E Vakaleqai​—ia e Vinakata ga me Veiqaravi

NA IMATAI ni gauna o sotavi Leonardo kina o na sega ni vakabauta ni dua o koya e cakacaka tiko ena vanua ni taravale. E sega ni vakayagataka rawa na ligana baleta ni a ramusu ruarua ena dua na vakacalaka e valenicakacaka. Dina ga ni vakaleqai na ligana, a cakacaka sara tiko vakaukaua o Leonardo ena dua na vanua ni taravale e Acajutla, mai El Salvador, me vaka ga e tabaki toka ena iyaloyalo.

Me vakarawarawataka na nona cakacaka, a bulia ga o Leonardo na nona iyaya vakamatai. E daramaka na ligana imatau ena dua na kaukamea taloki e vakabiri ina dia ni isivi qai maqosataka sara na nona sivita na qele ina loma ni bara. E vakabira na rigi ina itautauri ni bara me biliga rawa kina. Cava beka e uqeti koya me vakaitavi ena taravale?

O Leonardo e vinakata me vakaitavi ena tara Kingdom Hall, se vale ni sokalou e nodra na ivavakoso ni iVakadinadina i Jiova e kea. Levu na vuna vinaka me kua kina ni vakaitavi ena taravale. E cakacaka saumi tiko, e vakaleqai na ligana, qai dua o koya e dauveiqaravi ena ivavakoso e lewena. Ia, e taleitaka ga me cakava na ka e rawata me qarava kina na Kalou ena vanua sara mada ga ni taravale.

Vakacava, o dau lomasoli tale beka ga vaka oya ena nomu qaravi Kalou? O Leonardo e sega ni vakaiulubaletaka na leqa ni ligana, ia e vakayagataka ga na nona vakasama me bulia kina na nona iyaya vakamatai me vakaitavi tale ga ena cakacaka e nanumi ni na sega ni rawata. A qarava tiko na Kalou ‘ena nona vakasama taucoko.’ (Maciu 22:​37, VV) E vakaleqai na yagodra se sega, o ira kece na vakaitavi ena tara Kingdom Hall ni iVakadinadina i Jiova e veiyasa i vuravura e tiko vei ira na yalo ni bolecakacaka. E dola raraba na nodra soqoni, oni sureti tale ga kina.