Kaburaki na Sore ni Ka Dina ena Vanua Ribayawa

NA REPABULIKI o Tuva e tiko mai Rusia, e toka ena ceva kei Siberia. O Mongolia e toka ena muaira kei na tokalau i Tuva. E levu na lewenivanua e Tuva era vakaitikotiko ena vanua ribayawa, e dredre me vunautaki kina na itukutuku ni Matanitu ni Kalou. Ia, ena dua na gauna sa oti, ra biubiu eso mai na veivanua ribayawa qori mera gole ina koroturaga o Kyzyl, mera tiko ena dua na vuli. A rogoca o Maria, e dua na painia e Kyzyl, na nodra gole mai, mani nanuma ni gauna vinaka sara ga me vunautaka kina vei ira na itukutuku vinaka.

E vakamacalataka o Maria na ka a yaco: “Na koronivuli au qasenivuli tiko kina a vakarautaka e dua na vuli me baleta na kena wali na leqa ni kena vakayagataki vakatani na wainimate. Rauta ni 50 na lewenivanua mai na vanua ribayawa duadua e Tuva era a tiko ena vuli qo. Era okati kina eso na qasenivuli, vuniwai ni vakasama, o ira na cakacaka ena tabana e kauaitaka nodra bula na gone, kei na so tale.” A rawa gona vei Maria me vunau, ia e ka ni bolebole toka vua. E kaya: “Au dau mamadua, qai dredre meu vunau tawalokuci. Ia, au masuti Jiova me vakaukauataki au meu valuta noqu malumalumu qai vakayagataka vinaka na gauna qori meu vunau kina.” A cakava rawa beka?

E tomana o Maria: “Au kunea e dua na Yadra! e veivosakitaki kina na mate ni rere vakasivia. ‘Au nanuma ni na rairai taleitaka e dua na vuniwai ni vakasama,’ au mani kauta e koronivuli. Ena siga ya, a gole mai ena noqu ofisi e dua na qasenivuli a tiko ena vuli, au qai vakaraitaka vua na mekesini. A marautaka qai taura. E tukuna ni tauvi koya tale ga na mate oya. Ena siga tarava, au solia vua na ivola Questions Young People Ask​—Answers That Work, Volume 1. A taura tale ga na ivola qo. Na nona taleitaka na ivola, au nanuma kina nira na rairai taleitaka tale ga eso na qasenivuli. Au mani kauta e koronivuli e dua na kateni ivola ni Young People Ask kei na so tale na ivola.” Totolo ga na kena lala na kateni. A nanuma lesu o Maria na ka e yaco: “E vica vata na itokani cakacaka i koya na qasenivuli au solia vua na ivola Young People Ask era gole mai ina noqu ofisi qai taroga, ‘Era veisoliyaka tiko e vei na ivola?’ ” Era gole donu yani!

A oti na vuli ena siga Vakarauwai. A sega ni cakacaka ena siga qori o Maria, a mani biuta toka eso na ivola ena teveli ena nona ofisi. A vola ena papa: “Kemuni na Qasenivuli! Oni rawa ni kauta eso na ivola me nomuni kei ira na nomuni itokani. Na ivola vivinaka qo era na dusimaki kemuni me vinaka kina na nomuni cakacaka, qai vaqaqacotaka na nomuni bula vakavuvale.” Na cava a yaco? “Niu gole yani ina ofisi ena siga qori, sa vo ga e vica na ivola. Au lai kauta totolo tale mai eso na ivola kei na mekesini.” Ni qai cava na vuli, a solia o Maria e 380 na mekesini, 173 na ivola, 34 na brochure. Nira lesu ina nodra itikotiko kei na nodra vanua ni cakacaka ena vanua ribayawa era gole mai kina, era kauta vata kei ira na ivola. E kaya o Maria, “Dua na ka na levu ni noqu marau ni sa kaburaki na sore ni ka dina ina veivanua ribayawa duadua e Tuva!”​—Dauv. 11:6.

[Mape ena tabana e 32]

RUSIA

REPABULIKI O TUVA