Raica! e Veivakurabuitaki na Rarama!

E DAU vakatuburarawa na vakayayamo ena butobuto. Dua gona na marau levu ni o raica na rarama! De o a tu beka ena dua na ituvaki e vaka ga o vakayayamo voli ena butobuto. A rawa ni yaco oqo ke o a sega ni walia rawa e dua na nomu leqa. Ia, ni o dabe qai vakasamataka vakamalua ni tiko na kena iwali​—e rawa ni tukuni ni tauvata sara ga kei na nomu raica na rarama. Io, e talei dina na noda curu mai na dua na vanua butobuto meda raica na rarama.

Ena imatai ni senitiuri era a butobuto tu vakayalo e levu na tamata. Ni vosa vei ira na sa biuta na nodra lotu makawa mera lotu Vakarisito, e volavola kina na yapositolo o Pita: “[Na Kalou a] . . . kacivi kemudou mai na butobuto ki nona rarama e veivakurabuitaki.” (1 Pita 2:9) Vei ira oqori, e vaka ga nira lako tani mai na butobuto loaloa ra qai basika yani ena rarama. Ena via vaka tale ga kei na noda tu duadua qai sega na noda inuinui, ia ni oti oqori eda lai lewena e dua na vuvale, eda sa lai nuidei sara.​—Efeso 2:​1, 12.

“Ko sa Biuta na Nomu Loloma ka Tu Vei Iko Eliu”

Era kunea na lotu Vakarisito taumada “na ka dina”​—na vakabauta dina vakarisito. (Joni 18:37) Era raica na rarama veivakurabuitaki ni ka dina, ra qai biuta mai na butobuto vakayalo mera gole ina vanua e serau kina na rarama. Ia, ni toso na gauna, sa yaco me batabata na lomakatakata a tu e liu vei ira e so na lotu Vakarisito. Ni qai cava na imatai ni senitiuri, me kena ivakaraitaki mada, e dua na leqa levu sa kune ena ivavakoso e Efeso. A vakavotuya o Jisu Karisito ni vakaturi oti mai na mate, ena nona kaya: “[Sa] so ga na ka ko sa ca kina, e na vuku ni ko sa biuta na nomu loloma ka tu vei iko eliu. Mo nanuma ga na ka ko sa lutu tani maikina; ia mo veivutuni, ka cakava na cakacaka taumada.” (Vakatakila 2:​4, 5) Io, e gadrevi vei ira na lotu Vakarisito mai Efeso mera vakabulabulataka tale na nodra lomana na Kalou kei na ka dina.

Vakacava o keda? Eda sa vakila tale ga na vinaka ni noda raica na rarama, nida mai kila na totoka ni ka dina ena iVolatabu. Io, eda sa mai taleitaka na ka dina. Ia, na veika dredre e dau tarai keda na tamata ena rawa ni seavu kina na noda taleitaka na ka dina. Me sa qai kuria ga na leqa vovou e sotavi ena “iotioti ni veisiga” oqo. Eda sa bula tu ena vuravura e vakatakilakilataka na “gauna cacamatua”​—na vuravura era tawana na tamata era ‘lomani ira ga, era dauvinakata na ilavo, era daubole, era viavialevu, era dauvosavakacaca, era talaidredre vei ira na nodra qase, era na sega ni vakavinavinaka, era na sega ni yalosavasava.’ (2 Timoci 3:​1, NW, 2) Na nodra veivakamuai ena rawa ni vakayalia na noda gugumatua qai vakavuna me batabata na noda lomani Jiova.

Ke sa yali na loloma a tiko taumada vei keda, e dodonu meda ‘nanuma na ka eda sa lutu tani mai kina, meda veivutuni.’ Meda lesu tale ena keda ituvaki vakayalo eda a tu kina e liu. Kuria oya, sa dodonu meda na qaqarauni sara, me kua ni seavu na noda taleitaka na ka dina. Sa bibi gona vei keda kece me donu na noda rai, me tiko vei keda na yalo ni vakanuinui, qai dei tiko ga na ramase ni ka dina e lomada kei na noda lomana na Kalou!

