Mo Vakayagataka Vakavuku na Veisiga ni Nomu Bula

“MO NI vakavulici keimami me keimami wilika [“vakayagataka vakavuku,” NW] na neimami siga, me keimami sa vagolea kina na yalo i keimami ki na vuku.” (Same 90:12) Oqo na masu malumalumu i Mosese, e dua a vakaitavi ena volai ni iVolatabu. Ia, na cava sara mada e kerea tiko? Dodonu beka meda kerea tale ga ena yalomalumalumu na ka vata oqori?

E yasovaka o Mosese ena tikina e 10 na lekaleka ni bula ni tamata. Ena dua tale na gauna, e vola na ka e kaya o Jope: “A tamata sa sucu maivua na yalewa sa vica walega na nona siga, ka sa vutu ni rarawa.” (Jope 14:1) Kena irairai ni a rarawataka dina o Mosese na lekaleka ni bula ni tamata ivalavala ca. Koya gona, e raica o koya ni dua na ka vakamareqeti na bula ena veisiga. Nona masu gona vua na Kalou, e vakaraitaka tiko ni via vakayagataka vakavuku na vo ni nona siga, me vakamarautaki koya na Dauveibuli. Vakacava, eda sa vakayagataka tiko beka vakavuku na vo ni noda siga? Io, eda na cakava vaka kina ke da vinakata me vakadonui keda na Kalou.

E dua tale na ka a uqeti Mosese kei Jope, e dodonu me uqeti keda tale ga. Rau a rai vakanamata tu na tamata ni Kalou oqo ena dua na icovi sa tu mai liu—na bula ena vuravura e vinaka na kena ituvaki. (Jope 14:14, 15; Iperiu 11:26) Ena gauna oya, ena sega ni muduka koso na mate na nona caka vinaka e dua. E nona inaki na Dauveibuli mera bula tawamudu na tamata yalododonu ena parataisi e vuravura. (Aisea 65:21-24; Vakatakila 21:3, 4) E rawa tale ga ni nomu inuinui oqo kevaka o ‘vulica mo vakayagataka vakavuku na nomu siga, o qai vagolea na yalomu ina vuku.’