“Na iMatai ni Veivakaturi”​—Sa Yaco Tiko!

“Ena qai tu cake taumada ko ira na mate era sa tu vata kei Karisito.”​—1 CESALONAIKA 4:16.

1, 2. (a) Na cava e nodra inuinui na sa mate? (b) Ena yavu cava o vakabauta kina na veivakaturi? (Raica na ivakamacala e ra.)

“NIRA sa kila ko ira sa bula ni ra na mate.” Oqo na vosa dina me tekivu sara mai na valavala ca i Atama. Sa dau kilai tu ga mai nida na mate kece, oya na vuna era taroga kina e levu: ‘Oti na mate, sa qai cava? Io, na cava na kedra ituvaki na mate?’ E sauma na iVolatabu: “Ko ira na mate era sa sega ni kila e dua na ka.”​—Dauvunau 9:5.

² E tiko beka nodra inuinui na mate? Io. Sa dodonu ga me vaka kina kevaka me vakayacori na inaki taumada ni Kalou me baleta na kawatamata. Ra dau vakabauta tu na tamata yalodina ni Kalou ena veitabagauna kece na yalayala i Jiova ni na dua na Kawa ena vakarusai Setani qai vakaotia na ca a vakavurea. (Vakatekivu 3:​15) Levu vei ira oqori era sa mate. Bibi gona mera vakaturi mera vakadinata kina na ka sa yalataka oya o Jiova kei na so tale na ka a cavuta. (Iperiu 11:13) Ia, ena bula rawa beka e dua sa mate? Io e rawa. E kaya o Paula “ni na tu cake tale ko ira na mate, ko ira na yalododonu kei ira na sega ni yalododonu.” (Cakacaka 24:15) Dua na gauna a vakaturi Utiko, e dua na cauravou a lutu mai na ikatolu ni tabavale, “ia ni sa laveti cake sa mate tu.” Oqo na iotioti ni veivakaturi mai na ciwa e cavuti ena iVolatabu.​—Cakacaka 20:​7-​12.a

3. E vakacegui iko vakacava na vosa i Jisu ena Joni 5:​28, 29? Ena vuku ni cava?

³ Na ciwa na veivakaturi oya e yavu ni noda vakabauta na vosa i Paula. Eda vakabauta deivaki tale ga kina na vosa i Jisu ni a kaya: “Sa lako mai na gauna era na rogoca kina na domona ko ira kecega e nai bulubulu, a ra na lako maikina.” (Joni 5:​28, 29) Sa bau vosa vakavureki dina! Ena vakacegui ira tale ga na vica vata na milioni sa takali na wekadra lomani!

4, 5. Na veivakaturi cava soti e cavuti ena iVolatabu ena veivosakitaki ena ulutaga oqo?

⁴ Levu ga era vakaturi era na bula e vuravura ni sa vakataudeitaka kina na bula vakacegu na Matanitu ni Kalou. (Same 37:​10, 11, 29; Aisea 11:​6-9; 35:​5, 6; 65:​21-​23) Ia ni se bera ni yaco oya, mera na vakaturi taumada e so. Kena imatai, ena gadrevi me vakaturi o Jisu Karisito me lai cabora nona isoro ena vukuda vua na Kalou. A mate qai vakaturi ena 33 S.K.

⁵ Oti oya, o ira “na Isireli ni Kalou” e dodonu mera lako i lomalagi mera lai duavata kina kei Jisu Karisito, ra qai “tiko vata kaya na Turaga ka sega ni mudu.” (Kalatia 6:​16; 1 Cesalonaika 4:​17) Oqo e vakatokai “na i matai ni tu cake tale [“na imatai ni veivakaturi,” NW] mai na mate.” (Vakatakila 20:​6, VV) Ni sa vakacavari na veivakaturi oqori, sa na qai kena gauna mera vakaturi na milioni vakamilioni e nodra inuinui na bula tawamudu ena Parataisi e vuravura. O koya gona, e dodonu meda kauai vakabibi ena veika e baleta “na imatai ni veivakaturi,” se da nuitaka na bula i lomalagi se na bula e vuravura. Na veivakaturi vakacava na imatai ni veivakaturi? E yaco ni naica?

