Cabeti na Koro o Rukuruku, e Saba

E VAKARURUGI i Necaladi na yanuyanu o Saba. E liu, a dau nodra itikotiko na daubutako era sokota na wasawasa na Caribbean ena nodra vaqara iyau, ra dau butakoci ira gona kina na vodo waqa. Nikua, na yanuyanu lailai oqo, e koto ena 240 na kilomita ena tokalau kei Puerto Rico, e rauta ni 1,600 na lewena, e 5 eratou iVakadinadina i Jiova. Ia, eratou vaqara tiko na dauvunau yaloqaqa oqo e dua na ka e uasivia na iyau. Oya na nodratou gumatua na vaqarai ira “era sa vakarau tu me vinakata na bula tawa mudu.”​—Cakacaka 13:48.

Na imatai ni gauna e yaco kina na itukutuku ni Matanitu ni Kalou ena yanuyanu oqo ena 22 June, 1952. E kele yani ena baravi kei Saba na Sibia, e dua na waqa e 18 na mita na kena balavu, e nodra na iVakadinadina i Jiova. (Maciu 24:14) Erau cabeta Na iKabakaba (The Ladder) o Gust Maki kei Stanley Carter, e rua na daukaulotu. Na ikabakaba vatu oqo e sivia na 500 na kena ibutubutu qai yaco sara e cake ena koroturaga kei Saba, o Rukuruku (The Bottom).a Sa vica vata na senitiuri na kena vakayagataki tiko na ikabakaba oqo, qai gaunisala duadua ga mera yacovi kina na lewenivanua.

E tiko ena 1966 Yearbook of Jehovah’s Witnesses na imatai ni nodra volaitukutuku ni cakacaka vakavunau na lotu Vakarisito e Saba. A volai kina ni a dua ga na iVakadinadina i Jiova a tiko e kea. Ia e muri, eratou sa qai vunautaka tiko kina na itukutuku vinaka e dua na vuvale mai Kenada me vica vata na yabaki. Dua na gauna tiko ga oqo, erau veisiko kina e dua na veiwatini mai Mereke, erau sa vakacegu mai na nodrau cakacaka, o Russel kei Kathy, me rau lai cakacaka vakavunau e kea. Wilika mada na nodrau italanoa.

Sikovi Saba

A tavaki keirau ena raraniwaqavuka o Ronald, na turaga ena vakaicilitaki keirau. O koya taudua ga na iVakadinadina i Jiova ena yanuyanu oqo ena veiyabaki ni 1990. Marautaka sara o koya na kakana draudrau keirau kauta tiko yani vakailoloma, me vaka ni sega ni volitaki na vua ni itei ena yanuyanu oya. Keitou vodo sara ena dua na lori lailai, e kauti keitou cake vakamalua ena gaunisala tatakelokelo ena baba ni ulunivanua o Totoka (Mount Scenery) me keitou yaco sara e delana, na vanua e daulabuebue tu e liu.

Keitou kele taumada ena koro o Matamata i Eli (Hell’s Gate), me lai raica o Ronald ke se kabi tiko ga na veisureti ina vunau ena Sigatabu ena papa ni itukutuku. Keitou marau ni vaka kina. E vodo tale ena lori o Ronald, keitou qai cabe yani ina korolevu duadua ena yanuyanu, o Tadravicagi (Windwardside). Me vaka ga na yacana, na koro totoka oqo e mai tiko sara ga ena vanua e mudre kina vakalevu na cagi, qai 400 na mita na kena cere mai waitui. Ni keitou kele yani ena vale nei Ronald, keirau raica sara ena varada ni vakatakilai matata tu kina ni oya na Kingdom Hall ni iVakadinadina i Jiova.

Ena gauna ni vakasigalevu au taroga sara e dua na taro e vu ni neirau veisiko mai, “O mai dautukutuku vakacava ni Matanitu ni Kalou e Saba?”

