Na Cava Meda Cakava Kina na Ka e Dodonu?

A KAYA e dua na turaga vuli vinaka: “Sa tiko . . . vei au na vinakata na ka vinaka; ia na kaukauwa me’u kitaka kina, ka’u sa sega ni kunea. Ia na ka vinaka ka’u sa vinakata, au sa sega ni kitaka; ia na ka ca ka’u sa sega ni vinakata, au sa kitaka ga.” Na cava e dredre kina vua na turaga oqo me cakava na ka e dodonu? E vakamacalataka: “Ka’u sa kunea . . . e dua na vunau, sa tiko kina vei au na ca ni’u sa via kitaka na vinaka. Ni’u sa vinakata na vunau ni Kalou e na lomaqu dina: ia ka’u sa kunea e dua tani na vunau e na veitikiqu, a rau sa veivala kei na vunau sa tu e na lomaqu, a sa vakabobulataki au ki na vunau ni ca, o koya sa tiko e na veitikiqu.”​​—⁠Roma 7:​18, 19, 21-​23.

Na nona veivosa oqori na yapositolo o Paula, e sa voleka ni 2,000 na yabaki na dede ni gauna e volai tu mai kina, ia e vakamacalataka na vuna e dredre kina vei keda na tamata ivalavala ca meda cakava na ka e dodonu. Me rawa nida muria na ivakavuvuli dodonu, vakauasivi nida vakatovolei, ena gadrevi me tiko vei keda na kaukaua meda cakava rawa kina. E ka vakavuku gona meda tarogi keda, Na cava e bibi dina kina meda cakava na ka e dodonu?

Vakananuma mada na ka e kaya na iVolatabu me baleta na nona bula na tamata daucaka dodonu ena gauna sa bera mai. Eda wilika ena Same 37:​37, 38: “Vakasamataka na tamata yalododonu, ka raica na daucaka dodonu: ni sa kenai otioti ni tamata ko ya na vakacegu. Ia ko ira na dautalaidredre era na vakarusai vata: ka sa kedrai otioti na tamata ca me ra muduki laivi.” Na Vosa Vakaibalebale 2:​21, 22 e tukuna vei keda: “[E]ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura, kei ira na dautalaidredre era na cavu laivi maikina.”

Na veivosa ni iyalayala oqori kei na so tale e volai koto ena iVolatabu e dulaka vei keda na vuna meda saga kina ni muria na sala ena vakamarautaka na Kalou, ia oqori e sega ni vuna levu meda saga kina meda muria na sala oya. Ni vuna levu e sema tiko kei na dua na ile e vauci kece kina na ibulibuli vuku. Ena qai vakamacalataki ena ulutaga e tarava na cava na ile oqori, kei na sala eda vauci kina.