muri, ia e dulaka oqori na iVolatabu. A tukuna tu mai na parofita o Aisea ni na yaco na gauna eda na bula vakacegu kece na tamata. E vola: “A ra na tara vale, ka tiko kina; era na tea eso na were-ni-vaini, ka kania na vuana; era na sega ni tara, ka tiko kina na tamata tani, era na sega ni tea, ka kania na tamata tani.”​​—⁠Aisea 65:​21, 22.

Ia e yavutaki dei beka na inuinui oqo? Vakauasivi ni vosa “inuinui” e sega ni dusia na kena na vakavatukana e veigauna na ka e vakanuinuitaki. Me kena ivakaraitaki mai Brazil, e dua na ivosavosa e vakatokai: “Na vakanuinui e dau iotioti ni ka e mate.” E vakaibalebaletaka ni levu era vakanuinui, dina ga ni sega na kena yavu dei. Ia e duidui sara na inuinui e dulaka tu vei keda na Kalou bula. Na yapositolo o Paula e vola: “O koya yadua sa vakabauti koya [na Kalou] ena sega ni vakamaduataki.” (Roma 10:11) Na parofisai vakaivolatabu kece gona e sa vakayacori oti e vakadeitaka vei keda ni na yaco dina tale ga na vosa ni yalayala tale e so ni Kalou o Jiova. Ni sa na vakavatukana na vosa ni yalayala kece oqori, sa na oti na ituvaki e vakavuna nodra biuta na vale na gone.

Nikua sara mada ga, na ivakasala yaga ena iVolatabu e rawa ni vukei ira e sega nodra inuinui mera vakavinakataka nodra bula, ra qai kunea na vakacegu dina. Ena rawati vakacava oya? Era na marau na iVakadinadina i Jiova ena vanua o vakaitikotiko kina mera vukei iko ena kena saumi na taro oqori.