Rau Vakacacani e Liu, Rau Qai Ciqomi

ENA vica na yabaki sa oti, rau a toki o Santiago, kei watina o Lourdes, ina dua na koro totoka o Huillcapata e Peru, me rau lai wasea kina na itukutuku ni iVolatabu me baleta na inuinui vei ira na vakaitikotiko e kea. Oti ga vakalailai, a yaco tale ga yani e dua na bete mai Cuzco, a kaciva sara e dua na bose vei ira na vakaitikotiko e Huillcapata. A kaya vei ira na bete ni nodra tiko na iVakadinadina i Jiova e kea ena kauta mai na mate ca, ena lutu vakalevu na ucacevata ena vakavuna me mate na nodra bulumakau qai vakacacana na nodra itei.

E levu era vakabauta sara ga na “parofisai” oqo, e sivia e ono na vula e se sega ga ni dua e bau ciqoma na nodrau veisureti o Santiago kei Lourdes me vulica na iVolatabu. O Miguel, e dua na vakailesilesi ni koro, a cemuri rau na veiwatini oqo e gaunisala qai vakaviriki rau ena vatu. Ia, erau dau vakaraitaka tu ga na veiwatini oqo na itovo vakarisito ni yalomalumalumu.

Ni toso na gauna sa ra qai vakadonuya e so na lewenikoro mera vulica na iVolatabu. O Miguel mada ga a veisau na nona rai. A vulica na iVolatabu kei Santiago, tinia nona dau gunu sivia, yaco me dua sara na tamata yalomalua. A qai yaco o Miguel, o watina, kei na rua na luvena yalewa me ratou ciqoma na ka dina ena iVolatabu.

Nikua, sa tiko e dua na ivavakoso gugumatua ni iVakadinadina i Jiova ena koro oqo. E marautaka vakalevu o Miguel ni sega ni lauti Santiago kei Lourdes na vatu a vakaviriki rau kina, a vakavinavinakataka tale ga na nodrau ivakaraitaki vinaka ni yalomalumalumu na veiwatini.

[iYaloyalo ena tabana e 32]

Nodrau ivakaraitaki vinaka ni yalomalumalumu o Santiago kei Lourdes (e cake) e veisautaka na nona rai o Miguel (ena imatau)