‘Tiko ga ena Loloma ni Kalou’

‘Dou maroroi kemudou mo dou tiko ga ena loloma ni Kalou, mo ni nuitaka na loloma ni noda Turaga ko Jisu Karisito ina bula tawamudu.’​—JUTA 21.

1, 2. E vakaraitaka vakacava o Jiova ni lomani keda? Eda kila vakacava ni vinakati na sasaga meda tiko ga ena nona loloma?

E DAU vakaraitaka o Jiova ena levu na gauna ni lomani keda. Na ivakadinadina levu ni nona loloma oya nona vakarautaka na isoro ni veivoli. Ni titobu nona lomani keda, a talai Luvena lomani me mai mate ena vukuda. (Joni 3:16) E cakava qori ena nona vinakata meda bula tawamudu, e vinakata tale ga me yaga tawamudu vei keda nona loloma!

² E kena ibalebale beka ni na lomani keda tiko ga o Jiova se mani cava eda cakava? Sega. E tukuna na Juta tikina 21: ‘Dou maroroi kemudou mo dou tiko ga ena loloma ni Kalou, mo ni nuitaka na loloma ni noda Turaga o Jisu Karisito ina bula tawamudu.’ Na malanivosa ‘tiko ga ena loloma ni Kalou’ e dusia ni vinakati na sasaga yadudua. Na cava gona meda cakava meda tiko ga kina ena loloma ni Kalou?

Eda na Tiko ga Vakacava ena Loloma ni Kalou?

3. Na cava e tukuna o Jisu ni bibi me cakava me dei tiko ga kina ena loloma ni Kalou?

³ E saumi na taro qori ena vosa i Jisu, a cavuta ena iotioti ni bogi ena nona bula e vuravura. E kaya: “Kevaka dou sa talairawarawa ki na noqu vunau, dou na tiko ga e na noqu loloma; me vaka ka’u sa talairawarawa ki na vunau nei Tamaqu, ka tiko ga e na nona loloma.” (Joni 15:10) E kila o Jisu ni bibi dina nona talairawarawa ina ivakaro i Jiova ni na vinaka tiko ga kina na kena irogorogo vei Tamana. Ke sa cakava ya na Luve uasivi ni Kalou, sega li ni bibi tale ga vei keda?

4, 5. (a) Na cava na imatai ni sala eda na vakaraitaka kina nida lomani Jiova? (b) Na cava meda kua kina ni cata na talairawarawa ina ivakaro i Jiova?

⁴ Kena imatai, eda na vakaraitaka noda lomani Jiova nida talairawarawa vua. A tukuna na yapositolo o Joni: “Ni sai koya oqo na loloma vua na Kalou, meda muria na nona vunau: a sa sega ni ka bibi [“i colacola bibi,” VV] na nona vunau.” (1 Joni 5:3) E levu nikua era sega sara ga ni taleitaka na talairawarawa. Dikeva na malanivosa qo: “A sa sega ni ka bibi [“i colacola bibi,” VV] na nona i vunau.” Ena sega ni vakacolata o Jiova na ka ena dredre vei keda.

⁵ Kena ivakaraitaki: O na kerei nomu itokani me na colata e dua na ka o kila ni na dredre vua? Sega! E yalololoma cake o Jiova qai kila vinaka na ka eda rawa ni cakava. E tukuna na iVolatabu ni o Jiova e ‘kila nida sa kuvunisoso.’ (Same 103:14) Ena sega ni lavaka meda cakava na ka eda sega ni rawata. Koya gona, e sega ni iulubale meda cata na talairawarawa ina ivakaro i Jiova. Ena dua tale na yasana, eda kila ni noda talairawarawa vei Jiova—⁠e sala vinaka duadua eda vakaraitaka kina nida lomani koya dina, kei na noda vinakata meda tiko ga ena nona loloma.

iSolisoli Talei i Jiova

6, 7. (a) Na cava na lewaeloma? (b) Vakamacalataka se rawa vakacava ni dusimaki keda na lewaeloma meda tiko ga ena loloma ni Kalou.

