Na ca​—Rawa Beka ni Wali?

E dua na gonetagane lailai a tomika e dua na ka e lomatarotarotaka vakalevu​—oya na gasaukuro bulu​—e vakavuna nona mataboko qai mavoa vakaca. Dua na tina a biuta na luvena se qai sucu ena ibinibini benu e tu e gaunisala. A lesu tale i nona vanua ni cakacaka makawa e dua na turaga a sa vakasakei, e vanai ira kece e raica qai vakamatei koya e muri. E dua na lewenivanua dokai e vakacacani ira na gonelalai.

KA NI rarawa ni itukutuku ni kena vakayacori na veika ca vaka oya e sa takalevu tu ena noda gauna. Ia, e rarawataki sara ni dau vakaruguta na itukutuku ni veika oqo na kena dau yaco na veivakamatei vakayauyau, labakawa kei na vakacaca ni batikadi. E kaya kina e dua na niusipepa a tabaki ena 1995: “Na kena e ca duadua ni senitiuri oqo e nei Setani. E sega ni bau vaka oqo na veiyabaki sa sivi me vakaraitaki kina na levu ni ka era cakava na tamata kei na nodra gagadre, era vakamatea e vica vata na milioni baleta nira duatani na matatamata, duatani nodra lotu se nodra ivakatagedegede ni bula.”

Gauna vata oqori era vagaga na cagi, vakaduka na vuravura, ra vakarusa na iyaubula, ra qai vakamatea e dua na iwiliwili levu ni manumanu ra sa voleka ni kawaboko vakadua. E rawa beka vua na tamata me walia na veika ca oqo qai veisautaka na vuravura me vanua vinaka qai marautaki kina na bula? Sa na bau wadrega me rawati oqori. E kaya e dua na parofesa e dau volavola vakalevu ena ulutaga me baleta na ca e dau vakayacori: “Au vinakata meu veisautaka vakatotolo na vuravura, me vakavinakataki. Ia e sega ni bau laurai e dua na veisau.” De dua ena vakatale ga oya na nomu rai.

Na sala e sa mua tiko kina o vuravura e rawa ni vakatauvatani kei na dua na waqa e sokota yani na wasawasa e toso cake tiko ga e veisiga na kena voravora kei na kena rerevaki. Dina ni sega ni dua e via muria na kosi oya, ia na sasaga kece me veisau na kosi sa dreve ga. Sa mua ga yani na waqa ina draki voravora e sega ni maravu rawa.

Na ivalavala ca ni tamata, e rawa ni vakavuna tale ga na kena sa qai cacamatua ga na ituvaki oqo. (Roma 3:​23) Ia na kena tete kei na kena torosobu sara na ca e sega ni rawa ni beitaki duadua ga kina na tamata. E vakamua tiko beka na kawatamata e dua na kabula kaukaua e ca qai tawarairai? Ke vaka kina, o cei beka oya, kei na sala cava e rawa nida taqomaki keda kina? Ena veivosakitaki na taro oqori ena ulutaga e tarava.

[iTaba ni Credit Line 3]

© Heldur Netocny/Panos Pictures