Na Gagadre i Adryana

E DUA na ka a gadreva voli o Adryana, na goneyalewa yabaki ono e Tulsa, mai Oklahoma, Mereke. Na gagadre oya e via vaka na nona gagadre na daunisame o Tevita, a lagata: “E dua na ka ka’u sa gadreva vei Jiova, oqori ga ka’u na segata tiko; me’u tiko e na vale i Jiova e na veisiga kecega ni noqu bula, me’u vakaraica na lagilagi i Jiova, ka vakatarotaro tiko e na nona vale ni soro.”​— Same 27:4.

Ni se qai vula ono o Adryana, sa tauvi koya na neuroblastoma, e dua na mataqali kenisa ni mona e rawa ni vakaleqai koya. Na mate bibi oqo e vakavuna me paralasi na yavana ruarua. Era seleti koya vakavica na vuniwai qai dua na yabaki nona qaravi tiko ena chemotherapy.

O tama i Adryana, e duidui nona vakabauta vei Adryana kei tinana. A mani veitaratara o tamana kei na dua na isoqosoqo e dau vakaceguya nodra gagadre na gone era tauvimate bibi, me kerea ke rawa ni sikova o luvena e dua na vanua ni gade rogo e vuravura. Ni se bera ni vakadonui na nona kerekere, a vakatarogi Adryana mada e liu na isoqosoqo oya. E vakavinavinakataka o Adryana na nona kauaitaki ia e vakaraitaka ni vinaka cake vua me sikovi Peceli, na vanua e qaravi tiko kina na nodra cakacaka e vuravura raraba na iVakadinadina i Jiova, e tiko mai Niu Yoka. Ni sa kila na kerekere i tamana, e masuti Jiova sara o Adryana ke rawa mada ga ni lai sikovi Peceli. Dina ni a kauai na isoqosoqo oya ni o ira na gone era na rairai sega ni taleitaki Peceli, ia e vakadonuya ga nona gagadre ni sa duavata kina o tamana.

E lai sikova na Peceli e Niu Yoka ena imatai ni gauna o Adryana ni ratou tomani koya o tinana, tuakana, kei na dua na nona itokani. “E rogoca noqu masu o Jiova,” e kaya o Adryana. “Au kila ni keitou na ciqomi e Peceli. Au raica na kena tabaki na ivola, ivoladraudrau, kei na iVolatabu. E vinaka cake sara mai na vanua ni gade.”

A ‘raica dina na lagilagi i Jiova’ o Adryana qai vakavinavinakataka na cakacaka era vakayacora tiko ena gauna oqo na tamata i Jiova. Oni sureti tale ga mo ni sikovi Peceli. Me ikuri ni itikotiko liu ni iVakadinadina i Jiova e Niu Yoka, era tu tale ga na valenivolavola ni tabana e veiyasa i vuravura.