Kua ni Rere ni O Tusaqati

E DUA na ilawalawa cudrucudru era a vakaukauataki Keio kei Arisitako, e rua na itokani i Paula na yapositolo, me rau curu ina nodra bure levu ni soqo na kai Efeso. Sa ra qai lai qolouvaka tiko kina me rua na aua: “Sa cecere duadua ga ko Atemisa na kalou ni Efeso!” (Cakacaka 19:28, 29, 34, VV) Erau rere beka na itokani i Paula ni rau tusaqati vaka oqo? Ia, cava sara mada a vakavuna nodrau tusaqati?

Sa voleka ni yabaki tolu nona vunau tiko o Paula ena koro o Efeso, e vuavuaivinaka tale ga. Sa ra biuta gona kina e levu ena koro oya na qaravi matakau. (Cakacaka 19:26; 20:31) Dau dua tiko na nodra matakau na kai Efeso, oya na ivakatakarakara siliva lailai kei Atemisa, na kalou yalewa ni vakatubukawa, qai raica sobu tu na koro na kena valenisoro totoka. Era dau daramaka na ivakatakarakara lalai ni valenisoro oqori o ira na lewenikoro me itataqomaki, se me iukuuku ni nodra lomanivale. Ia o ira na lotu Vakarisito era sa na sega tu ga ni volia na matakau oqori.—1 Joni 5:21.

E vakabauta o Timitirio, e dua na dautaiyaya siliva ni na vakaleqa nodra bisinisi oqo na cakacaka vakavunau i Paula. Ena nona lasu kei na nona vakalevutaka wale ga na italanoa, era vakabauta kina na nona itokani dautaiyaya siliva nira sa na sega ni qaravi Atemisa na tamata kece e Esia Lailai. A yaco e dua na ue levu ena nodra sa qoqolou tiko na dautaiyaya siliva ena vuku i Atemisa, ra qai veilecayaki kina na lewe ni koro kece.—Cakacaka 19:24-29.

E vica vata na udolu era lako yani ena bure levu, e rawa ni dabe kina e 25,000 na dau sarasara. A via vosa vei ira na ilawalawa cudrucudru oqori o Paula, ia ra qai vakamasuti koya e so na vakailesilesi yalovinaka ni Esia me kua. Sa qai vakamalumutaki ira na vunivola ni koro, rau mani dro bula rawa kina o Keio kei Arisitako.—Cakacaka 19:35-41.

Era na rairai tusaqati tale ga na tamata ni Kalou nikua nira cakacaka tiko vakavunau, so era vakacacani sara. Levu na gauna era vunautaka yani na itukutuku vinaka ena veikoro sara ga e caka tiko kina na qaravi matakau, na itovo vakasisila, kei na basulawa. Ia, era yalodei tiko ga ena nodra vakatotomuria na yapositolo o Paula, ni ‘sega ni rere ni vunau nira soqoni vata vaka kina ena nodra veivale’ na lewe ni koro levu e Efeso, ‘me yaga vei ira, mera vakavulici kina.’ (Cakacaka 20:20) Era marau tale ga nira raica ‘na tete ni vosa i Jiova, e sega ni tarovi rawa.’—Cakacaka 19:20, VV.

[iYaloyalo ena tabana e 30]

iRusarusa ni bure levu ni soqo e Efeso