Qase Sara Sega ga ni Galili
NI SA tatara mai na bula vaqase, e levu era sa sega ni lako rawa, sa ra sega kina ni veitaratara vakalevu kei ira tale e so. Ia a sega ni sotava oqori o Fernand Rivarol, e dua na turaga a leqa ni sa yabaki 95 mai Geneva, e Suwitisiladi. A tiko taudua ga ni sa leqa o watina, o luvena yalewa tale ga sa vakawati qai tiko ga ena nona vale. Dina ga ni dau tiko e vale o Fernand, ia a sega soti ni galili. E dau dabe toka ga ena rumu ni gade qai dau vakayagataka na talevoni me veivosaki kina kei ira na tamata me baleta na veika vakayalo.
E levu na ka a sotava o Fernand ena nona bula, so e vinaka so e ca, dua mada ga na gauna a bala sara e valeniveivesu. Na cava na vuna? Ena gauna rau sa iVakadinadina i Jiova kina kei watina ena 1939, a kacabote na iKarua ni iValu Levu e Urope. Ena nona vulica na iVolatabu a vakatulewataka kina o Fernand me kua ni vakamavoataka e dua. Ni yalodina ina vakatulewa oya, mani vakasakei mai na nona cakacaka qai bala vakavica e valeniveivesu me lima veimama taucoko na yabaki. Ena loma ni gauna oqori a sega tu ni raici watina kei na luvena.
Ni vakananuma lesu, e kaya o Fernand: “Era nanuma e levu niu sa vakawaletaka ga na noqu cakacaka, au sega tale ga ni kauaitaki iratou na noqu lewe ni vuvale. Era cati au ra qai raici au me vaka e dua na daubasulawa. Ia, niu raica lesu na veiyabaki dredre oya, au nanuma vinaka tu ga na nona vukei keitou vakavuvale o Jiova. Dina ga ni sa oti oqo e vicavata na yabaki, ia sa qai kaukaua ga na noqu nuitaki Jiova.”
E uqeti Fernand na vakabauta oqo me wasea yani ena talevoni na inuinui e tukuni ena iVolatabu. Ke dua e tataleitaki, ena vakauta sara vua e so na ivoladusidusi vakaivolatabu. Oti, ena qai qiriti koya tale me raica kevaka a taleitaka na ivola. Era volavola tale mai e so mera vakavinavinakataki koya. Oqo e vakamarautaki Fernand vakalevu.
De dua oni na veivosaki kei na dua na iVakadinadina i Jiova e vakataki Fernand. Vakacava mo ni rogoca na ka e tukuna mo ni kila kina na ka e vakabauta? Era na marau na iVakadinadina i Jiova mera vakamacalataka vei kemuni na ka era vakabauta.