Kena iKava

Digia Vinaka na Nomu iTokani

NA CAVA E KAYA NA IVOLATABU? “Ena vuku mai ko koya sa malele vata kei ira na vuku.”​—Vosa Vakaibalebale 13:20.

NA CAVA E VAKADREDRETAKA QO? Era na rawa ni vakavuna na noda itokani meda lomavakacegu tiko ga se meda sega ni lomavakacegu. Na nodra rai kei na veika era talanoataka ena tara vakalevu tale ga na ivakarau ni noda rai me baleta na bula.​—1 Korinica 15:33.

Me kena ivakaraitaki, meda raica mada na itukutuku ena iVolatabu me baleta e 12 na tagane eratou lesu mai ena dua na ilakolako i Kenani. E le tini eratou “tukuna vakaca, vei ira na Isireli, na vanua eratou a la’ki raica.” Ia e rua erau tukuna ni o Kenani e “vanua vinaka vakaidina.” E tete vei ira na Isireli na nodratou itukutuku ca na le tini. “A ra sa tabalaka cake na domodra ka qoqolou nai soqosoqo taucoko,” e kaya na kena itukutuku, ‘a ra sa didi o ira kece ga na Isireli.’​—Tiko Voli Mai na Lekutu 13:30–14:9.

E levu tale ga nikua “era dau vosakudrukudru, era sega ni lomavakacegu ena kedra ituvaki.” (Juta 16) Ena vakadredretaka gona na noda lomavakacegu tiko ga nida dau veitokani kei ira era sega ni dau lomavakacegu.

NA CAVA O RAWA NI CAKAVA? Mo vakasamataka mada na veika o dau veitalanoataka kei ira na nomu itokani. Era dau sakitaka na veika era taukena ra qai vosa kudrukudru ni sega vei ira na ka? O itokani vakacava? O dau saga mera qati iko na nomu itokani, se o dau vakayaloqaqataki ira mera lomavakacegu ena veika sa tu vei ira?

Vakasamataka na ivakaraitaki i Tevita sa digitaki tu me na tui, kei Jonacani na luvei Tui Saula. A veidroyaki voli ena vanualiwa o Tevita. E vinakata o Tui Saula me vakamatei ni rivarivabitaka na nona itutu vakatui. O Jonacani e dodonu me tui ni mate o tamana, ia a yaco me itokani dredre i Tevita. E kila o Jonacani ni sa digitaki Tevita oti tu na Kalou me na tui mani lomavakacegu me tokoni nona itokani.​—1 Samuela 19:​1, 2; 20:​30-33; 23:​14-18.

Oya na mataqali itokani mo digia, na itokani e saga mo lomavakacegu qai kauaitaka na veika mo vinaka kina. (Vosa Vakaibalebale 17:17) Koya gona, mera galeleti iko na itokani va qo ena gadrevi mo bulataka na kena itovo.​—Filipai 2:​3, 4.

[iYaloyalo ena tabana e 7]

Era vakavuna na nomu itokani mo lomavakacegu tiko ga se mo sega ni lomavakacegu?