“O Ira Era sa Soko Voli ena Wasawasa ena Waqa”

DONUYA na toba o Gloucester, e Massachusetts, mai Mereke, e duri tu kina e dua na ivakatakarakara parasa ni dua na kavetani, e saga tiko me ulia na nona waqa ena dua na draki ca levu. Na ivakatakarakara oqo e kedra ivakananumi na vica vata na udolu na dauqoli ni Gloucester, e tukuni nira a mate e wasawasa. Ena yavu ni ivakatakarakara vaka kina ena dua na vatu ni ivakananumi e volekata, e ceuti tu kina na veivosa ni Same 107:23, 24: “O ira era sa soko voli e na wasawasa e na waqa . . . , ka kitaka na nodra cakacaka e na wai levu; o ira oqo era raica na cakacaka i Jiova, kei na nona ka e veivakurabuitaki e na wai titobu.”

Dina ni dau katoa na qoli ena wasawasa ena Atalanitika ia e bisinisi rerevaki toka. Ena veiyabaki sa sivi, e rauta ni 5,368 na tagane e Gloucester e kilai nira a mate e wasawasa ena gauna era qoli voli kina. Ena gauna oqo, na iwiliwili ni lewenivanua e kea sa rauta na 30,000. E kaya na ivakananumi: “So era a vakaleqai ena vuku ni cagi vakacevaruru e liwa mai na vuaicake qai lako vata mai kei na ua lelevu. E so tale era mate taudua ena velovelo nira ciri tani mai na waqa a usani ira yani ina yalava ni qoli. Era coqa e so na waqa ena gauna ni draki ca ra qai lutu dromu, yaco kina na mate vakaloloma. So tale na waqa e coqai ira na waqasitima nira muria tiko na salaniwaqa.”

Na ivakananumi e biuta koto e dua na ivakadinadina rarawataki ni cakacaka kaukaua kei na veika rerevaki era sotava na dauqoli ena veisenituri sa sivi. Vakasamataka mada na rarawa kei na nuiqawaqawa era sotava o ira e takali na watidra, tamadra, tacidra kei na luvedra. Ia, na Kalou o Jiova e sega ni guilecavi ira na yada, na luveniyali, se o ira na mate e wasawasa. E tukuna oqo na yapositolo o Joni me baleta na veika ena yaco ena gauna mai muri: “Na wasawasa sa soli ira na mate era sa tiko kina, o mate tale ga kei bulu erau sa soli ira na mate era sa tiko kina.” (Vakatakila 20:13) O ira era mate nira “soko voli e na wasawasa e na waqa” era na raica sara ga “na cakacaka i Jiova” ena gauna era na vakaturi kina.