⁶ Ena vuravura veilecayaki qo, e levu na vakatulewa eda na cakava ena vakaraitaki kina noda talairawarawa vua na Kalou. Eda kila vakacava ni vakatulewa qori e salasalavata kei na loma ni Kalou? E vakarautaka o Jiova e dua na isolisoli me dusimaki keda ena veika e vauca na talairawarawa. Qori na lewaeloma. Na cava na lewaeloma? E isolisoli me rawa nida dikevi keda kina. Ni vaka tiko na ivakadinadina e lomada se turaganilewa, na lewaeloma e rawa ni vakalewa noda ivalavala, noda rai, kei na noda digidigi. E rawa ni veidusimaki meda digidigi vakayalomatua se veivakasalataki ke cala na ka eda cakava.​—Wilika Roma 2:14, 15.

⁷ Eda na vakayagataka vinaka vakacava na lewaeloma? Dua na kena ivakaraitaki. E muria na sala vereverea e veikau e dua na dautaubale. E sega ni bau laurai na gaunisala kei kena ivakatakilakila. Ia a qai vakacavara vinaka nona ilakolako. Rawa vakacava qori? A vakayagataka na kabasi. Na kabasi e tiko na matana qai vakatakilakilataki tu ena va na mata ni kabasi lelevu, kei na ligana makeneta e dusi tu ena noca. Koya gona ke sega tu nona kabasi na dautaubale, ena sese dina. Tautauvata vinaka qori ke sega nona lewaeloma e dua, ena veilecayaki dina ni saga me donu nona itovo kei nona ivakarau ni bula.

8, 9. (a) Na cava meda nanuma tiko me baleta noda lewaeloma? (b) Na cava eda rawa ni cakava me yaga kina noda lewaeloma?

⁸ Me vaka ga na kabasi, e vakaiyalayala ga na ka e rawata na lewaeloma. Ke tosoya voleka na dautaubale na makeneta ena kabasi, ena vakamuai tani na mata ni kabasi qai sega ni dusia na noca. Koya gona, ke da vakalaiva na gagadre ni lomada me lewa noda vakatulewa, cava ena yaco? Ena vakamuai cala noda lewaeloma nida vakaliuca noda gagadre ca. E vakasalataki keda na iVolatabu ni “sa ka dauveivakaisini duaduaga na yalo ni tamata, ka sa dredre ni vinaka.” (Jere. 17:9; Vkai. 4:23) Kaya mada ke sega ni tu vua na dautaubale na mape e donu qai nuitaki. E tautauvata tale ga qori ke da sega ni nuitaka na veidusimaki ni Vosa ni Kalou ena iVolatabu, ni dina qai dau sega ni veiveisau. (Same 119:105) E ka ni rarawa ni levu nikua era vakaliuca na gagadre ni lomadra, ra qai sega sara ga ni kauai ena ivakatagedegede ni Vosa ni Kalou. (Wilika Efeso 4:17-19.) Qori na vuna e levu kina nikua e tu nodra lewaeloma, ia era vakayacora na ivalavala ca bibi.​—1 Tim. 4:2.

⁹ Meda kua mada ga ni vakataki ira! Ia meda tomana tiko ga na noda vakavulica noda lewaeloma ena Vosa ni Kalou me dusimaki keda. Bibi dina meda muria noda lewaeloma e vakavulici ena iVolatabu mai na noda vakalaiva meda lewai keda ga. Ena gauna vata qori, meda doka tale ga na nodra lewaeloma na tacida lotu vaKarisito. Eda na saga vagumatua meda kua ni vakatarabetaki ira, nida kila ni duidui nodra lewaeloma ena veika e baleta na vakatulewa.​—1 Kor. 8:12; 2 Kor. 4:2; 1 Pita 3:16.