“Ni sa oti na kena tara na valenivolavola ni tabana ni iVakadinadina i Jiova e Puerto Rico ena icavacava ni 1993,” e kaya o Ronald, “neirau inakinaki vakaveiwatini me keirau tomana tiko ga neirau veiqaravi e vanuatani. Ena dua na gauna e liu keirau a sikovi Saba kei na dua tale na veiwatini painia, keitou qai kila nira le 1,400 na lewena, ia era sega ga kina na iVakadinadina i Jiova. Keirau mani veivosaki sara kei na Komiti ni Tabana e Puerto Rico me keirau toki mai e ke.

“E cakacakataki sara neirau toki mai, sega ni dede sa vakadonui. Ka ni rarawa, ni oti ga e rua na yabaki a tauvimate bibi o watiqu, keirau mani lesu tale e California. Lai takali sara kina, ia au lesu tale mai. Na vuna, niu dau via vakaotia vinaka na ka au tekivuna.”

Na Vunau e Veivale e Saba

Sa duanadrau toka na yabaki na vale e vakaitikotiko kina o Ronald, e dau vakayagataki tale ga na kena rumu ni gade me Kingdom Hall.b Ni keitou katalau qai vakavakarau tale ga ena cakacaka vakavunau, sa tekivu mirimiri na uca, mani vakasuasuataka na valenikuro e sega tu na dokana. Oti ga na katalau oqori, keitou lai cakacaka vakavunau sara e Rukuruku, dina ga ni vakaturubuto tu na mataka oya. Ena veigauna kece keitou sikova kina e dua na vale, ena kidavaki ira kece na itaukeinivale ena yacadra o Ronald. E dau vakabi ga na veivosaki ena dua na itukutuku e buta katakata sara tiko ga ena yanuyanu. E levu era kilai Ronald kei na nona cakacaka vakavunau, era ciqoma tale ga e levu na ivola vakaivolatabu.

Kevaka o sega ni kilai ira vinaka na tiko ena koro, e sa bau ka ni bolebole toka na nomu talevi ira na taleitaka na itukutuku ni Matanitu ni Kalou. Na vuna? Baleta “ni lawa ni Matanitu me tautauvata kece na roka ni vale,” e kaya o Ronald. Au vakadinadinataka sara ga na ka oqo, niu veiraiyaki au raica nira vulavula kece tu na roka ni vale qai damudamu ga na delana.

Ni mai tini na neitou veivosaki vakaivolatabu, keirau sureti koya sara na itaukeinivale me mai rogo ivunau ena Kingdom Hall ena Sigatabu. E dau vunau ena Kingdom Hall e veimacawa o Ronald, vakavo ga ke lako ena dua tale na vanua. Ena gauna oqo sa 17 tiko na vuli iVolatabu e Saba. Era lewe 20 na tiko ena iVakananumi ni mate i Karisito ena 2004. Dina ni na rairai lailai toka na iwiliwili oqori, ia e dusia tiko e 1 na pasede ni lewenivanua e Saba!

Io, era cakacaka sara vakaukaua na iVakadinadina i Jiova mera tukuna yani ena kena levu era rawata na itukutuku ni veivakabulai ni Kalou. Se mani yanuyanu lailai me vakataki Saba, se dua taucoko na vanua levu, era yalodina tiko ga na iVakadinadina i Jiova ena nodra muria na ivakaro mera “qisi ira me ra noqu tisaipeli na lewe ni veivanua kece ga.”​—Maciu 28:​19, VV.

E ka ni rarawa ni sa mai cava na neirau veisiko. Keirau yaloyalo ni keirau sa lai vodo ena waqavuka. Ena guiguilecavi dredre na neirau veisiko e Saba kei na gauna keirau cabeti Rukuruku kina!

[iVakamacala e ra]

[Mape ena tabana e 10]

(Raica tale na ivola)

PUERTO RICO

[iTaba ni Credit Line ena tabana e 10]

Background: www.sabatourism.com