‘E Sereki Keda na Ka Dina’

E veivakurabuitaki na ramase ni ka dina ena iVolatabu baleta ni sauma e so na taro bibi e vakavu veilecayaki vei ira na kawatamata ena dua na gauna balavu sara. Era okati ena veitaro oqo: Na cava eda bula tu kina e vuravura? Na cava na inaki ni bula? Na cava e se yaco tiko ga kina na ka ca? E bula tale tiko beka e dua na ka ni sa mate na tamata? Ia, o Jiova sa vakararamataki keda ena vuqa na ivakavuvuli totoka vakaivolatabu. E sega li ni dodonu meda ciqoma mai vu ni lomada? Meda kua mada ga ni vakawalena na veika eda sa vulica!

O Jisu a tukuna vei ratou na nona tisaipeli: “Dou na kila na ka dina, ia na ka dina ena sereki kemudou.” (Joni 8:​32) E sereki keda mai na ivalavala ca kei na mate na isoro ni veivoli i Jisu. Ia, e sereki keda tale ga na ka dina talei oqo mai na lecaika kei na veilecayaki ni vuravura e solega tu na butobuto. Nida vakananuma vakatitobu na veika eda vulica, ena vukei keda meda vaqaqacotaka na noda lomani Jiova kei na nona Vosa.

E vola na yapositolo o Paula vei ira na lotu Vakarisito e Cesalonaika: “Ni dou a vakabauta na vosa ni Kalou dou a rogoca maivei keitou dou sa sega ni vakabauta me vaka e vosa ni tamata, me vaka ga na kena dina, na vosa ni Kalou, oqori sa cakacaka yaco talega vei kemudou sa vakabauta.” (1 Cesalonaika 2:​13) Era rogoca na kai Cesalonaika “na i tukutuku [ni Kalou]” ra qai “vakabauta . . . e na reki.” Sa sega tale nira tiko “e na butobuto.” Ia, era sa “gone ni siga.” (1 Cesalonaika 1:​4-7, VV; 5:​4, 5) Era mai vulica na lotu Vakarisito oqo ni o Jiova na Dauveibuli, e kaukaua duadua, vuku, dauloloma qai dauveivosoti. Me vakataki ira ga e so tale na imuri i Karisito, era vulica ni vakarautaka o Jiova na sala me bokoci kina na nodra ivalavala ca ena vuku ni isoro ni veivoli i Luvena, o Jisu Karisito.​—Cakacaka 3:​19-21.

E dina ga ni a se sega ni taucoko na nodra kila na ka dina, ia era kila deivaki na vanua mera vakasaqaqara kina. Oya na iVolatabu e uqeti vakalou, e rawa ni vakavuna vua na tamata ni Kalou “me vakarau tu, ni sa vakarautaki ki nai valavala vinaka kecega.” (2 Timoci 3:​16, 17) Era rawa ni tomana tiko ga na nodra vuli na lotu Vakarisito mai Cesalonaika mera vakila tiko ga kina na totoka ni rarama e taka mai vua na Kalou. A tiko gona na vuna vinaka mera reki tiko ga kina. (1 Cesalonaika 5:​16) E vaka tale ga kina o keda.

Rarama ina Noda Sala

Ni vakamacalataka na vuna e vakasakiti kina na rarama, e lagata na daunisame: “A nomuni vosa na cina ki na yavaqu, kei na rarama ki na noqu sala.” (Same 119:105) Noda dusimaki ena Vosa ni Kalou ena vukea me muadonu tiko kina na noda kosi qai vakainaki na noda bula. Meda kua ni vaka e dua na waqa e sa ciri tu. Nida kila da qai bulataka na ka dina ena taqomaki keda meda kua ni “veikauyaki e na ua kei na cagi kece ga ni veivakavuvuli.”​—Efeso 4:​14, VV.

“Dou kakua ni vakararavi vei ira na turaga, se vua na luve ni tamata, ni sa sega vua na ka mo dou bula kina,” e kaya na iVolatabu. E kaya tale ga: “Sa kalougata ko koya sa nonai vukevuke na Kalou i Jekope, o koya sa nuinui tiko vua na nona Kalou ko Jiova.” (Same 146:​3, 5) O koya gona, na noda nuitaki Jiova ena vukei keda meda kua ni rere se da lomaocaoca. E vola na yapositolo o Paula: “Dou kakua sara ni lomaocaoca; ia e na ka kecega me vakatakilai vua na Kalou na nomudou kerekere e na masu kei na dau cikecike kei na vakavinavinaka. Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.” (Filipai 4:​6, 7) E yaga dina nida dusimaki ena rarama ni Vosa ni Kalou.

