Nona Tiko Tawarairai na Karisito​—Cava Mo Cakava Kina?

“Na cava na ivakatakilakila e dusia ni oni sa tiko, kei na ivakataotioti ni veika vakavuravura?”​—MACIU 24:​3, NW.

1. Na taro bibi cava ratou tarogi Jisu kina na nona yapositolo?

RAUTA na ruanaudolu na yabaki sa oti ratou a lako vei Jisu ena Ulunivanua ni Veiolive e va na nona yapositolo ratou qai taroga: “[E]na yaco ni naica na veika oqo, na cava na ivakatakilakila e dusia ni oni sa tiko, kei na ivakataotioti ni veika vakavuravura?” (Maciu 24:​3, NW) E rua na matavosa ratou a cavuta ena taro oya e bibi meda kila na kena ibalebale​—“ni oni sa tiko” kei na “ivakataotioti ni veika vakavuravura.” Cava mada erau vakaibalebaletaka?

2. Na cava na ibalebale ni vosa “ivakataotioti”?

² Meda dikeva mada na ikarua ni matavosa e tiko kina na vosa “ivakataotioti,” e vakadewataki mai na vosa vaKirisi na syn·teʹlei·a. E dau vakadewataki na vosa qo ena New World Translation me “ivakataotioti,” ia e tiko tale ga na kena vosa veiwekani vaKirisi na te’los, e vakadewataki me “icavacava.” Na “ivakataotioti ni veika vakavuravura” e tukuni ena iVolatabu e vakaibalebaletaki tiko ina dua na itabagauna e tiko na kena icavacava.

3. Na cava e yaco ena gauna e tiko kina na Karisito?

³ Na cava na ibalebale ni nona “tiko” na Karisito me vaka ratou a taroga na yapositolo? Na vosa qo na “tiko,” e vakadewataki mai na vosa vaKirisi na pa·rou·siʹa.a Na pa·rou·siʹa, se nona tiko tawarairai o Karisito, a tekivu ena nona lumuti me Tui mai lomalagi ena 1914 me yacova yani na “veivakararawataki levu,” ni sa na vakarusai ira na dau caka ca. Nona tiko oya ena kovuti tale ga kina na veika e yaco ena veivakararawataki levu. (Maciu 24:​21, NW) Levu sara na ka e yaco ena nona tiko o Jisu​—wili kina na “iotioti ni veisiga” ni ituvaki ca kei vuravura, nodra kumuni na digitaki, kei na nodra vakaturi mera lai bula e lomalagi. (2 Tim. 3:​1, NW; 1 Kor. 15:23; 1 Ces. 4:​15-​17; 2 Ces. 2:1) Rawa gona ni tukuni ni gauna ni “ivakataotioti ni veika vakavuravura” (syn·teʹlei·a) e veidonui kei na gauna e tiko tawarairai kina na Karisito (pa·rou·siʹa).

Taura Toka e Dua na Gauna

4. E tautauvata vakacava na nona tiko o Jisu kei na veika a yaco ena gauna i Noa?

⁴ Na vosa pa·rou·siʹa e tukuna toka e dua na itabagauna, e salasalavata kei na ka e tukuna o Jisu me baleta na nona tiko. (Wilika Maciu 24:​37-​39.) A sega ni vakatauvatana o Jisu na nona tiko kei na gauna lekaleka e yaco kina na waluvu ena siga i Noa. Ia a vakatauvatana na nona tiko kei na gauna e via dede toka ni se bera ni yaco na waluvu. Oya na gauna e tara tiko kina na waqa o Noa kei na nona vunau voli me yacova sara ni sa luvuci na vuravura. A yaco tiko na veika oya me vicasagavulu na yabaki. Ena vaka tale ga oya na nona tiko na Karisito, ena vauci kina na veika e yaco tiko me yacova yani na veivakararawataki levu, kei na gauna sa tatara tiko kina na cagi ni veivakararawataki levu.​—2 Ces. 1:​6-9.

5. E vakaraitaki vakacava ena Vakatakila wase 6 ni nona tiko o Jisu ena taura toka e dua na gauna?

⁵ E vakadinadinataki ena so tale na tikinivolatabu ni nona tiko na Karisito, ena taura toka e dua na gauna, sega ni siga ga e vakarusai ira kina na dau caka ca. E tukuni ena Vakatakila ni vodo tiko ena dua na ose vulavula, qai soli vua e dua na isala vakatui. (Wilika Vakatakila 6:​1-8, VV) Ni lumuti oti ga o Jisu me Tui ena 1914, e “lako yani ko koya me ravuravu ka qaqa tiko.” Tukuni tale ga nira muri koya tiko e so na ose duiroka eratou vodo tiko kina e so, ratou qai dusia vakaparofisai na ivalu, lauqa, kei na matedewa. Na yaco ni veika qori ena taura toka e dua na gauna qai vakatokai na gauna qori me “iotioti ni veisiga.” Sa ra yaco sara tu ga nikua na parofisai qori.

