O Rawa ni Lomavakacegu?

“Na lomavakacegu e vakavutuniyautaki ira na dravudravua; ia na sega ni lomavakacegu e vakadravudravuataki ira na vakavatu.” ​—Benjamin Franklin.

E LEVU era vakadinadinataka na ivosavosa oya, era kila ni lomavakacegu e sega ni voli. Sa rauta me dredre ni kune na lomavakacegu ena vuravura e uqeta na gadrevi vakasivia ni iyau, na rawaka, se na ivakarau ni bula era taleitaka eso tale! E vakamua na nomu bula eso na ka e tukuni toka qo?

• E weroki ena itukutuku ni veivoli ni o na lomavakacegu ga ke o volia e levu na ka.

• Na veisisivi ena vanua ni cakacaka se koronivuli e vakauqeta na vakasama ni o yaga ga ke o cakava na ka kece era cakava na so.

• E sega ni dau vakavinavinakataki na veika o cakava ena vukudra.

• Era vakavuna na nomu itokani mo vuvutaka na veika era taukena.

• E sega tiko ga ni saumi na taro bibi o via kila me baleta na bula.

Ena ituvaki qori, o se rawa ga ni lomavakacegu? E tukuna na yapositolo o Paula “na sala ni lomavakacegu.” Ena so na gauna e levu na ka e tu vua, ena so tale na gauna e lailai sara. Era dau qoroi koya na nona itokani, ia eso tale era vakalialiai koya. Ia e kaya ni “sa vulica oti me ciqoma ena yalovakacegu na ka ga sa soli vua.”​—Filipai 4:​11, 12, New International Version.

Koya gona, vei ira era sega ni kila na sala mera lomavakacegu kina, e tukuna na yapositolo o Paula ni rawa mera vulica. Moni raica mada e lima na sala e tukuni ena iVolatabu moni vulica kina na lomavakacegu.