Na Veisureti Raraba! — Watchtower LAIBRI ENA INTERNET

Na Veisureti Raraba!

NA VEISURETI raraba ina cava? Mo gade ina dua na valenivolavola ni tabana ni iVakadinadina i Jiova, e dau kilai ena yaca Peceli. E rauta ni 118 na vanua va qo e veiyasai vuravura. Era dau vakavinavinakataka mai vu ni lomadra na vulagi na ka era raica e Peceli.

Ni raica oti ga e dua na gonetagane e vuli Volatabu tiko na nodra cakacaka vakaukaua tiko e levu ena nodra marau nira qaravi Jiova ena valenivolavola ni tabana e Mexico, a taroga kina ena levu ni nona kurabui: “Na cava meu cakava meu tiko kina e ke?” A tukuni vua: “Na imatai ni ka, mo na papitaiso. Ni oti oya e vinaka mo veiqaravi vakapainia—e dua e solia vakatabakidua na nona gauna me kacivaka na itukutuku vinaka ni Matanitu ni Kalou.” A muria sara na gonetagane qo na ka e tukuni vua, ni oti e rua na yabaki e mani sureti me veiqaravi ena Peceli e Mexico, e sa veiqaravi tiko kina ena gauna qo me 20 na yabaki.

E Vanua Vakacava o Peceli?

Ena vosa vakaIperiu na vosa “Peceli” e kena ibalebale “Na Vale ni Kalou.” (Vkte. 28:19) E vuqa na valenivolavola ni tabana era tabaka ra qai vakauta na iVolatabu kei na ivola vakaivolatabu, era vakarautaka tale ga na veivuke vakayalo ina sivia na 100,000 na ivavakoso ni iVakadinadina i Jiova e vuravura raraba. E rauta ni le 20,000 era cakacaka tiko e Peceli—era tagane kei na yalewa e duidui na ivakatagedegede ni nodra bula kei na itovo vakavanua era cavutu mai kina—era soli ira vakatabakidua mera qaravi Jiova, kei ira na tacidra vakayalo. O ira na sa dede na nodra veiqaravi ena cakacaka vaKarisito qo, era veiqaravi vata tiko kei ira na itabagone gugumatua. Era dau marautaka na nodra veimaliwai kei ira na lewe ni ivavakoso ni iVakadinadina i Jiova e voleka vei ira ena veiyakavi kei na muanimacawa, nira soqoni ra qai cakacaka vakavunau vata vaKarisito. Era vakayagataka tale ga na nodra gauna galala ena vuli iVolatabu, ena ka ni veivakamarautaki, kei na nodra qarava eso tale na ka me baleti ira ga.

E dua sara na ilavo lailai era dau taura ena veivula na lewenivuvale e Peceli. Era kania na kakana vakatitiweli qai bulabula, savasava na nodra itikotiko, e veirauti vinaka tale ga na nodra rumu ni moce. E sega ni tara na Peceli me vaka eso na vale isau levu. Ia era tara ga me veiganiti vinaka. Era drukataka na vulagi ena kena qarauni vinaka na vale kei na lomanibai, na kena tuvanaki vakamatau kei na nodra yalovinaka qai laurai vei ira e Peceli na veitokoni. Era gumatuataka kece na nodra cakacaka, ra qai dau veikauaitaki. E sega e Peceli na veivakaduiduitaki vakamatatamata se me dua e cecere cake baleta na tabana e veiqaravi tiko kina. E bibi na tabana kece ni veiqaravi, na tabana ni sasamaki, samaki ni lomanibai, vakasaqa, se cakacaka ena vanua ni tabaivola se valenivolavola. O ira na veiqaravi tiko kina era kilai mera lewenivuvale e Peceli. Era cakacaka vata o ira qo me vaka e dua na timi nira tokona na cakacaka vakaitalatala ni iVakadinadina i Jiova.—Kolo. 3:23.

Kilai Ira Eso na Lewenivuvale e Peceli

Meda kilai ira mada vakavinaka eso vei ira qo, nira lewe ni dua ga na vuvale e vuravura raraba. Na cava e uqeti ira mera veiqaravi kina e Peceli? Raica mada na ivakaraitaki i Mario. Ena gauna e mai dua kina na iVakadinadina i Jiova, a cakacaka vinaka tu ena dua na kabani ni motoka rogo levu e Jamani, a rawa tale ga ni tosoi cake na nona itutu. Oti ga vakalailai na nona papitaiso, a bole me gole ena Peceli e tiko ena nona vanua. A cakacaka ena tabana ni tabaivola. E raica sara ga o Mario na duidui levu ena nona cakacaka kei ira e Peceli kei ira era cakacaka saumi. Mani nanuma sara me biuta na nona ivola kerekere ni cakacaka vakatabakidua e Peceli. Era sega ni kila rawa na wekana kei ira na cakacaka vata na nona vakatulewa, na gauna qo e marautaka tiko o Mario na nona veiqaravi ena Peceli e Jamani.

E levu era gole e Peceli era sega ni vuli vinaka sara se me dua na nodra kila vakacakacaka. E dina na tikina qo vei Abel e sa 15 na yabaki na nona veiqaravi tiko ena Peceli mai Mexico. E kaya, “e levu na ka au mai vulica e Peceli. Sa rawa vei au meu vakayagataka na misini vereverea ni tabaivola. A rawa sara ga niu rawa ilavo mai tuba ena ka au mai kila qo, ia au na sega ni marautaka na ka au mai marautaka e ke—na bula vakacegu, qai sega ni dua na ka me leqataki, sega tale ga na yalo ni veisisivi me vaka na vanua ni bisinisi. Au vakila niu mai rawata na vuli vinaka duadua, e vakavulica na noqu vakasama, e vakavulica tale ga meu dua na dauveiqaravi ni Kalou. Au na sega ni rawata na veika vakayalo qo ena univesiti vinaka duadua mada ga.”

