Ciqoma ena Marau Solika mai Vu ni Lomamu

E KAUAITAKI keda yadudua na Tamada vakalomalagi o Jiova. E vakadeitaka na Vosa ni Kalou ni kauaitaki keda vakabibi na nona dauveiqaravi. (1 Pita 5:7) Dua na sala e vakaraitaka kina oya nona vakarautaka na idusidusi yaga meda qaravi koya kina ena yalodina. (Aisea 48:17) E dau vinakata o Jiova meda vakayagataka vinaka na idusidusi e vakarautaka, vakauasivi ena gauna eda sotava kina na leqa. E vakadinadinataka na tikina qori na lawa i Mosese.

A vakarautaka o Jiova ena lawa qori na idusidusi mera na vukei kina na “dravudravua,” me vakataki ira na luveniyali, na yada kei ira na vulagi. (Vunau 19:9, 10; Vkru. 14:29) E kila vinaka ni so vei ira nona dauveiqaravi era na rairai vinakata nodra veivukei na tacidra vaKarisito. (Jeme. 1:27) Koya gona, mera kua ni tu vakasuka nona dauveiqaravi na ciqoma na nodra veivukei na tamata e uqeti ira o Jiova. Ia, ena tiko vei keda na rai dodonu nida ciqoma na veivuke.

Ena gauna vata qori, e vakabibitaka na Vosa ni Kalou ni tiko eso na ituvaki eda rawa ni solika kina na dauveiqaravi ni Kalou. Vakasamataka mada na “yada dravudravua” a raica o Jisu ena valenisoro i Jerusalemi. (Luke 21:1-4) A rairai yaga sara vua na Lawa e vakarautaka o Jiova me baleti ira na yada. Koya gona, dina ni dravudravua, ia e kilai na yada oya me dua e dau solika, sega ni taura na ka. Na ivakarau ni nona dau solika e vakavu marau vua baleta ni kaya o Jisu, “a ka ni veivakalougatataki vakalevu me soli ka, ka vakalailai ga me taura na ka.” (Caka. 20:35) Ni o vakasamataka tiko na ka dina qori, o na ‘dausoli ka’ vakacava? O na marau tale ga kina vakacava?​—Luke 6:38.

‘Na Cava Meu Dolea Vei Jiova?’

E kaya na daunisame: “A cava me’u cakava [“dolea,” NW] vei Jiova ena vuku ni nona cakacaka loloma kecega vei au?” (Same 116:12) Na cava a cakava vua na Kalou? E vakacegui koya o Jiova ena gauna a ‘rarawa qai oca’ tu kina. Kuria qori, e “vakabula” o Jiova na ‘yalona mai na mate.’ Ia qo, e vinakata me “dolea” vei Jiova na ka a cakava. Na cava e rawa ni cakava na daunisame? E kaya: “Au na cakava mada na ka ka’u a bubului kina vei Jiova.” (Same 116:3, 4, 8, 10-14) E vakadeitaka me dina ena nona iyalayala kece vei Jiova, me vakayacora tale ga na itavi kece e lesia vua.

O rawa ni cakava tale ga qori, ia o na cakava vakacava? Ena nomu muria ena veigauna na lawa kei na ivakavuvuli ni Kalou. Koya gona, me ka bibi duadua ena nomu bula nomu sokaloutaki Jiova, mo qai laiva na yalo ni Kalou me dusimaka na veika kece o cakava. (Dauv. 12:13; Kala. 5:16-18) Dina nida na sega ni dolea rawa vei Jiova na veika sa cakava vei keda, ia e ‘marautaka o Jiova’ ni raica nida qaravi koya tiko mai vu ni lomada. (Vkai. 27:⁠11) Sa dua dina na itavi dokai nida vakamarautaki Jiova ena sala qo!

Meda Tara Cake na iVavakoso

O na rairai vakadinadinataka na yaga ni ivavakoso vaKarisito ena levu na sala. E vakayagataka o Jiova na ivavakoso me vakarautaka kina e levu na kakana vakayalo. Na ka dina e sereki iko mai na lotu lasu kei na butobuto vakayalo. (Joni 8:32) E vakarautaka na “dauveiqaravi yalodina ka vuku” na soqoni vakaivavakoso, soqo ni tabacakacaka, kei na soqo ni tikina, eda na rawata kina na kilaka ena lai tini ina bula tawamudu e vuravura ena sega kina na mosi kei na rarawa. (Maciu 24:45-47, VV) O rawa ni tukuna na veika yaga o sotava ena ivavakoso ni Kalou kei na kena e se bera mai? Na cava o rawa ni solia lesu ina ivavakoso?

E vola na yapositolo o Paula: “Era sema vata . . . na tikiniyago kece ra qai vakarautaki mera cakacaka vata na isema yadua me vakatau ena kedra yaga, na nodra veitokoni vakayalololoma e tubu kina na yago taucoko.” (Efeso 4:15, 16, NW) Dina ni tukuni na tikinivolatabu qori vei ira na lotu vaKarisito lumuti, na ivakavuvuli e tiko kina ena yaga tale ga vei ira na lotu vaKarisito edai. Io, na lewe ni ivavakoso yadudua e rawa nira veivuke ena kena tubu kei na kena tarai cake na ivavakoso. Ena sala cava?

