Nira Tauvuloni na Lotu vaKarisito Vaka na Witi

NI BERA toka ga nona mate o Jisu, a vakadreti ira nona tisaipeli: “Raica, sa kerei kemudou ko Setani, me tauvuloni kemudou me vaka na witi.” (Luke 22:31) Na cava e vakaibalebaletaka?

Ena gauna i Jisu, e cakacaka levu qai dua na gauna balavu e tamusuki kina na witi. Kena imatai, era kumuna na dautatamusuki na vu ni witi mai na iteitei. Oti, ra qai samuta na witi ena dua na vanua kaukaua, se ra vakayagataka na bulumakau kei na kena isamuyara me qaqia na witi me matailalai. Na kena caka vaka oqori ena tavoci rawarawa kina na qaniwiti. Oti sa na qai ceburaki e macawa ena gauna e liwa kina na cagi. Na kena inaki me na qeqera na vuaniwiti se na sorena, qai cagina tani na qana. Ena qai tauvuloni na vuaniwiti me kau tani kina na kena benu.

Me vaka ga e tukuna o Jisu, a sega ni cegu o Setani na tusaqati ira na tisaipeli ena gauna oya, ena sega tale ga ni cegu nikua. (Efeso 6:​11) Ena dua na yasana, e sega ni vakavuna o Setani na ituvaki dredre kece ena noda bula. (Dauv. 9:​11) Ia, e saga ga vakaukaua me vakatovolei keda ena basoga kece ni noda bula meda kua ni yalodina. Kena ivakaraitaki, ena temaki keda meda domodomoiyau, meda digia na veivakalasai tawasavasava, se me tawakilikili na noda ivalavala. De dua ena vakayagataki ira tale ga noda icaba e koronivuli, se o ira na wekada sega ni iVakadinadina i Jiova mera uqeti keda meda vakaliuca na vuli kei na cakacaka e dulaka tu o vuravura. Kena ikuri, ena rairai vakacacani keda sara ga o Setani meda tawayalodina vua na Kalou. Ia, e levu tale na ka e cakava me tauvuloni keda kina.

Eda na vorati koya vakacava na meca kaukaua oqo? Eda na sega ni rawata ena noda kaukaua ga vakatamata. E kaukaua cake vei keda o Setani; ia eda kila ni kaukaua cake sara o Jiova. Kevaka eda nuitaki Jiova mai vu ni lomada, eda na masuti koya wasoma me vakavukui keda qai vakayaloqaqataki keda meda vosota kina, da qai nuitaka vakatabakidua nona veidusimaki, ena vakaukauataki keda meda vorata na veivakacacani i Setani.​—Same 25:​4, 5.

Nida vakatovolei tiko, e bibi na kilaka meda “vakaduiduitaka na vinaka mai na ca,” meda kua kina ni rawai ena vere i Setani. (Iper. 5:​13, 14, VV) Ena vakavulici keda o Jiova meda rawata na kilaka oqori. Oti, meda dei tiko ga ena ka e dodonu, dina ni na dredre. Kevaka eda muria na idusidusi i Jiova, e sega ni vakabekataki ni na tokoni keda meda cakava tiko ga na ka dodonu.​—Efeso 6:​10.

Ena saga o Setani me tauvuloni keda me vaka na witi. Ia, ena kaukaua ga i Jiova, eda na vorati koya qai tudei ena vakabauta. (1 Pita 5:9) E vakacegui keda dina na Vosa i Jiova: “Vorata na tevoro, ena dro tani kina vei kemudou ko koya.”​—Jeme. 4:7.