6. Na cava e tukuni ena Vakatakila wase 12 me baleta nona tiko na Karisito?

⁶ E tukuni ena Vakatakila wase 12 e so tale na ka me baleta na tauyavu ni Matanitu ni Kalou mai lomalagi. Eda wilika ni a yaco e dua na ivalu mai lomalagi. A vala kina o Maikeli, se o Jisu Karisito ni sa taura nona itutu mai lomalagi, ra qai tokoni koya na nona agilosi mera valuti Setani kei ira nona timoni. E kolotaki mai vuravura o Setani na Tevoro kei ira na nona ilala. Kaya na iVolatabu ni cudru kina vakalevu “ni sa kila ko koya ena sega ni dede na nona gauna.” (Wilika Vakatakila 12:​7-​12.) Na kena tauyavutaki na Matanitu i Karisito mai lomalagi ena salamuria e dua na gauna e “ca” sara vakalevu vei ira na tiko e vuravura.

7. Na cava e vakamacalataki ena ikarua ni Same kei na digidigi cava e vakamacalataki kina?

⁷ E tukuna tale ga vakaparofisai na ikarua ni Same na nona lumuti o Jisu me Tui ena Ulunivanua o Saioni vakalomalagi. (Wilika Same 2:​5-9; 110:​1, 2.) E vakamacalataki tale ga kina ni na soli na gauna vei ira na veiliutaki e vuravura kei ira na vakarurugi ena nodra lewa mera vakamalumalumu ina lewa i Karisito. Era uqeti mera ivalavala ‘vakavuku,’ mera tu vakarau tale ga mera “vakatavulici.” Ena gauna oya era na “kalougata ko ira kecega sa vakararavi vei koya [Jiova]” ena nodra veiqaravi vei koya kei na Tui e digitaka. O koya gona, ena gauna e veiliutaki tiko kina vakatui o Karisito, sa soli tu na digidigi mera veisau na veiliutaki e vuravura kei ira na vakarurugi ena nodra lewa.​—Same 2:​10-​12.

Kila na iVakatakilakila

8, 9. O cei ena raica na ivakatakilakila ni nona tiko na Karisito qai kila na kena ibalebale?

⁸ Era tarogi Jisu na Farisi me baleta na gauna ena yaco mai kina na nona Matanitu qai tukuna vei ira o koya ni na sega ni ‘laurai ena ivakatakilakila e so’ me vaka na nodra nanuma. (Luke 17:​20, 21, VV) Era na sega ni kila na tawavakabauta na kena ivakatakilakila. Sa na bau wadrega mera kila! Sa ra sega tu mada ga ni ciqomi Jisu me nodra Tui ena dua na gauna mai muri. Ia o cei ga ena raica na ivakatakilakila ni nona tiko tawarairai o Karisito qai kila na kena ibalebale?

⁹ E kaya o Jisu ni ratou na raica na nona tisaipeli na ivakatakilakila me vaka sara ga nodratou raica na ‘tibi ni liva mai na dua na yasa ni lomalagi ina dua tale na yasana.’ (Wilika Luke 17:​24-​29.) Volaitukutukutaki tale ga na tikina oqori ena Maciu 24:​23-​27, bibi gona meda na kauaitaka ni vakamacalataki tale ga kina na ivakatakilakila ni nona tiko o Karisito.

iTabatamata Era Kila na iVakatakilakila

10, 11. (a) Na cava e dau kilai tu me baleta na vosa “[i]tabatamata” e tukuni ena Maciu 24:34? (b) Na cava eratou kidava na yapositolo me baleti ira na okati ena “[i]tabatamata” a cavuti oya?

¹⁰ A vakamacalataki ena dua Na Vale ni Vakatawa e liu ni gauna e cavuti kina na vosa “[i]tabatamata oqo” me baleti ira na bula ena imatai ni senitiuri, me vaka e volai ena Maciu 24:​34, qori e dau dusi ira “na itabatamata Jiu tawavakabauta era bula ena gauna oya.”b Ena rairai donu toka na ivakamacala oya baleta ni so tale na tikinivolatabu e vakayagataka kina o Jisu na vosa qo “[i]tabatamata,” e dau vakalewai ira qai vakatokai ira mera “ca.” (Maciu 12:39; 17:17; Mari. 8:​38) O koya gona, ena kena vakayacori ena noda itabagauna, e nanumi ni vakaibalebaletaka o Jisu vei ira “nai tabatamata” tawavakabauta era na bula tiko mera raica na ivakatakilakila ni “ivakataotioti ni veika vakavuravura” (syn·teʹlei·a) kei na kena icavacava (teʹlos).