Eda rawa ni cakava qo ena noda saga ena veigauna kece meda ivurevure ni veivauqeti qai veivakabulabulataki vakayalo vei ira eso tale. (Roma 14:19) Eda rawa tale ga ni veitokoni ena kena ‘tubu na yago taucoko’ ena noda vakaitovotaka na vua ni yalo ni Kalou, ena noda veimaliwai kei ira na noda itokani ena vakabauta. (Kala. 5:22, 23) Kuria qori, eda rawa ni qara na sala meda “caka vinaka vei ira na tamata kecega, ka vakalevu vei ira era veitokani e na vakabauta.” (Kala. 6:10; Iper. 13:16) O ira kece ena ivavakoso—⁠mataveitacini qase se gone—⁠era rawa ni ‘veivakatakatai cake ena loloma.’

Eda rawa tale ga ni vakayagataka noda taledi, kaukaua kei na veika e tu vei keda ena cakacaka ni veivakabulai e vakaitavi kina na ivavakoso. “Dou a rawata walega,” e kaya o Jisu Karisito. Na cava gona meda cakava? “Dou solia walega,” e kaya. (Maciu 10:⁠8) Koya gona, solia nomu vinaka taucoko ena cakacaka bibi ni kena vunautaki na Matanitu ni Kalou kei na veivakatisaipelitaki. (Maciu 24:14; 28:19, 20) E tiko beka eso na ka ena yalana nomu cakava qo? Nanuma na yada dravudravua a vakamacalataka o Jisu. A lailai sara na ka a solia. Ia a kaya o Jisu ni levu cake na ka e solia ni vakatauvatani kei ira na so tale. A solia na ka kece a tu vua.—⁠2 Kor. 8:1-5, 12.

Rai Donu me Baleta Noda Vukei

E sega ni vakabekataki ni so na gauna o na rairai vinakata nodra veitokoni na lewe ni ivavakoso. Kua ni tu suka ni ciqoma na veivukei va qori ni o saga tiko mo vosota na ituvaki ca ni vuravura qo. O Jiova e vakarautaki ira na tagane lotu vaKarisito ra yalololoma, ra rawata tale ga na kena ivakatagedegede mera veiqaravi ra qai “vakatawa na ivavakoso”—⁠mera dusimaki keda ena gauna eda vakatovolei kina kei na gauna eda sotava kina na veika rarawa. (Caka. 20:28, NW) Era vinakata na qase ni ivavakoso mera veivakayaloqaqataki, mera veitokoni qai veitaqomaki ni o sotava na ituvaki dredre.​—Kala. 6:2; 1 Ces. 5:14.

Meda nanuma dei ni gauna e vinakata kina e dua me vukei keda, meda ciqoma ena lomavinaka. Meda vakavinavinakataka na nodra veitokoni na mataveitacini. Meda raica na veivukei va qori mera isolisoli wale ni Kalou. (1 Pita 4:10) Na cava e bibi kina? Baleta nida sega ni vakataki ira na sega ni kilai Jiova—⁠nira sega ni dau vakavinavinaka.

Me Veiraurau Nomu Rai, Mo Yalorawarawa Tale Ga

Ena ivola vei ira na lewe ni ivavakoso e Filipai, a vola o Paula me baleti Timoci: “Sa sega e dua sa tiko vei au sa yalovata kaya, me daunanuma na nomudou ka e na lomana dina.” Ia e tomana: “Ni ra sa vakasaqara na nodra ka ko ira kecega, ka segai na ka nei Jisu Karisito.” (Fpai. 2:20, 21) Nida dikeva na veika a vola o Paula, na cava meda cakava meda kua kina ni vakasaqara na ‘veika e baleti keda ga’?

Meda kua ni lavaka vakasivia na nodra gauna kei nodra veitokoni na lewe ni ivavakoso mera vukei keda ena noda leqa. Na vuna? Vakasamataka mada qo: Eda na vakavinavinakataka ke so na tacida era vukei keda vakayago ni yaco eso na leqa tubukoso. Ia eda na lavaka beka mera vukei keda? Sega. Ena sala vata qori, era dau marau na tacida mera vukei keda, e bibi gona meda yalorawarawa qai veiraurau na ka eda namaka mera solia, vakauasivi na nodra gauna. Eda cakava qo baleta nida vinakata me vu mai lomadra nodra vukei keda meda vosota na ituvaki dredre.

E sega ni vakabekataki nira tu vakarau na tacida vaKarisito mera veivukei. Ia, ena so na gauna era na rairai sega ni vakarautaka kece na veika eda vinakata. Ke yaco qori, meda vakadeitaka ni na vukei keda o Jiova ena veivakatovolei eda donuya, me vaka ga nona vukei koya na daunisame.​—Same 116:1, 2; Fpai. 4:10-13.

Koya gona, kua ni tu suka mo ciqoma na veika e vakarautaka mai o Jiova​—vakauasivi ena gauna o yalolailai kina kei na gauna ni leqa. (Same 55:22) E vinakata mo cakava vaka kina. Ia, e vinakata tale ga mo “soli ka e na yalomarau.” Koya gona, meda solia sara ga na ka ‘e vinakata na lomada’ ena ituvaki eda rawa ni tokona kina na sokalou dina. (2 Kor. 9:6, 7, VV) Ena sala qori, eda na ciqoma ena marau na veivuke da qai solika mai vu ni lomada.

[Kato/​iYaloyalo ena tabana e 31]

“A cava me’u cakava [“dolea,” NW] vei Jiova ena vuku ni nona cakacaka loloma kecega vei au?”​—Same 116:12

▪ Meda saga meda “caka vinaka vei ira na tamata kecega”

▪ Mo ivurevure ni veivakayaloqaqataki, mo veivakacegui tale ga vakayalo

▪ Vakaitavi vakalevu ena cakacaka ni veivakatisaipelitaki ke ganita na kemu ituvaki