Taleitaka Nomu Dau Vakananuma Matua na Ka
E SO era raica ni cakacaka levu na dau vakananumi matua na ka. Era raica ni oqo ena gadrevi kina na vakasama vakatitobu. Ia e so vei ira oqo era na rairai veivutunitaka na nodra sega ni dau vakananuma matua na ka, vakauasivi nira sa qai wilika na kena bibi. (Filipai 4:8) E rawa ni gauna taleitaki duadua vei keda na noda vakasamataka vakatitobu na ka dina eda vulica me baleti Jiova, nona itovo qoroi, na veika uasivi e cakava, na veika e gadreva, kei na nona inaki totoka. Na cava na vuna?
Na Kalou o Jiova e iLiuliu Cecere e lomalagi kei vuravura, e ogaoga qai cakacaka tiko ga ena kena vakayacori na lomana. (Joni 5:17) Dina ga ni osooso tu, ia e dau kauaitaka na veika era vakananuma yadudua o ira na sokalou vua. E kila oqo na daunisame o Tevita ni uqeti vakalou nona vola: “I Jiova, ko ni sa dikevi au, ka kilai au. O ni sa kila na noqu tiko sobu kei na noqu tu cake, o ni sa kila na nanuma ni lomaqu ni sa yawa tiko.”—Same 139:1, 2.
Ia, e dua e rawa ni raica vakatani na ka e tukuna na daunisame. E rawa ni kaya, ‘Dina ga ni “yawa” sara na Kalou, ia e kila vinaka na veika ca au dau vakananuma.’ Ena dua na yasana e vinaka meda kila tiko ni o Jiova e kila vinaka na ka eda dau vakananuma. Oqo e rawa ni uqeti keda meda kauta laivi na vakanananu ca, da qai tusanaki keda vua na Kalou ke da vakasamataka e dua na ka ca, oqo e vakaraitaka nida kila ni na vosoti keda na Kalou ena noda vakabauta na isoro ni veivoli i Jisu. (1 Joni 1:8, 9; 2:1, 2) Meda kila tale ga ni dau raica o Jiova na yasana era vinaka kina na nona dauveiqaravi. E dau kauaitaka vakalevu o Jiova noda vakasamataka na ka vinaka me baleti koya.
“E dau dikeva beka o Jiova na ka vinaka kece era vakananuma na vica na milioni nona dauveiqaravi?” o na rairai taroga. E vaka dina kina. A vakabibitaka o Jisu na nona dau kauaitaki keda o Jiova, e kaya ni kauaitaka mada ga na Kalou na separo lalai, qai kuria o Jisu: “Dou sa uasivi cake vei ira na separo e vuqa.” (Luke 12:6, 7) E sega ni rawa nira vakasamataki Jiova na separo. O koya gona kevaka sa kauaitaki ira o Jiova, sa na wacava na nona kauaitaki keda yadudua qai marautaka na noda dau vakasamataki koya! Me vakataki Tevita, e rawa nida masuta ena nuidei: “Me vinaka . . . na vakanananu ni yaloqu, i Jiova, na noqu uluvatu, kei na noqui vakabula.”—Same 19:14.
iKuri ni ivakadinadina ni dau kauaitaka dina o Jiova na nodra dau vakananumi koya na nona dauveiqaravi yalodina e kune ena ivola uqeti vakalou i Malakai. Ni tukuna tiko na noda gauna, e kaya: “Sa ra qai dauveivosaki vakataki ira ko ira era sa rerevaki Jiova: a sa vakarorogo ko Jiova, ka rogoca, a sa volai e dua nai vola ni veivakananumi e matana e na vukudra era rerevaki Jiova, ka vakananuma na yacana.” (Malakai 3:16) E vakadreti keda na tikina oqo ni o Jiova e dau ‘rogoca’ se kauaitaka na noda dau vakasamataki koya, oqo e rawa ni vakavuna meda taleitaka na noda vakananuma matua na veika me baleti koya. Meda duavata mada ga kei koya na daunisame ni vola: “Au na veinanuyaka talega ki na nomuni cakacaka kecega, ka veivosakitaka na nomuni valavala.”—Same 77:12.