Taro na Dauwiliwili

Me raica vakacava na ivavakoso vakarisito na daukana?

E vakacala na Vosa ni Kalou na mateni kei na daukana. E sega ni dodonu mera vakaitovotaka o ira na qarava na Kalou. Koya gona, e raica na ivavakoso vakarisito e dua sa kilai ni nona ivalavala ga na daukana me tautauvata kei koya e dau mateni. Ena sega ni rawa ni lewena na ivavakoso vakarisito e dua e dau mateni se daukana.

Na Vosa Vakaibalebale 23:​20, 21 e tukuna: “Mo kakua ni tiko kei ira era daugunu waini, kei ira era daukusikusima. Ni rau na vakadravudravuataki na daumateni kei na daukana. Ia na tamata sa daumoce ena vakaisulu e nai sulu sa kadresudresu.” Eda wilika ena Vakarua 21:20 ni vakarota na Lawa a soli vei ira na Isireli ni dodonu me vakamatei e dua e “yalovakatani ka dautalaidredre.” E laurai ena tikinivolatabu oqo e rua na itovo i koya e dautalaidredre qai sega ni via veivutuni, oya ni “daukana ko koya, ka daumateni.” E matata gona ni daukana e sega ni itovo kilikili vei ira na via qarava na Kalou e Isireli makawa.

Ia, na cava sara mada na daukana? Na cava e tukuna na iVolatabu Vakirisi Vakarisito me baleta na ulutaga oqo? Na ibalebale ni daukana oya “e dua e nona ivakarau me kanalevu qai garova vakalevu na kana kei na gunu.” Koya gona, na daukana e wili tiko me kocokoco, qai tukuna na Vosa ni Kalou ni o “ira na daukocokoco” era na sega ni rawata na Matanitu ni Kalou. (1 Korinica 6:​9, 10; Filipai 3:​18, 19; 1 Pita 4:​3, VV) Kena ikuri, ni vakasalataki ira na lotu Vakarisito na yapositolo o Paula mera kua ni cakava na “cakacaka ni tovo vakayago,” e okata kina na “daumateni, na daumarau vakalialia, kei na veika sa vakakina.” (Kalatia 5:​19-​21) Na kana vakasivia e dau lako vata na mateni kei na marau vakalialia. Kena ikuri, e sega ni vakabekataki ni “veika sa vakakina” e cavuta o Paula e okati tale ga kina na daukana. Me vaka ga na “cakacaka ni tovo vakayago” tale e so, kevaka e dua na lotu Vakarisito e kilai ni daukana qai sega ni via veisautaka na nona ivalavala kocokoco e dodonu me bui tani mai na ivavakoso.​​—⁠1 Korinica 5:​11, 13.a

E dina ni okati rau vata na Vosa ni Kalou na daumateni kei na daukana, ia e kilakilai dredre toka o koya e daukana. E rawarawa ni kilai kevaka e dua e mateni. Ia, ena dredre me vakadeitaki ni dua e daukana mai na kena irairai wale ga. Koya gona, ni sagai me wali na leqa baleta na itovo oqo, ena gadrevi mera raica sara vakayalomatua na qase ni ivavakoso.

Me kena ivakaraitaki, na levulevu sivia ena rairai vakaraitaka na daukana, ia e so tale na ka e rawa ni vakavuna. Na nona levulevu sivia e dua e rairai vu tiko mai na tauvimate. Ena rairai vakavuna tale ga na kawa e cavu tu mai kina. Meda nanuma tiko ni levulevu sivia e ituvaki ni yago, ia na daukana e dusia tiko na gagadre ni loma ni tamata. Na ibalebale ni levulevu sivia oya na kena sa rui levu tu na uro ena yago, ia na daukana e dusia tiko na kocokoco se na kanakana vakalialia. O koya gona, ena sega ni kilai na nona daukana vakasivia e dua ena ituvaki ni yagona, ia ena kilai ga ena nona dau garova na kakana. Dina ni na sega ni levulevu sivia sara e dua se na saisaia toka beka ga, ia e rawa ni tukuni ni daukana. Kena ikuri, ni duidui tu na vanua ena duidui tale ga na rai me baleta na veirauti ni kena levu e dua se kena ibulibuli.

Ena kilai vakacava o koya e daukana? Ena laurai ni dau kocova na kakana qai kania vakasivia me yacova sara ni sa kanavoro, e sega ni dau lewai koya vinaka. Na nona sega ni lewai koya vinaka e dusia tiko ni sega ni leqataka na nona vakarogorogocataki Jiova kei ira na nona tamata. (1 Korinica 10:31) Ena dua tale na yasana, ena sega sara ni lai wili vata kei ira ‘na daukocokoco’ o koya e kana vakasivia ena so wale ga na gauna. (Efeso 5:⁠5) Ia, ena rairai veiganiti me na vakasalataki me salavata kei na vosa i Paula ena Kalatia 6:⁠1. E kaya: “Oi kemudou na veiwekani, kevaka sa vakidacalataki e dua na tamata mei valavala ca, mo dou vakavinakataki koya e na yalo malumalumu.”

Na cava e sa qai bibi ga kina nikua na ivakasala ni iVolatabu meda qarauna na kana vakasivia? E vakadreta o Jisu me baleta tiko na noda gauna: “Dou qarauni kemudou vinaka, de dua na siga sa bibi kina na yalomudou e na daukana, kei na daumateni, kei na lomaocaoca e na veika ni bula oqo, ka yaco vakidacala kina vei kemudou na siga ko ya. Ni na vaka ga nai cori.” (Luke 21:​34, 35) Na noda qarauna na kana vakasivia e dua na sala bibi e rawa ni kaukaua tiko ga kina na noda bula vakayalo.

E dua na itovo era kilai tani kina na lotu Vakarisito na yalomatua. (1 Timoci 3:​2, 11) O Jiova ena vukei ira gona na tamata yalomatua era via bulataka dina na ivakasala ni iVolatabu me baleta na kana kei na gunu vakarauta.​​—⁠Iperiu 4:​16.

[iVakamacala e ra]