“Mataqali Yago Vakacava Era na Taurivaka?”

6, 7. (a) Na cava me yaco mada ni se bera nira lako i lomalagi na lotu Vakarisito lumuti? (b) Era na vakaturi ena yago vakacava?

⁶ Taroga o Paula na taro oqo ena imatai ni nona ivola vei ira mai Korinica me baleta na imatai ni veivakaturi: “Era na vakaturi cake tale beka vakacava ko ira na mate? Na mataqali yago vakacava era na taurivaka?” Sa qai sauma: “Na sore ni kau ko kaburaka e na sega ni bula kevaka e sega mada ni mate . . . sa solia na Kalou na yagona, me vaka na nona lewa . . . Sa tu na lagilagi ni yago vakalomalagi, ka sa tu tale ga na lagilagi ni yago vakavuravura.”​—1 Korinica 15:​35-​40, VV.

⁷ E macala mai na vosa i Paula nira na mate mada na lotu Vakarisito era lumuti ena yalo tabu, oti ra qai taura nodra icovi mai lomalagi. Na yagodra e suka tale ina qele nira sa mate. (Vakatekivu 3:​19) Ena gauna sa lokuca na Kalou, era na vakaturi ena yago e ganita na bula i lomalagi. (1 Joni 3:​2) Solia tale ga vei ira na Kalou na bula e tawamate rawa. Oqori e sega ni ka era taukena mai na gauna era sucu kina. E kaya o Paula ni na “vakaisulu na yago mate oqo me kakua tale ni mate rawa.” Na isolisoli ni Kalou, na bula tawamate rawa, era na “vakaisulu” kina o ira kece era vakaivotavota ena imatai ni veivakaturi.​—1 Korinica 15:​50, 53, VV; Vakatekivu 2:7; 2 Korinica 5:​1, 2, 8.

8. Eda kila vakacava ni o Jiova e sega ni digitaki ira na 144,000 mai na duidui matalotu?

⁸ O ira ga na 144,000 era vakaivotavota ena imatai ni veivakaturi. Tekivu digitaki ira o Jiova mai na Penitiko 33 S.K. lako mai, ni oti toka ga nona vakaturi Jisu mai na mate. E volai kece ena ‘yadredra na yaca i Jisu kei na yaca i Tamana.’ (Vakatakila 14:​1, 3) Era sega gona ni digitaki mai na duidui matalotu. Era lotu Vakarisito kece, ra qai sakitaka na yaca i Tamadra o Jiova. Nira sa vakaturi, era na qai taura nodra ilesilesi i lomalagi. Sa dua na ka rekitaki dina vei ira nodra vakanamata mera veiqaravi sara ga ena mata ni Kalou.

Yaco ni Naica?

9. Eda kila vakacava mai na Vakatakila 12:7 kei na 17:14 na gauna e rairai tekivu kina na imatai ni veivakaturi?

⁹ Tekivu ni naica na imatai ni veivakaturi? Sa tu na ivakadinadina matata ni yaco sara tiko ga edaidai. Veidutaitaka mada na rua na wase oqo ni Vakatakila. Kena imatai raica na Vakatakila wase 12. E tukuni e keri ni se qai vakatikori ga vakatui o Jisu Karisito, oti sa qai liutaki ira nona agilosi mera valuti Setani kei na nona timoni. (Vakatakila 12:​7-9) Sa dau cavuti ena ivoladraudrau oqo ni tekivu na ivalu oya ena 1914.b E dua na ka eda raica ena wase 12 ni Vakatakila ni sega vakadua nira cavuti kei Jisu na lotu Vakarisito lumuti nira vala vata tiko kei koya mai lomalagi. Ia raica mada na wase 17 ni Vakatakila. Eda wilika kina ni na vaqeavutaka na veimatanitu na Lami ni sa rusa oti o “Papiloni na Ka Levu.” E kaya tale ga nira ‘tiko vata kaya na Lami, o ira era sa kacivi, era digitaki, era lomadina.’ (Vakatakila 17:​5, 14) Kena ibalebale ga oqo nira sa na vakaturi o ira ‘sa kacivi, era digitaki, era lomadina’ me rawa kina nira veitokoni kei Jisu ena kena vakarusai vakadua na vuravura i Setani. Koya gona, e kena irairai nira vakaturi ena maliwa ni 1914 kei na Amaketoni o ira na lumuti era mate ni bera na Amaketoni.