10. Na tolu na ituvaki cava eda na veivosakitaka?

¹⁰ Meda dikeva mada e tolu na ituvaki eda na vakaraitaka kina nida lomani Jiova, oya noda talairawarawa. Ena cakacaka na lewaeloma ena veituvaki kece qori. Ia me rawa ni yaga na lewaeloma ena vinakati taumada me dusimaki ena ivakarau ni ivakatagedegede vakaivolatabu. E tolu na ituvaki eda rawa ni talairawarawa kina vei Jiova: (1) Eda lomani ira e lomana o Jiova, (2) eda dokai ira na liutaki keda, kei na (3) noda sasaga meda savasava tiko ga vua na Kalou.

Lomani Ira e Lomana o Jiova

11. Na cava meda lomani ira kina e lomana o Jiova?

¹¹ Kena imatai, e dodonu meda lomani ira e lomana o Jiova. Eda vaka na sipazi nida veimaliwai ni rawarawa noda katona na veika kece. E kila vinaka na Dauveibuli na vakarerevaki kei na vinaka ni veitokani nida sega ni uasivi. E vakarota kina: “Ena vuku mai ko koya sa malele vata kei ira na vuku: ia ko koya era veitokani vata kei na lialia ena rusa.” (Vkai. 13:20; 1 Kor. 15:33) E sega ni dua ena via “rusa.” Eda vinakata kece meda “vuku.” E sega ni vakavukui tale o Jiova ni sa vuku rawa tu, sega tale ga ni dua ena vakacaraki koya. E ivakaraitaki vinaka tale ga o koya ena veitokani. Vakasamataka mada—⁠na tamata sega ni uasivi cava ena digia o Jiova me nona itokani?

12. Na itokani vakacava e digitaka o Jiova?

¹² E okati Eparama o Jiova me ‘wekana [“nona itokani,” NW].’ (Aisea 41:8) E ivakaraitaki vinaka o Eparama ena nona yalodina, yalododonu, qai talairawarawa—⁠e turaga vakabauta. (Jeme. 2:21-23) Qori na itokani e digitaka o Jiova. Nikua, o Jiova e veitokani kei ira e va tale ga ya nodra ivakarau ni bula. Ke digitaki ira va ya nona itokani o Jiova, sega li nida na cakava vaka kina nida na vuku nida veitokani kei ira?

13. Na cava ena dusimaki keda meda digitaki ira vinaka kina noda itokani?

¹³ Na cava ena dusimaki iko mo digia vinaka kina nomu itokani? Noda vulica na ivakaraitaki vakaivolatabu ena uqeti keda dina. Vakasamataka na nodrau veitokani o Neomai kei na vugona o Ruci, o Tevita kei Jonacani, se nodrau veitokani o Timoci kei Paula. (Ruci 1:16, 17; 1 Sam. 23:16-18; Fpai. 2:19-22) E qaqaco dina na veitokani va qori: Nira yavutaki ena nodra lomani Jiova. O rawa beka ni kunea na itokani era lomani Jiova tale ga va qori? Nanuma nira na kunei na itokani va qori ena ivavakoso vaKarisito. Nira na sega ni vakavuna meda rusa vakayalo. Era na vukei keda meda talairawarawa vei Jiova, volekati koya tale ga, da qai vuataka na itovo e umani ena yalo tabu. (Wilika Kalatia 6:7, 8.) Era na uqeti iko mo tiko ga ena loloma ni Kalou.

Doka na Veiliutaki

14. Na cava eso na ka e vakadredretaka noda dokai ira na veiliutaki?

¹⁴ Na ikarua ni sala eda lomani Jiova kina e vauca na veiliutaki. E dodonu meda doka na veiliutaki. Na cava e dredre kina meda cakava qo ena so na gauna? Dua, oya nira sega ni uasivi o ira na veiliutaki. O keda tale ga eda sega ni uasivi. Eda dau sasaga meda vorata na yalo ni talaidredre, nida sucukaya mai na yalo qo.

15, 16. (a) Na cava e bibi kina meda dokai ira e lesia o Jiova ena nodra qaravi na nona tamata? (b) Na cava eda vulica ena nona raica o Jiova nodra talaidredre na Isireli vei Mosese?

