Na Turaga e Taleitaki Ira na Tamata kei na Bula

O DANIEL SYDLIK, e dua sa lewena dede tu mai na iLawalawa Dauvakatulewa ni iVakadinadina i Jiova, e vakaotia na nona veiqaravi e vuravura ena Tusiti, 18 Epereli, 2006, ni sa yabaki 87. E voleka ni 60 na yabaki na nona lewena voli na vuvale e Peceli mai Brooklyn, Niu Yoka.

O Brother Dan, me vaka era dau kacivi koya kina na kilai koya vinaka, e tekivu lewe i Peceli ena 1946. Ni bera na gauna oya e painia lavotaki voli mai Kalifonia, e curu tale ga e valeniveivesu ena iKarua ni iValu Levu baleta ni a tawaveitovaki. A tabaki na italanoa ni nona bula ena Watchtower, 1 June, 1985, ena ulutaga “How Priceless Your Friendship, O God!”

E kilai tani o Brother Sydlik ena nona sega ni dau vakacerecerei koya qai rawarawa tale ga na veivosaki kaya. Ni dau liutaka na sokalou vakavuvale e Peceli e veimataka, e vakilai levu na nona marautaka na bula ena nona dau kaya ena iucu ni nona vakamacala: “E totoka vakaoti na noda bula tu oqo nida qarava tiko na Kalou bula.” Ena gauna e dau vunau kina e dau uqeti ira na rogoci koya me tiko tale ga vei ira na rai oqori ena nona dau vosa ena veiulutaga vaka oqo, “Marau na Tamata e Nodra Kalou o Jiova,” “Vakaraitaka na Marau i Jiova,” “Vakacaudreva Tiko ga na Rarama ni Yalo ni Kalou,” kei na “E se Bera na Veika Vinaka Cake.”

O Brother Sydlik e vakamau kei Marina Hodson, mai Igiladi ena 1970. E vakamacalataki Marina “me ivukevuke e solia mai na Kalou.” Rau veiqaravi vata voli me sivia e 35 na yabaki.

E veiqaravi ena levu na tabana o Brother Sydlik ena veiyabaki e tiko kina e Peceli, okati kina na valenitabaivola kei na Tabana ni Volavola. E veiqaravi tale ga ena siteseni ni retio na WBBR. Ia, ena Noveba 1974, e lewe kina ni iLawalawa Dauvakatulewa qai veiqaravi ena Personnel kei na Writing committee.

E vakilai levu na nona lomani ira na tamata o Brother Sydlik ena sivia na 30 na yabaki e veiqaravi tiko kina ena Personnel Committee. E uqeti ira e lewe levu ena domona bi, ni dau vakamacalataka nida kalougata na qaravi Jiova ena gauna oqo. E dau vakabibitaka ni rawa ga nida marau dina kevaka e vinaka tiko na noda veiwekani kei Jiova qai veiraurau vinaka na noda vakayagataka na noda bula.

Ena mositi ira na lewe i Peceli na nona sa takali o Brother Sydlik, ia ena sega ni guilecavi na ivakaraitaki vinaka ni nona taleitaki ira na tamata kei na bula. Eda nuidei ni sa okati vata kei ira era tukuni ena Vakatakila 14:13 (VV): “Era sa kalougata ko ira era sa mate ni ra sa tu vata kei na Turaga, e na gauna oqo ka lako yani! Era sa kalougata dina! sa kaya na Yalo Tabu. Era sa vakacegu kina mai na nodra cakacaka, ka sa muri ira na nodra i valavala!”