Na Vanua e Kune Dina Kina na Veidusimaki kei na iNuinui

O JIOVA e sega ni vakataki ira na timoni ni tawavakaiyalayala na nona vuku qai kaukaua duadua. E vatuka tale ga ni loloma o Jiova. (1 Joni 4:8) E dau vinaka vakaoti na nona ivakasala, e solia wale, qai kauaitaki keda dina. E duidui sara qori mai na nodra ivakasala na daurairai kei ira na dauvakacuru! E tukuna na Kalou: “Oi kemudou vakaaduaga sa viagunu, dou lako mai ki na wai; io ko koya sa sega vua nai lavo, dou lako mai, mai volia na kemudou, ka kania; io dou lako mai, mai volia, ka segai e nai lavo se nai voli, na waini kei na wai-ni-sucu. A cava dou sa volitaka kina na nomudoui lavo e na ka sa sega ni kakana; kei na nomudou cakacaka e na ka dou sa sega ni mamau kina? dou vakarorogo sara vei au, ka kania na ka sa yaga, ia na yalomudou ena qai marautaka na ka sa uro.”​—Aisea 55:​1, 2.

Ni vakavuna na Dauveibuli yalololoma na kena volai, e tukuni gona ena iVolatabu na veika totoka eda rawa ni nuitaka, na sala meda taqomaki kina vakayalo, me vakainaki kina na noda bula, kei na ivakavuvuli vinaka duadua meda muria. Vakacava mo vakasamataka mada na taro e toka ena imatau kei na kena ivakamacala vakaivolatabu.

[Kato ena tabana e 15]

● Au na kunea vakacava na lomavakacegu dina? E tukuna na iVolatabu: “Sa kaya vakaoqo ko Jiova, na nomui Vakabula, ko Koya na Yalosavasava ni Isireli; koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova. De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu.”​—Aisea 48:​17, 18.

● Ena yaco tiko ga na veika ca? “Ni ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura, kei ira na dautalaidredre era na cavu laivi maikina.” (Vosa Vakaibalebale 2:​21, 22) Io, era na vakarusai na tamata ivalavala ca kei ira na agilosi talaidredre me vaka ga era vakarusai ena bukawaqa.​—Vakatakila 20:​10, 14.

● Ena oti na tauvimate kei na rarawa ? “Raica! E sa tiko vei ira na tamata na vale ni Kalou, ena tiko vata kei ira o koya, era na nona tamata. Na Kalou sara ga ena tiko vata kei ira. Ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika [na leqa kece nikua] e dau yaco e liu.”​—Vakatakila 21:​3, 4.

Era dau lasu na timoni, ia na Kalou e sega ni dau lasu, e “sega ni lasu rawa.” (Taito 1:2) Ena vakamacalataki ena iotioti ni ulutaga veitaravi qo, ni ka dina e tukuna o Jiova e veisereki qai rawati kina na bula.​—Joni 8:​32; 17:3.