Taro na Dauwiliwili

Na cava e vakaibalebaletaka o Paula ena 1 Timoci 5:9 me baleta na ivakatagedegede ni dua na yada me rawa ni qai vukei kina ena ivavakoso vakarisito?

Ena vosa vaKirisi taumada, na tikinivolatabu oqo e vakadewataki ena iVolatabu vakaViti me yada “sa vakawati vakadua ga” e kena ibalebale ga “na yalewa e duabau nona tagane.” Me vaka a tukuna tiko na yapositolo o Paula na veika e baleta e dua na yada, na matavosa “yalewa e duabau nona tagane” e rairai vakaibalebaletaki tiko ina kena ituvaki na marama oya ni se bera ni yada. E ibalebale beka ni vosa taumada oya ni a vakawati vakadua ga na yada, me vaka e tukuni ena iVolatabu vakaViti kei na so tale na ivakadewa ni iVolatabu? Se duatani tale beka na ka e vakaibalebaletaka tiko o Paula?a

E so era kaya ni a vosa tiko o Paula me baleti ira na yada era a vakawati ga vakadua. Ena levu gona na itovo vakavanua kei na bula vakaitikotiko era dau raici mera yalododonu na yada era sega ni vakawati tale. Ia na rai vaka oqori e sa na sega ni salavata kei na so tale na ivola a vola o Paula. Kena ivakaraitaki, ena nona ivola vei ira na lotu Vakarisito mai Korinica e vakamatatataka kina na nona nanuma ni dua e yada voli ga ena marau vakalevu, ia e tu tale ga vua na galala “me vakawati tale kei na tagane sa vinakata ko koya; ka me ia ga kei koya sa nona na Turaga.” (1 Korinica 7:​39, 40; Roma 7:​2, 3) Kuria oqori ena nona ivola vei Timoci, e kaya o Paula: “Ka’u sa vinakata kina me ra vakawati ko ira na yada era tamata bula.” (1 Timoci 5:​14) O koya gona ke sa vinakata e dua na yada me vakawati tale, me kua ni vakalewai.

Ia, na cava sara mada na ibalebale ni veivosa a vola o Paula vei Timoci? Na matavosa “vakawati vakadua ga” e kune ga ena tikinivolatabu oqo. E vakavure vakasama dina, ni matavosa oqo e tautauvata kei na dua tale na matavosa a vakayagataka vakavica o Paula ena nona ivola, oya na tagane “me dua bauga na watina” se “me duabau nona yalewa” ena vosa vaKirisi. (1 Timoci 3:​2, 12; Taito 1:​6, VV) A vakayagataka o Paula na matavosa “dua bauga na watina” ena nona vola na ivakatagedegede e gadrevi vei ira na ivakatawa kei na dauveiqaravi ni ivavakoso lotu Vakarisito. Na vakasama oya e vakaibalebale sara tiko ga vei ira era colaitavi ena ivavakoso vakarisito, na tagane, ke vakawati, e dodonu me yalodina vei kena isa qai sega ni beitaki ena ivalavala tawakilikili.b Ke sa vaka oqori, e sa na vakatale ga kina na ibalebale ni matavosa ena 1 Timoci 5:9: Me rawa ni vukei ena veika vakayago ena ivavakoso e dua na yada, e dodonu me yalewa vakawati a yalodina voli ga vei watina ena gauna se bula tiko kina me qai kua ni beitaki ena ivalavala tawakilikili. E tukuna o Paula e so tale na ivakatagedegede ena gadrevi vua na yada vaka oya.​—1 Timoci 5:​10.

[iVakamacala e ra]