10, 11. (a) O cei o ira na 24 na qase, na cava e vakatakila vei Joni e dua vei ira? (b) Na cava e rairai dusia oqo?

¹⁰ Vakaevei, e rawa nida kila sara ga na tikinigauna e tekivu kina na imatai ni veivakaturi? Dua na ivakatakilakila e kune ena Vakatakila 7:​9-​15, e sereka e keri o Joni nona raivotu me baleta na ‘isoqosoqo levu e sega ni dua e wilika rawa.’ Mai kila o Joni na veika e baleta na isoqosoqo levu baleta ni tukuna vua e dua vei ira na 24 na qase, ia o ira na 24 na qase oya era vakatayaloyalotaki ira na 144,000 era na veitomani kei Karisito ena nona iukuuku lagilagi vakalomalagi.c (Luke 22:​28-​30; Vakatakila 4:4) O Joni mada ga e nona inuinui na bula i lomalagi; ia ena gauna a vosa kina vua na qase oya, a se bula voli ga vakatamata e vuravura. O koya gona, ena raivotu oqo, kena irairai ni o Joni e vakatayaloyalotaki ira na lumuti e vuravura era se bera ni taura nodra icovi ni bula vakalomalagi.

¹¹ Na nona vakatakila vei Joni e dua vei ira na 24 na qase na veika e baleta na isoqosoqo levu, e dusia na cava? E rairai dusia nira dau vakaitavi ena kena vakasavui mai na itukutuku dina vakalou o ira na 24 na qase, se o ira na lumuti era sa vakaturi era wili tiko ena ilawalawa oqori. Na cava e bibi kina oya? Na vuna ni a vakatakilai vei ira na italai lumuti ni Kalou ena 1935 na kedra itukutuku dina na isoqosoqo levu. Ke a vakayagataki gona e dua vei ira na 24 na qase me vakasavuya na itukutuku bibi oya, sa na kena ibalebale ga, me qai yacova yani na 1935, sa na vakaturi oti o koya i lomalagi. E dusia oqori ni yaco na imatai ni veivakaturi ena lomaloma ni 1914 kei na 1935. Ia e rawa beka ni dua na tikinigauna e matata sara?

12. Vakamacalataka na vuna e rawa ni okati kina na vulaitubutubu ni 1918 me gauna e rairai tekivu kina na imatai ni veivakaturi.

¹² Ena rairai veiganiti meda dikeva mada e dua na itukutuku ena iVolatabu erau via lakolako vata. A lumuti o Jisu Karisito ena vulaibotabota ni 29 S.K. me na qai Tui ni Matanitu ni Kalou. Tolu veimama na yabaki e muri, ena vulaitubutubu ni 33 S.K., sa vakaturi mai na mate me dua na ibulibuli vakayalo kaukaua. Me vaka ni vakatikori vakatui o Jisu ena vulaibotabota ni 1914, rawa beka nida kaya nira sa qai tekivu vakaturi nona imuri lumuti yalodina ni oti e tolu veimama na yabaki, oya ena vulaitubutubu ni 1918? Tikina vinaka me vakasamataki oqo. Ena sega beka ni volai sara ga ena iVolatabu, ia e sega tale ga ni veicalati kei na vo ni tikinivolatabu era dusia ni tekivu na imatai ni veivakaturi ni tekivu oti ga na tiko tawarairai i Karisito.

13. Eda kila vakacava mai na 1 Cesalonaika 4:​15-​17 ni rairai yaco na imatai ni veivakaturi ni se qai tekivu tiko tawarairai ga na Karisito?

