O Bau Kila?

Na cava e vakaibalebaletaka o Paula ena “tayabe ena qaqa”?

▪ A vola o Paula: “Na Kalou . . . [e] dau liutaki keda nida tayabe ena qaqa ena noda salavata kei Karisito, meda vakatetea kina ena veivanua kece na iboi ni kena itukutuku! Vua na Kalou, eda ka boivinaka i Karisito vei ira era na vakabulai, vei ira tale ga era na vakarusai; vei ira era na vakarusai, e iboi ni mate ena tini ina mate, vei ira era na vakabulai, e iboi ni bula ena tini ina bula.”​—2 Korinica 2:​14-16.

A vakaibalebaletaka tiko o Paula na ivakarau ni nodra dau tayabe ena qaqa na kai Roma ni oti nodra ravuti na meca ni Matanitu. Na tayabe ni marau qo e dau lagiti kina na jenerali kei na nona mataivalu, era sarava na lewenivanua na itokinivalu, ra saravi ira tale ga na kai vesu. Ni oti na tayabe, e dau cabori na bulumakau ra qai rairai vakamatei e levu na kaivesu.

E kaya na International Standard Bible Encyclopedia ni “ka boivinaka i Karisito” e dusia na bula vei ira eso kei na mate vei ira eso tale, “e rairai taka mai na nodra ivalavala na kai Roma mera vakama na ka boi vinaka ena gauna ni nodra tayabe. Na ka boivinaka e vakaibalebaletaka na nodra qaqa na kai Roma, e ivakatakilakila tale ga vei ira na bobula nira na vakamatei.”a

Na cava na “veitikina cecere” e dau tukuni ena iVolatabu vakaIperiu?

▪ Nira vakarau curuma na vanua yalataki na Isireli, a tukuna vei ira o Jiova mera vakarusa na nodra vanua kece ni sokalou na kai Kenani. A vakarota: “Dou . . . vakaotia na nodra matakau ceuti kecega, ka vakaotia na nodra veimatakau vakawaicalataki, ka vakarusa na nodra veitikina cecere.” (Tiko Voli Mai na Lekutu 33:52) Na vanua ni sokalou lasu qo e rairai tu ena veidelana se vatavata cere e dau tara ena so tale na vanua, ena ruku ni vunikau se na loma ni siti. (1 Tui 14:23; 2 Tui 17:29; Isikeli 6:3) Era tu kina na icabocabonisoro, duru ni sokalou vatu se kau, ivakatakarakara, itutu ni ka boi vinaka, kei na iyaya tale eso ni sokalou.

Ni bera ni tara na valenisoro e Jerusalemi, na vanua e vinakata o Jiova mera dau sokaloutaki koya kina na Isireli e vakatokai ena iVolatabu me veitikina cecere. A vakacaboisoro na parofita ni Kalou o Samuela ena ‘veitikina cecere’ ena dua na siti e sega ni cavuti na yacana ena vanua o Sufi. (1 Samuela 9:​11-14) Ia ni sa tara oti na valenisoro era saga eso na tui yalodina mera basuraka na “veitikina cecere.”​—2 Tui 21:3; 23:​5-8, 15-20; 2 Veigauna 17:​1, 6.

[iVakamacala e ra]

[iYaloyalo ena tabana e 23]

Dua na iwase ni ivakatakarakara ceuti ni tayabe ni qaqa e Roma ena ikarua ni Senitiuri S.K.

[Credit Line]

Photograph taken by courtesy of the British Museum

[iYaloyalo ena tabana e 23]

iVovo ni duri ni sokalou vatu mai Keseri