Vakacila Rarama e Vuravura

E dua tale na vuna e totoka kina na rarama ni Vosa ni Kalou baleta ni dolava na katuba ina itavi uasivi duadua vua na tamata kece. O Jisu e vakaroti ratou na nona imuri: “Dou lako yani ka qisi ira me ra noqu tisaipeli na lewe ni veivanua kece ga, ka papitaisotaki ira e na yaca ni Tamamudou kei na Luvena kei na Yalo Tabu; vakavulici ira me ra muria na veika kece ga au sa vakarota tu vei kemudou, ka mo dou kila, au sa tiko vata kei kemudou e na veisiga kece ga me yacova na i vakataotioti kei vuravura.” Ia, a kaya taumada: “Sa soli mai vei au na lewa kece ga mai lomalagi kei vuravura.”​—Maciu 28:​18-​20, VV.

Vakasamataka mada o koya e tokoni ira tiko na lotu Vakarisito dina ena kacivaki ni itukutuku vinaka, kei na nodra vakavulica na ka dina mai na iVolatabu vei ira na tamata ena veivanua kece ga. A yalataka o Jisu ni na tiko vata kei ira na nona imuri. Io, e vukei ira dina qai tokoni ira ena nodra cakacaka vakaitalatala, ni oya e dua na sala era ‘vakacila rarama’ tiko kina, me ikuri ni nodra vakayacora e so tale na “cakacaka vinaka.” (Maciu 5:​14-​16, VV) Era okati tale ga ena cakacaka vakaitalatala o ira na agilosi. (Vakatakila 14:6) Qai vakacava ga o Jiova? Na yapositolo o Paula e vola: “Au sa tea koi au, sa vakasuasuataka ko Apolosa; ia na Kalou ga sa vakatubura.” Sa itavi dokai dina meda maliwai ira na tamata era “daucakacaka vata kei koya na Kalou”!​—1 Korinica 3:​6, 9.

Vakasamataka tale ga na sala e vakalougatataki kina na noda oga ena noda colata na itavi lesi vakalou oqo. E sega ni dua na ka e vakatauvatani rawa kei na itavi e lesia vei keda na Kalou, oya meda “cila e na kedra maliwa” na tamata “me vaka na veicina e vuravura.” Na noda vakacila na rarama ni Vosa ni Kalou ena noda vosa kei na noda ivalavala, eda na rawa ni vukei ira kina na tamata lomavinaka. (Filipai 2:​15) Eda rawa ni reki nida gumatua ena vunau kei na noda veivakavulici ni ‘sa sega ni tawadodonu na Kalou me guilecava na noda cakacaka, kei na loloma eda a vakatakila ina yacana.’​—Iperiu 6:​10.

‘Volia na iSuinimata me Sui Kina na Matamu’

Ena dua na nona itukutuku ina ivavakoso mai Leotisea ena imatai ni senitiuri, e kaya o Jisu: “Volia vei au . . . na i sui ni mata, me sui kina na matamu, mo rai rawa kina. Au sa cudruvi ira ka vakanakuitataki ira ka’u sa lomana.” (Vakatakila 3:​18, 19, VV) Na iwali ga ni mataboko vakayalo na “i sui ni mata”​—oqori na nona ivakavuvuli kei na nona veivunauci o Jisu. Ke da vinakata meda bulabula tiko ga vakayalo, sa dodonu meda ciqoma na nona veivakasalataki da qai vakamalumalumutaki keda kina kei na veidusimaki kece e kunei ena iVolatabu. Sa dodonu tale ga meda vakasama vakataki Karisito da qai vakadamurimuri koya. (Filipai 2:5; 1 Pita 2:​21) Ia, e sega ni soli wale na isuinimata. O Jisu e kaya: “Volia vei au.” Na kena isau e vauci kina na noda gauna kei na noda igu.

Nida biubiu mai ena vanua buto meda basika yani ena rumu e rarama tu, ena taura na gauna me qai matau e matada. E vaka tale ga oya na kena taura na gauna na vulici ni Vosa ni Kalou da qai raica na rarama ni ka dina. E taura tale ga na gauna na noda na vakasamataka vakatitobu na ka eda vulica, meda qai vakananuma na talei ni ka dina. Ia, se mani cava e vauci ena kena isau, se lailai tiko ga na ka e namaki vei keda. Na vuna? Baleta ni veivakurabuitaki na rarama!

[iYaloyalo ena tabana e 14]

“Volia vei au . . . na i sui ni mata, me sui kina na matamu, mo rai rawa kina”