Taro na Dauwiliwili
Na cava erau sega ni vakamatei kina o Tevita kei Pacisepa ni rau a veibutakoci, ia e qai matedole na luvedrau e sucu?
E vakarota na Lawa i Mosese: “Kevaka sa kune e dua na tamata ni sai valavala ca vata kei na yalewa sa vakawati, erau na mate ruarua, na tagane sa ca vata kaya na yalewa, kei na yalewa talega: kemuni na vakaotia kina na ca maivei Isireli.” (Vakarua 22:22) Ke a vakatara na Kalou o Jiova mera vakatulewataka na dauveilewai e Isireli na kedrau itotogi o Tevita kei Pacisepa me vaka a vakaroti ena Lawa, ke rau a sa vakamatei. Me vaka nira sega ni dau kila rawa na loma ni tamata yadua o ira na dauveilewai oqo, era na vakatulewa ga ena cala sa vakadinadinataki. Sa matata tu ga ni itotogi ni veibutakoci na mate. E sega tale ga vei ira na dauveilewai ni Isireli na kaukaua mera bokoca na ivalavala ca oqori.
Ena yasana adua, na Kalou ga e rawa ni kila na loma ni tamata qai bokoca na ivalavala ca, ke tiko na vuna vinaka. Ni a vauci Tevita na cala oqori, qai yalataka tu na Kalou vua e dua na Matanitu, a vinakata sara ga kina o Jiova me walia na leqa oqo. (2 Samuela 7:12-16) “Ko Koya sa lewai vuravura kecega” e tiko vua na dodonu me vakatulewa vaka oqori.—Vakatekivu 18:25.
Na cava e raica o Jiova ni dikeva na loma i Tevita? E dusia na ivakamacala taumada ni Same 51, ni vakatakila na Same oqo na loma i Tevita, “ni sa lako mai vua ko Necani na parofita, ni sa ca vata kei Paci-sepa.” E kaya na Same 51:1-4: “Ni lomani au mai, na Kalou, me vaka na nomuni yalololoma: me vaka na kena levu ni nomuni yalololoma, mo ni bokoca laivi na noqui valavala ca. Mo ni vakasavasavataki au sara mai na noqu caka cala, ka vuya laivi vei au na noqui valavala ca. Ni’u sa vakatusa na noqu talaidredre: ka sa tu ga e mataqu e na veisiga na noqui valavala ca. Vei kemuni, io, vei kemuni duaduaga, ka’u sai valavala ca. Vei kemuni, io, vei kemuni duaduaga, ka’u sai valavala ca, ka cakava e matamuni na ka ca.” A raica o Jiova na rarawa ni loma i Tevita me ivakadinadina ni nona veivutuni dina, qai vakatulewataka na Kalou ni na yavutaka ena ka oqori na nona vosoti rau na cakacala. Kena ikuri, e dau loloma o Tevita, o Jiova tale ga e dau lomani ira na vaka oqori. (1 Samuela 24:4-7; Maciu 5:7; Jemesa 2:13) Ni vakadinata nona ivalavala ca o Tevita, sa qai kaya vua o Necani: “Sa kauta tani na nomuni valavala ca ko Jiova; ko ni na sega ni mate.”—2 Samuela 12:13.
Ia, e tarai rau ga na ca ni ka erau cakava. “Ni kemuni sa vakavuna me ra vosavakacaca ko ira na meca i Jiova e na vuku ni ka oqo,” e kaya o Necani vei Tevita, “sa na mate vakaidina talega na luvemuni sa sucu.” A tauvimate qai mate na luvedrau, dina ni a lolo qai vakaloloku o Tevita me siga vitu.—2 Samuela 12:14-18.
Era sega ni taura rawa e so na vu ni nona mate na gone baleta ni tukuni tu ena Vakarua 24:16: “Me ra kakua talega ni vakamatei na gone e na vukudra na qase.” Ia, meda nanuma tiko ke ra vakatulewa ga o ira na dauveilewai ni Isireli, ke rau a mate vata kei na gone a se bera ni sucu oya o rau na itubutubu. Na mate tale ga ni luvedrau a rairai vakila sara ga kina o Tevita na nona cata o Jiova na nona valavala ca kei Pacisepa. Sega ni vakabekataki ni a donu na vakatulewa i Jiova ni “sa dodonu na nona ivalavala.”—2 Samuela 22:31.
[iYaloyalo ena tabana e 31]
A veivutuni dina o Tevita