¹³ Kena ivakaraitaki e vola o Paula: “Ni da na sega ni liu vei ira era sa moce tu koi keda eda sa bula tiko me yacova na nona lako tale mai [“nona tiko,” NW] na Turaga [sega ni yacova na itinitini ni nona tiko tawarairai]. Ni na lako sobu mai lomalagi ko koya na Turaga e na kaila, kei na domo ni agilose turaga, kei na davui ni Kalou: ena qai tu cake taumada ko ira na mate era sa tu vata kei Karisito: emuri koi keda, eda sa bula tikoga, eda na kau cake vata kei ira e na o, me da veitata kei na Turaga e na macawa: ia ena vakakina eda na qai tiko vata kaya na Turaga ka sega ni mudu.” (1 Cesalonaika 4:​15-​17) Koya gona, o ira na lotu Vakarisito era mate ni se bera na tiko tawarairai i Karisito era a vakaturi taumada i lomalagi, qai muri o ira na bula donuya nona tiko tawarairai. Kena ibalebale, a yaco na imatai ni veivakaturi ni se qai tekivu ga nona tiko tawarairai na Karisito, oti sa qai yaco yarayara voli “donuya nona tiko.” (1 Korinica 15:​23, NW) E sega ni yaco vata kece ga ena dua na gauna na imatai ni veivakaturi, e yaco tiko ena loma ni dua na itabagauna.

“Soli Vei Ira Yadua Nai Sulu Vulavula”

14. (a) Ni naica era vakayacori kina na raivotu era volai ena Vakatakila wase 6? (b) Na ka e volai ena Vakatakila 6:​9 e vakatayaloyalotaka na cava?

¹⁴ Dikeva oqo e dua tale na ivakadinadina e kune ena Vakatakila wase 6. E tukuni e kea nona vodo vakatui o Jisu qai ravuravu ena qaqa. (Vakatakila 6:2) Sega ni tukuni rawa na levu ni veivaluvaluti e yaco tu e vuravura. (Vakatakila 6:4) Tatara vakalevu na dausiga. (Vakatakila 6:​5, 6) Vakaleqa na kawatamata na mate ca. (Vakatakila 6:8) Na ka kece sa parofisaitaki mai oqo e sota donu kei na veika e yaco tu e vuravura me tekivu sara mai na 1914. Ia e yaco e dua tale na ka. E vagolei noda rai ina dua na icabocabonisoro. Ena rukuna, e tiko kina “na yalodra era a vakamatei e na vuku ni vosa ni Kalou, kei na vuku ni nodrai tukutuku.” (Vakatakila 6:9) “Ni sa kena bula ni yago na dra,” na yalo gona e tukuni ni tiko ena ruku ni icabocabonisoro e vakatayaloyalotaka na kedra dra na italai yalodina i Jisu era vakamatei baleta ga nira vunau ena gumatua kei na yalodoudou.​—Vunau ni Soro 17:11.

15, 16. Vakamacalataka se cava e dusia kina na imatai ni veivakaturi na veivosa e kune ena Vakatakila 6:​10, 11.

¹⁵ Na kedra dra na lotu Vakarisito yalodina era vakamatei oya era tagica tiko, me vaka ga na dra i Epeli, me tau ena vukudra na lewadodonu. (Vakatekivu 4:​10) “Era sa kaci ena domo levu, ka kaya, sa vakaevei na kena dede, na Turaga yalododonu ka dina, ni ko sa sega ni lewa ka cudruvaka na neimami dra vei ira era sa tiko e vuravura.” Na cava sa qai yaco? “Sa soli vei ira yadua nai sulu vulavula; a sa kainaki vei ira, me ra cegu tiko mada vakalailai, me oti mada mai ko ira na nodrai tokani kei na wekadra, era na vakamatei mada me vakataki ira.”​—Vakatakila 6:​10, 11.

¹⁶ A soli beka na isulu vulavula oqo ina tobutobu lalai ni dra era tu ena ruku ni icabocabonisoro? Sega! A soli ga na isulu vulavula vei ira na tamata a vakadavei vakaivakatakarakara na kedra dra ena icabocabonisoro. Era bolea na mate ena yaca i Jisu, ia era sa vakaturi ina bula vakayalo. Eda kila vakacava? Eda a wilika taumada ena Vakatakila na tikina oqo: “O koya sa gumatua, ena vakaisulu e nai sulu vulavula; au na sega ni bokoca na yacana mai nai vola ni bula.” A tukuni tale ga ni o ira na 24 na qase era ‘vakaisulu ena isulu vulavula, qai vakaisala na uludra ena isala koula.’ (Vakatakila 3:5; 4:4) Koya gona, ni sa tekivu yacoyaco e vuravura na ivalu, dausiga, kei na mate ca, era vakaturi sara mera lai bula i lomalagi o ira na wili ena 144,000 era sa mate, ra qai vakaisulutaki ena isulu vulavula vakaivakatakarakara. O ira gona oya e vakatayaloyalotaki ira na dra e kune ena ruku ni icabocabonisoro.

