Vakavulica na Luvemu

Tu Vakarau me Veiqaravi o Timoci

“O SA vakarau?” Sa bau tarogi iko e dua ena taro ya?​— Io, e via kila ke o sa tu vakarau mo cakava e dua na ka. Kena ivakaraitaki, de ibalebale ni nona taro: ‘Sa tiko na nomu ivola ni vuli? O sa wilika mai na ka ena vulici?’ Eda na veivosakitaka qo na nona tu vakarau o Timoci me veiqaravi.

Sega ni dau tu suka o Timoci. O kila na cava e vakaibalebaletaka ya?​— Ni sureti me qarava na Kalou, a tiko tale ga vua na nona rai na dauveiqaravi ni Kalou a kaya: “Koi au oqo; mo ni talai au.” (Aisea 6:8) A marautaka nona bula o Timoci ni a tu vakarau me veiqaravi. O via rogoca na kena italanoa?​—

A sucu o Timoci e Lisitira, vica na drau na maile mai Jerusalemi. Rau dau qacoya na vuli iVolatabu na buna o Loi kei Unaisi na tinana. Rau tekivu vakavulici Timoci tale ga ena Vosa ni Kalou ni se gonedramidrami.​—2 Timoci 1:5; 3:​15.

De dua a se itabagone voli ga o Timoci ena gauna a gole yani kina i Lisitira o Paula ena imatai ni nona ilakolako balavu vaka daukaulotu qai tomani koya voli o Panapasa. Kena irairai ni donuya na gauna qo, rau sa lotu vaKarisito o Loi kei Unaisi. O via kila na veika dredre rau sotava o Paula kei Panapasa?​— Era vakaviriki Paula ena vatu o ira na sega ni taleitaki ira na lotu vaKarisito, ra vakabalei koya qai yarataki koya ina ibili ni koro. Era nanuma ni sa mate.

Ia a tucake o Paula nira wavoliti koya o ira na vakabauta na ka e vakavuvulitaka. Rau biubiu mai Lisitira o Paula kei Panapasa ena siga tarava, ia sega ni dede rau lesu tale e kea. A tukuna vei ira na tisaipeli o Paula ena nona ivunau: “Sa kilikili me vuqa na ka rarawa eda sa curu kina ki na matanitu ni Kalou.” (Cakacaka 14:​8-​22) O kila na cava e vakaibalebaletaka o Paula?​— Tukuna o koya nira na vakararawataki o ira na qarava na Kalou. A qai vola e muri o Paula vei Timoci: ‘O ira kece era via bula ena bula vaKarisito era na vakacacani.’​—2 Timoci 3:​12, VV; Joni 15:20.

Rau lesu i nodrau vanua o Paula kei Panapasa ni rau biubiu mai Lisitira. Oti e vica na vula, rau lesu tale o Paula kei Sailasa mera lai vakayaloqaqataki na tisaipeli vou ena vanua a sikova o Paula. Sa wacava na marau i Timoci ni raici Paula kei Sailasa ni rau yaco yani i Lisitira! A marau vakalevu o Timoci ni sureti me tomani Paula kei Sailasa. Sega ni vakasuka o Timoci na veisureti, a tu vakarau ga me gole.​—Cakacaka 15:40–16:​5.

Ratou taubale me vica na maile, ratou qai vodo waqa. Ni ratou yaco i vanua, ratou taubale sara i Cesalonaika e Kirisi. Levu e kea era tavuki mera lotu vaKarisito. Ia e so tale era cudru qai via vakavuca. A rivarivabitaki nodratou bula o Paula, Sailasa, kei Timoci, ratou mani gole i Peria.​—Cakacaka 17:​1-​10.

Ia a leqataki ira na tisaipeli vou mai Cesalonaika o Paula, mani talai Timoci e kea. O kila na vuna?​— A qai tukuna o Paula na vuna vei ira na lotu vaKarisito mai Cesalonaika: ‘Mo ni vakayaloqaqataki mo ni tu dei.’ Cava a talai Timoci kina o Paula ena ilesilesi dredre qori?​— Nira sega ni kilai koya vinaka na dauveitusaqati, a tu vakarau tale ga o Timoci me lako. Qori e ivakaraitaki ni yaloqaqa! A yaga beka na nona veisiko? Ni lesu tale vei Paula o Timoci, a tukuna vua nira yalodina tiko ga mai Cesalonaika. Mani vola vei ira o Paula: “Keitou sa vakacegui kina e na vukumudou.”​—1 Cesalonaika 3:​2, VV, 3-7.

A tomani Paula voli o Timoci me tini tale na yabaki. Ia ni vesu mai Roma o Paula, se qai sere tale ga mai valeniveivesu o Timoci mani gole sara me lai raici Paula. Ena nona tiko voli e valeniveivesu, a vola o Paula e dua na ivola vei ira mai Filipai qai rairai vakayagataki Timoci me nona vunivola. E kaya: ‘Au na talai Timoci yani vei kemuni, ni sega tale ni dua keirau tiko vata me yalodina qai kauaitaka na veika me baleti kemuni me vakataki koya.’​—Filipai 2:​19-​22; Iperiu 13:23.

Sega ni vakabekataki ni vakamarautaki Timoci dina na vosa ya! A taleitaki Timoci vakalevu o Paula ni a tu vakarau me veiqaravi. Nuitaki ni o na tu vakarau tale ga mo veiqaravi.

Taro:

○ A susugi e vei o Timoci, cava a yaco ena imatai ni veisiko i Paula e kea?

○ Cava a cakava o Timoci ni sureti me tomani rau o Paula kei Sailasa?

○ A vakaraitaka vakacava na yaloqaqa o Timoci, cava a taleitaki koya kina vakalevu o Paula?

[iYaloyalo ena tabana e 23]

Cava a yaco?