¹⁵ O na rairai lomatarotarotaka, ‘Ke dredre na noda dokai ira na veiliutaki, na cava ga meda dokai ira kina?’ Na isaunitaro qori e vauca na kena vakalewai na veiliutaki cecere. O cei o na digia me nomu iliuliu cecere? Ke da digitaki Jiova me noda iLiuliu Cecere, e bibi meda doka nona veiliutaki. Ke da sega ni cakava qori, eda na okati koya beka me noda iLiuliu? E dau vakaraitaka nona veiliutaki o Jiova ni vakayagataki ira era sega ni uasivi mera qaravi ira nona tamata. Nida talaidredre vei ira e lesia o Jiova, ena raica vakacava qori o koya?​—Wilika 1 Cesalonaika 5:12, 13.

¹⁶ Kena ivakaraitaki, na nodra vosa kudrukudru na Isireli kei na nodra talaidredre vei Mosese, e raica o Jiova nira talaidredre sara tiko ga vua. (Tiko 14:26, 27) E sega ni veisau o koya. Nida talaidredre vei ira e lesia o Jiova, eda sa talaidredre sara tiko ga vua!

17. Na rai dodonu cava me tiko vei keda me baleti ira era veiliutaki ena ivavakoso?

¹⁷ E vakaraitaka na yapositolo o Paula na rai dodonu me tiko vei keda me baleti ira era lesi ena itavi ena ivavakoso vaKarisito. E vola: “Dou talairawarawa vei ira sa liutaki kemudou, ka mo dou vakamalumalumutaki kemudou: ni ra sa yadrava na yalomudou, me vakataki ira era na tukuni ira kina, me ra kitaka kina e na marau, ka sega e na vutugu: ni sa sega ni yaga vei kemudou me vakaoqori.” (Iper. 13:17) E dina ni ka ni sasaga toka meda bucina na talairawarawa kei na yalo ni vakarorogo. Ia nanuma, eda saga meda tiko ga ena loloma ni Kalou. Koya gona, sega li ni bibi na sasaga va qori?

Savasava Tiko ga Vei Jiova

18. Na cava e vinakata kina o Jiova meda savasava tiko ga?

¹⁸ Kena ikatolu, eda na vakaraitaka nida lomani Jiova ena noda saga meda savasava tiko ga vua. Era dau sasaga vagumatua na itubutubu me savasava na luvedra. Na vuna? Nodra savasava na gone ena vinaka kina nodra bula vakayago kei na ivakarau ni nodra bula. Na gone e savasava ena vakaraitaka ni savasava na vuvale e susugi mai kina, e vakaraitaka na nodrau loloma kei na nodrau kauai nona itubutubu. E vinakata tale ga o Jiova meda savasava. E kila ni bibi na savasava ena noda ivakarau ni bula. Noda savasava e vakaraitaka ni savasava na Tamada vakalomalagi. E bibi dina qori, nira na uqeti na tamata mera toro vua na Kalou, nira raica nida duatani vei ira na vo ni tamata ena vuravura ca qo.

19. Eda kila vakacava ni bibi na savasava vakayago?

¹⁹ Na sala cava soti eda na savasava tiko ga kina? Ena ivakarau kece ni noda bula. A vakamatatataka o Jiova vei ira na Isireli makawa ni bibi na savasava vakayago. (Vunau 15:31) E okati ena lawa a soli vei Mosese na veika e baleta na kena maroroi na benu, na sava ni iyaya, na kena sava na liga, yava, kei na isulu. (Lako 30:17-21; Vunau 11:32; Tiko 19:17-20; Vkru. 23:13, 14) Era dau vakadreti na Isireli, ni nodra Kalou o Jiova, e Kalou tabu—⁠kena ibalebale ni “savasava,” “taucoko,” e “cecere” tale ga. Bibi gona mera savasava tale ga na dauveiqaravi ni Kalou.​—Wilika Vunau ni Soro 11:44, 45.