E Rawa ni Veiuqeti na Nomu Sarasara

Na nomuni sarasara mada ga e Peceli e rawa ni yaga ena nomu veiwekani kei na Kalou. E dina qo vei Omar mai Mexico. A vakavulici koya o tinana ena iVolatabu. Ia mai muduka o Omar na nona lako ena soqoni vaKarisito kei na nona cakacaka vakavunau ni sa yabaki 17. Mani lai coko sara ena veika vakavuravura kei na bula ni domodomo iyau. E muri, ni cakacaka ena dua na kabani ni vakauitukutuku, a dua tale ga vei ira a gole ena Peceli e Mexico o Omar me matataka na kabani ena kena lai vakaraitaki na icakacaka ni dua na iyaya ni cakacaka. E kaya o Omar: “Ni keitou cakacaka oti, keitou qai vakasarasarataki. E uqeti au sara ga na ka au raica kei na noqu kauaitaki, au qai vakasamataka kina na noqu bula niu sa yawaki Jiova. Au tikora tale na soqoni qai vulica na iVolatabu. Au papitaiso sara ni oti ga e ono na vula na noqu gole i Peceli. Au vakavinavinaka vei Jiova niu uqeti ena noqu gole oya.”

E dua tale a susugi ena vuvale iVakadinadina o Masahiko mai Japani. A nanuma ni sa rui levu na vakatatabu ni dua e lotu vaKarisito. A vakaogai koya ena nona ka ni vuli qai muduka na nona tikora na soqoni kei na nona lako ena cakacaka vakavunau. E nanuma lesu o Masahiko: “Era a veinaki eso na itokani lotu vaKarisito kei ratou na neitou vuvale mera lai sarasara e Peceli. Ni ratou cikevi au na noqu vuvale, au mani gole tale ga kina. E uqeti au sara ga na noqu lai sarasara oya. Na marau au vakila niu veimaliwai kei ira na lotu vaKarisito ena ilakolako qo, au sega ni bau vakila niu tiko kei ira na noqu itokani era sega ni iVakadinadina. E qai levu cake ga na noqu taleitaka na ivakarau ni bula vaKarisito, au qai vakatulewataka tale ga meu vulica na iVolatabu.” Ena gauna qo sa cakacaka vakatabakidua o Masahiko ena nona ivavakoso.

E dua na iVakadinadina mai Varanise a toki me lai cakacaka e Moscow. Mani sega ni sotava e dua e qaravi Jiova, yaco sara me malumalumu vakayalo. Lai cakava sara eso na ka tawakilikili qai vakawatitaka sara e dua e sega ni iVakadinadina. A lai raici koya sara e dua na tacina lotu vaKarisito mai Varanise, rau qai lako vata me rau lai sarasara ena Peceli e Rusia e tiko mai St. Petersburg. E vola: “E tarai au sara ga na nodra veikauaitaki. Au vakila na vakacegu kei na yalo tabu i Jiova. E cala dina na noqu yawaka na isoqosoqo i Jiova. Ni oti ga na noqu sarasara e Peceli, au kerea na veivuke i Jiova, au vakadeitaka meu vakavulici rau na luvequ ena iVolatabu.” Me kuria na nona vukei na iVakadinadina qo ena gauna a malumalumu tu kina vakayalo, a vakauqeti sara ga vakalevu ena nona lai sarasara e Peceli, qai toso vinaka sara vakayalo.

Na cava era tukuna o ira na sega ni kilai ira vinaka na iVakadinadina i Jiova nira gole e Peceli? Ena 1988 a lai sarasara ena Peceli e Brazil o Alberto, e dua a dau vakaitavi vakalevu ena politiki. E uqeti koya na savasava, na kena tuvanaki vakamatau qai vakauasivi na kena sega ni caka lo na cakacaka. Ni bera na nona lai sarasara e Peceli, a lai sikova o Alberto na nodra vanua ni vuli na bete, e veiqaravi tiko kina vakabete o tavalena. E raica rawa o Alberto na kena duidui. “Na ka kece e caka ena loma ni vale ni vuli bete e dau caka lo,” e tukuna o Alberto. Ni oti ga vakalailai na nona sarasara e Peceli, a vuli iVolatabu sara, biuta na veika vakapolitiki, ena gauna qo sa dua tiko na qase ni ivavakoso.

Gade Mai Peceli!

E levu era dau saga vagumatua mera gade ina valenivolavola ni tabana ena nodra vanua. Me kena ivakaraitaki mai Brazil, e rau maroroi ilavo o Paulo kei Eugenia me va na yabaki me rawa kina ni rau lai raica na Peceli ena vanua oya. Ena taura tiko ni rua na siga na vodo basi ena 3,000 na kilomita. E rau kaya: “E bau yaga dina na neirau sasaga. Sa qai rabailevu na neirau rai me baleta na isoqosoqo i Jiova. Ni keirau dau vakamacalataka vei ira na vuli iVolatabu na cakacaka e caka tiko e Peceli, era dau taroga ena so na gauna, ‘Sa lesu mai kina?’ Ia qo keirau rawa ni kaya, io.”

E tiko beka e dua na valenivolavola ni tabana se Peceli ena nomu vanua se dua e volekati iko? Oni sureti moni mai sarasara. O na kidavaki qai levu na kena yaga vakayalo vei iko na nomu gade e Peceli.