¹¹ Ni dau cavuta o Jisu na vosa “[i]tabatamata” qai tauca vata kei na vosa ni veivakalewai, e tukuni ira tiko na tamata ca era bula ena nona gauna. Ia vakacava na nona cavuta na vosa itabatamata ena Maciu 24:34? Meda nanuma tiko ni a vosa tiko ga o Jisu vei ratou e va na nona tisaipeli eratou a “lako” yani vua. (Maciu 24:​3, NW) A cavuta vei ratou o koya na vosa itabatamata, ia na vosa e tauca e sega ni vosa ni veivakalewai. Ratou kidava sara nona yapositolo ni vosa “[i]tabatamata oqo” e sa dusi ratou sara tiko ga kei ira na tisaipeli i Jisu, era na sega mada ni takali, sa na “yaco eliu na ka kecega oqo.”

12. Na cava e vakamacalataki ena veitikina wavolita me baleti ira “nai tabatamata” e tukuna o Jisu?

¹² Eda kila mada vakacava na dina ni ivakamacala qori? Vinaka meda na dikeva na veitikina wavolita. E volai ena Maciu 24:​32, 33, ni kaya o Jisu: “Mo dou kila [“vulica,” VV] mada na vosa vakatautauvata e na lolo: Ni sa qai lavovou na tabana, a sa tubu na drauna, dou sa kila kina sa voleka na vula i katakata: Sa vaka talega kina koi kemudou, ni dou sa raica na ka kecega oqo, dou kila sa voleka ko koya, io mai na mata ni katuba.” (Vakatauvatana Marika 13:​28-​30; Luke 21:​30-​32.) Eda wilika tale ga ena Maciu 24:34: “Au sa kaya vakaidina vei kemudou, Ena sega ni takali mada nai tabatamata oqo, ena yaco eliu na ka kecega oqo.”

13, 14. Na cava eda rawa ni kaya kina ni tukuni ira tiko ga nona tisaipeli o Jisu ena nona cavuta “nai tabatamata”?

¹³ E kaya tiko o Jisu ni o ira sara ga na nona tisaipeli era vakarau lumuti ena yalo tabu, era na kila na ivakatakilakila nira raica na kena yaco na “ka kecega oqo.” Koya gona a tukuni ratou tiko ga nona tisaipeli o Jisu ena gauna e cavuta kina ena tikinivolatabu e tarava: “Ena sega ni takali mada nai tabatamata oqo, ena yaco eliu na ka kecega oqo.”

¹⁴ Era sega ni vakataki ira na tawavakabauta na tisaipeli i Jisu, baleta nira na raica na ivakatakilakila, ra kila tale ga na kena ibalebale. Era na “vulica” na veika e baleta na ivakatakilakila ra qai “kila” na kedra ibalebale dina. Era na kila vinaka ni “sa voleka ko koya, io mai na mata ni katuba.” Dina nira a raica na Jiu tawavakabauta kei ira na lotu Vakarisito lumuti yalodina ena imatai ni senitiuri na kena yaco e so na vosa i Jisu, ia o ira ga na nona imuri lumuti era na kila na ibalebale ni ka era raica ra qai vuli kina.

15. (a) Ena gauna qo e dusi cei “nai tabatamata” a tukuna o Jisu? (b) Na cava e sega ni cakacakataki rawa kina na dede ni gauna e bula kina na “[i]tabatamata oqo”? (Raica na kato ena tabana e 25.)

¹⁵ Era nanuma na lecaika tu vakayalo edai ni se sega ni ‘laurai na ivakatakilakila e so’ me baleta na nona sa tiko o Jisu. Era kaya ni se sega ni dua na ka e veisau, se duadua tu ga mai na gauna e liu. (2 Pita 3:4) Ena yasana adua, o ira na taci Karisito lumuti yalodina, na ilawalawa vakataki Joni ena noda gauna e matata vinaka sara tu ga vei ira na ivakatakilakila kei na kena ibalebale. Na kena matata e vaka sara ga nodra raica na tibi ni liva. Vakailawalawa, o ira na lumuti oqo era kilai nira “[i]tabatamata” era bula tiko ena noda gauna, era na bula tale tiko ga ni “yaco . . . na ka kecega oqo.”c Kena ibalebale qo ni so na taci Karisito lumuti era na bula tiko ga e vuravura ni yaco na veivakararawataki levu a parofisaitaki.