20. Na sala cava soti meda na savasava tiko ga kina?

²⁰ E bibi meda savasava vakayago qai savasava tale ga na lomada. Eda na saga me savasava tiko ga noda vakasama. Eda na muria ena yalodina na ivakatagedegede i Jiova me baleta na savasava ni noda itovo, dina ni sa takalevu na ivalavala vakasisila. Koya e bibi sara, eda saga me savasava tiko ga noda sokalou, me kua ni vakadukadukalitaki keda o lotu lasu. Eda na nanuma tiko ga na ivakasala uqeti vakalou ena Aisea 52:11: “Dou lako, dou lako, lako tani eke; dou kakua ni tara na ka sa sega ni savasava; dou lako tani mai vua; dou savasava mai.” Eda na savasava tiko ga vakayalo nikua nida vakuai keda mai na ka e okati ena lotu lasu. Oya na vuna, eda na qarauna meda kua ni vakaitavi ena olodei ni lotu lasu kei na kena e takalevu tu e vuravura nikua. E dina ni ka ni sasaga meda savasava tiko ga. Ia eda na saga tiko ga na tamata i Jiova meda cakava qori nida na tiko ga kina ena loloma ni Kalou.

21. Eda na nuidei vakacava nida na tiko ga ena loloma ni Kalou?

²¹ E vinakata o Jiova meda tiko ga ena nona loloma me tawamudu. Koya gona e noda itavi yadudua meda saga ena noda vinaka kece meda tiko ga ena loloma ni Kalou. Eda na cakava qo nida vakatotomuria na ivakaraitaki i Jisu kei na noda vakaraitaka nida lomani Jiova ena noda muria nona ivunau. Nida cakava qori, eda na vakadeitaka kina ni sega ni dua na ka ena “tawasei keda mai na loloma ni Kalou, sa yaco e na vuku i Karisito Jisu na noda Turaga.”​—Roma 8:38, 39.

O se Nanuma Tiko?

• Ena yaga vakacava noda lewaeloma meda tiko ga ena loloma ni Kalou?

• Na cava meda lomani ira kina e lomana o Jiova?

• Na cava e bibi kina meda dokai ira na liutaki keda?

• Na cava e bibi kina na savasava vei ira na tamata ni Kalou?

[Kato/​iYaloyalo ena tabana e 20]

NA IVOLA E UQETA NA ITOVO VINAKA

Ena porokaramu ni soqo ni tikina ena 2008/2009, a sevutaki kina na ivola ‘Tiko ga ena Loloma ni Kalou,’ e 224 na tabana. Na cava na inaki ni ivola qo? E vakarautaki me dusimaki keda na lotu vaKarisito meda kila qai lomana na ivakatagedegede i Jiova. E vakatabakidua ena kena muri na itovo vaKarisito. Nida vulica vagumatua na ivola qo, eda na nuidei ni kena bulataki na ivakatagedegede i Jiova, e sala vinaka duadua ni bula qai rawati kina na bula tawamudu.

E vakarautaki tale ga na ivola qo me dusimaki keda ni sega ni icolacola bibi na talairawarawa vei Jiova. Ena dua tale na yasana, na noda talairawarawa e sala vinaka eda vakaraitaka kina vei Jiova nida lomani koya vakalevu. Na ivola qo ena uqeti keda meda taroga, ‘Na cava meu talairawarawa kina vei Jiova?’

Nira vakatulewataka eso mera biuta na loloma i Jiova, e sega ni kena ibalebale nira sega ni kila na ivakavuvuli, ia e vakavuna ga nodra ivalavala. E bibi gona meda vaqaqacotaka noda lomana kei na noda vakavinavinakataka na lawa i Jiova kei na kena ivakavuvuli, nira dusimaki keda ena noda bula ni veisiga! E nuitaki ni ivola vou qo ena dusimaki ira na sipi i Jiova e vuravura mera dei ena ka dodonu, mera vakadinadinataka ni dau lasulasu o Setani, mera qai tiko ga ena loloma ni Kalou!​—Juta 21.

[iYaloyalo ena tabana e 18]

“Kevaka dou sa talairawarawa ki na noqu vunau, dou na tiko ga e na noqu loloma; me vaka ka’u sa talairawarawa ki na vunau nei Tamaqu, ka tiko ga e na nona loloma”