O Yavutaka Tiko ena Cava na Nomu Bula?

NA KAUKAUA ni vale e vakatau vakalevu ena kena yavu. Na vakasama oqo e dau vakayagataki ena iVolatabu me vakaibalebaletaki ena so na ka.

Kena ivakaraitaki, na parofita o Aisea e tukuna ni Kalou o Jiova a “tauyavutaki vuravura.” (Aisea 51:13) Na yavu oqori e okati kina na lawa dei ni Kalou e lewa na toso ni vuravura kei na kena ciri koto. (Same 104:5) Na Vosa ni Kalou e tukuna tale ga “na yavu” e lewa na bula ni tamata. E okati kina na lewadodonu, na lawa, kei na ivakaro. Ni “talaraki,” se vakamalumalumutaki na yavu oqori ena lewa cala, veidabui, kei na itovo voravora, e veilecayaki kina na bula.​—Same 11:2-6; Vosa Vakaibalebale 29:4.

Na vakasama qo e rawa tale ga ni vakaibalebaletaki vei keda yadua. E tinia nona iVunau ena Ulunivanua o Jisu Karisito ni kaya: “Ko koya yadua sa rogoca na noqu vosa oqo, ka cakava, ka’u na vakatautauvatataka kei na tamata vuku, sa tara na nona vale e na dela ni vatu: a sa tau mai na uca, ka coka mai na dobui, ka liwa na cagi, ka tabaka na vale ko ya; a sa sega ni bale: ni sa tauyavutaki e na vatu. Ia ko koya yadua sa rogoca na noqu vosa oqo, ka sega ni cakava, ena vakatautauvatataki kei na tamata lialia, sa tara na nona vale e na dela ni nuku: a sa tau mai na uca, ka coka mai na dobui, ka liwa na cagi, ka tabaka na vale ko ya; a sa bale kina: ia na ka levu na kena bale.”​—Maciu 7:24-27.

O yavutaka tiko ena cava na nomu bula? O yavutaka tiko beka ena nodra vakasama na tamata tawavakalou e sega ni dei me vaka na yavu nuku, e dau tini tawayaga wale? Se o yavutaka dei me vaka na yavu vatu ena ivakavuvuli i Jisu Karisito, na ka ena vakaukauataki iko ena vuravura oqo?