‘Ni Yadra Tiko!’

16. Na cava mera cakava na tisaipeli kece i Karisito?

¹⁶ E sega ni gadrevi me kilai wale ga na ivakatakilakila. E tomana o Jisu: “Na ka au sa kaya vei kemudou, au sa kaya vei ira na tamata kece ga, ‘Ni yadra tiko!’” (Mari. 13:​37, VV) Bibi dina qo vei keda kece nikua, se da lumuti se lewe ni isoqosoqo levu. Sa oti qo e ciwasagavulu na yabaki na nona lumuti o Jisu ena 1914 me Tui mai lomalagi. Me laurai mada ga nida dau tu vakarau da qai yadra tiko, dina ni ka ni bolebole toka. Eda kila ni sa veiliutaki tiko o Karisito ena Matanitu ni Kalou, qo ena uqeti keda meda yadrayadravaki tiko. Ena uqeti keda tale ga meda kauaitaka tiko nona sa vakarau vakarusai ira kece na meca ‘ena gauna eda sega ni kila.’​—Luke 12:40.

17. Me uqeti keda vakacava na veika eda sa mai kila oqo? Cava meda gumatua ni cakava?

¹⁷ Eda uqeti meda kua ni vakawelewele nida sa kila na ibalebale ni nona sa tiko na Karisito. Eda kila ni sa tiko, sa veiliutaki tawarairai tiko vakatui mai lomalagi me tekivu mai na 1914. Sa na vakarau vakarusai ira na tamata ca qai veisautaka e levu na ka ena vuravura qo. Koya gona meda gumatua mada ga ni vakaitavi ena cakacaka a parofisaitaka o Jisu: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, ena qai yaco e muri na icavacava [teʹlos].”​—Maciu 24:​14, NW.

[iVakamacala e ra]

O na Sauma Vakacava?

• Eda kila vakacava ni na taura toka e dua na gauna na tiko tawarairai i Karisito?

• O cei ena raica na ivakatakilakila ni nona tiko na Karisito qai kila na kena ibalebale?

• O cei era wili tiko ena itabatamata ena gauna oqo me vaka e tukuni ena Maciu 24:34?

• Na cava eda sega ni cakacakataka rawa kina na dede ni gauna e bula kina na “[i]tabatamata oqo”?

[Kato ena tabana e 25]

Rawa Beka ni Cakacakataki na Dede ni Gauna e Bula Kina na “[i]Tabatamata Oqo”?

[Caption on page 25]

Na vosa “[i]tabatamata” e dau vakaibalebaletaki vei ira na tamata e duidui nodra yabaki ni bula, ia era donuya se ra bula sivita e dua na itabagauna se na kena yaco e so na ka. Kena ivakaraitaki, e kaya na Lako Yani 1:6: “A sa mate ko Josefa, kei iratou na tuakana kei na tacina kecega, kei nai tabatamata kecega ko ya.” E duidui na yabaki i Josefa kei ratou na tacina, ia e sega ga ni duidui na veika ratou sotava ena loma ni gauna ratou bula vata tiko kina. Okati tiko ena “[i]tabatamata . . . ko ya” e so na taci Josefa era sucu e liu vua. So era se bula tiko ga sa leqa o Josefa. (Vkte. 50:24) So tale ena “[i]tabatamata” oya era sucu e muri vei Josefa me vakataki Penijamini na tacina, era se rairai bula tiko ga ena gauna e leqa kina.

Ni tukuni gona “[i]tabatamata” e vakaibalebaletaki tiko vei ira na bula ena dua na itabagauna, ia e sega ni kilai na dede ni gauna oqori, kilai ga ni tiko na kena icavacava, qai sega ni sivia tale na kena dede. Nona cavuta o Jisu na vosa “nai tabatamata oqo” ena Maciu 24:​34, e sega ni tukuna tiko vei ratou na nona tisaipeli na sala me ratou cakacakataka kina na gauna ena cava kina na “iotioti ni veisiga.” Ia e vakabibitaka ga ni ratou na sega ni kila “na siga ko ya, se na aua.”​—2 Tim. 3:​1, NW; Maciu 24:36, VV.

[iYaloyalo ena tabana e 22]

Ni lumuti oti ga me Tui o Jisu ena 1914, sa tekivu “ravuravu” sara

[iYaloyalo ena tabana e 24]

“Ena sega ni takali mada nai tabatamata oqo, ena yaco eliu na ka kecega oqo”