Taro na Dauwiliwili

Ni oti na iotioti ni veivakatovolei ni sa cava na duanaudolu na yabaki ni veiliutaki i Karisito, ena rawa beka nira ivalavala ca tale na tamata, me gadrevi tale kina mera vakamatei?

E rua na tikinivolatabu ena Vakatakila ena vukei keda meda sauma na taro oqo: “Ko mate kei bulu [“Etesi,” NW] talega erau sa biu ruarua ki na drano buka waqa. Sai koya oqo nai karua ni mate, io na drano buka waqa.” (Vakatakila 20:14) “E na tavoya tani na wai ni mata kece ga mai na matadra ko koya, ka sa na sega tale na mate; sa na sega tale ga na rarawa se na tagi se na vutugu, ni ra sa takali tani na veika makawa.”​​—⁠Vakatakila 21:​4, VV.

Dikeva na gauna ena vakayacori kina na ka e vakamacalataki ena rua na tikinivolatabu oqo. Na nodrau kolotaki o “mate kei Etesi” ina drano bukawaqa ena vakayacori nira sa lewai oti na bulata na Amaketoni, ira na vakaturi mai na mate, kei ira era na sucu ni oti na Amaketoni. Era lewai ena “ka sa volai e nai vola,” se na ka e vinakata o Jiova mera cakava na kawatamata ena loma ni duanaudolu na yabaki ni veiliutaki i Jisu. (Vakatakila 20:​12, 13) E volatukutukutaka na yapositolo o Joni e dua tale na raivotu ena Vakatakila wase 21, ena vakayacori vakalailai ena loma ni duanaudolu na yabaki ni veiliutaki i Karisito Jisu. Ia, ena qai vakayacori taucoko ni sa cava na duanaudolu na yabaki ni Siga ni Lewa. Ena gauna oya, sa na qai taucoko na nona “tiko vata” kei na kawatamata o Jiova baleta ni sa na vakalesuya vua o Jisu na Matanitu ni Kalou. Sa na sega tale ni gadreva o Jiova me dua e matataki koya. Ena vakasama vakayalo, sa na qai “tiko vata” kei ira na “nona tamata” me tawamudu. Sa na qai vakayacori taucoko na ka a yalataka tu mai na Kalou, me na “sega tale na mate” me vaka nira sa na bula uasivi na tamata ni sa na yaga kece vei ira na isoro ni veivoli i Karisito.​​—⁠Vakatakila 21:​3, 4, VV.

O koya gona, na mate e tukuni tiko ena vica na tikinivolatabu mai cake e vakamacalataka tiko na mate e dewa mai vei Atama, ena qai bokoci ena isoro i Karisito. (Roma 5:​12-​21) Ni sa sega na mate a dewa mai vua na imatai ni tamata, era na tautauvata ga na kawatamata kei Atama ena gauna a buli kina. A uasivi o Atama, ia sega ni kena ibalebale oya ni a sega ni rawa ni mate. A tukuna o Jiova vei Atama me kua ni kana mai na “kau sa kilai kina na ka vinaka kei na ka ca,” e tukuna tale ga: “Ko na mate vakaidina e na siga ko sa kana kina.” (Vakatekivu 2:​17) Oya na mate a vu mai na nona nakita me valavala ca. Ni oti na veivakatovolei ena vakayacori ni cava na duanaudolu na yabaki, ena sega ni kau laivi vei ira na tamata na galala ni vakatulewa. (Vakatakila 20:​7-​10) Era na dui vakatulewa se ra na qaravi Jiova tiko ga se sega. O koya gona, e sega ni rawa ni kainaki ni sega ni dua na tamata me na vakanadakuya na Kalou, me vaka a vakayacora o Atama.

Na cava ena yaco vua e dua ke veivorati ni oti na iotioti ni veivakatovolei, ni sa sega kina o mate se o Etesi? Ena gauna oya sa na sega na mate a dewa mai vei Atama. Sa sega tale ga o Etesi, na ibulubulu e rawa nira vakaturi mai kina na mate. Ia, se rawa tiko ga vei Jiova me vakarusa ena drano bukawaqa e dua e veivorati, sa na sega kina na nona inuinui me vakaturi. Na mate oya ena vaka ga na mate erau sotava o Atama kei Ivi, sega ni mate a dewa mai vei Atama.

Ia, e sega ni dua na vuna vinaka meda nanuma kina ni na yaco oqo. O ira na bula sivia na iotioti ni veivakatovolei era na duidui sara mai vei Atama ena dua na sala bibi. Oya ni sa na taucoko sara ga na nodra vakatovolei, baleta ni rawa vei Jiova me dikeva taucoko sara ga na ka e tiko e loma ni tamata. Na iotioti gona ni veivakatovolei, era sa na kawaboko kece kina o ira era via vakayagataka vakatani na nodra galala ni vakatulewa. Kena irairai gona ni na sega ni dua tale ena vakayagataka nona galala ni vakatulewa me tusaqata kina na Kalou.

[iYaloyalo ena tabana e 31]

Ni oti na iotioti ni veivakatovolei, era na tautauvata vakacava na kawatamata kei Atama?