17. Na cava na kena ibalebale ni tukuni mera “cegu tiko mada” o ira na taura na isulu vulavula?

¹⁷ O ira na vakaturi vou oya era na lai “cegu tiko mada.” Era cegu tiko mera waraka na siga ni veisausaumi ni Kalou. E se vo mera vakadinadinataka nodra yalodina na “nodra itokani,” oya o ira na lotu Vakarisito lumuti era se bula e vuravura. Sa na qai oti nodra “cegu” ni sa kena gauna me tauca kina nona lewa na Kalou. (Vakatakila 7:3) Ena gauna oya, o ira na vakaturi era na vakaitavi vata kei na Turaga o Jisu Karisito mera vakarusai na tamata ca, wili kina o ira na vakamatei ira na lotu Vakarisito.​—2 Cesalonaika 1:​7-​10.

Na Kena iBalebale Vei Keda

18, 19. (a) Na yavu cava soti o na kaya kina ni sa yaco tiko na imatai ni veivakaturi? (b) E vakacava na lomamu ni sa mai matata oqo vei iko na imatai ni veivakaturi?

¹⁸ E sega ni tukuna na Vosa ni Kalou na tikinisiga sara ga ena yaco kina na imatai ni veivakaturi, e vakatakila ga ni na taura toka e dua na gauna, donuya nona tiko tawarairai na Karisito. O ira na lotu Vakarisito lumuti era mate ni se bera na tiko i Karisito era na vakaturi e liu. Ia o ira na lotu Vakarisito lumuti era mate donuya na itabagauna e tiko tawarairai kina na Karisito, ena “vaka na sauriva ni mata” nodra vakaturi mera dua na ibulibuli kaukaua vakayalo. (1 Korinica 15:​52, VV) Era na taura beka nodra icovi vakalomalagi o ira kece na lumuti ni se bera na ivalu ni Amaketoni? Eda sega ni kila oqori. Na ka ga eda kila nira sa na lai tu mai ena Ulu i Saioni vakalomalagi o ira kece na 144,000 ena gauna lokuci ni Kalou.

¹⁹ Eda kila tale ga ni dua na iwase levu ni 144,000 era sa tiko vata kei Karisito mai lomalagi. Vica wale ga era se vo e vuravura. Oqo e dua na ivakadinadina levu ni sa totolo sara tiko mai na siga me vakataulewa kina na Kalou! Sega ni dede, sa na vakarusai na vuravura e lewa tu o Setani. Oti, ena bala yani ina qara sega ni vakabotona o koya. Sa na qai tekivu e vuravura na veivakaturi. Era na vakaturi na tamata yalodina ena yavu ni isoro ni veivoli i Jisu, ra qai vukei mera yacova na bula uasivi vakatamata a tu taumada kina o Atama. Totoka dina na kena sa vakayacori tiko oqo na parofisai i Jiova e volai ena Vakatekivu 3:​15. Sa bau ka dokai dina meda bula tu ena itabagauna oqo!

[iVakamacala e ra]

Vakamacalataka Mada

Tukuna mada se da kila vakacava mai na veitikinivolatabu oqo na gauna e yaco kina “na imatai ni veivakaturi.”

• Vakatakila 12:7; 17:14

• Vakatakila 7:​13, 14

• 1 Korinica 15:​23, NW; 1 Cesalonaika 4:​15-​17

• Vakatakila 6:​2, 9-11

[iYaloyalo ena tabana e 26]

O cei era vakaturi taumada ni se bera ni yaco na veivakaturi vei ira na bula e vuravura?

[iYaloyalo ena tabana e 29]

E soli vakacava vei ira e so era sa mate na isulu vulavula?