Ena Vakalougatataki na Nomu Sasaga!
E BIBI na Sokalou Vakavuvale ena nodra tuberi na gone “ena ivakavuvuli kei na ivakasala i Jiova.” (Efeso 6:4) Ke o itubutubu, o na vakadinata ni dau totolo na nodra yamasamasa na gone. Na cava mo cakava me kua ni yaco qori? Raica mada na ka era cakava eso na itubutubu.
E tukuna o George mai Kalifonia, Merika: “Ni ratou se lalai na gone, keirau dau saga vakaveiwatini me bulabula na neitou Sokalou Vakavuvale. Eso na gauna, keitou dau vakaisulu sara ga me vakataki ira era talanoataki ena iVolatabu, keitou qai dramataka e dua na italanoa keitou wilika ena ivola iTalanoa mai na iVolatabu. Keitou cakava mada ga na kena iyaya—na iseleiwau, ititoko, basikete, kei na so tale. Keitou qitotaka na qito vakaivolatabu me vaka na ‘kilakilai au mada,’ e volai tale ga ena papa na taro vakaivolatabu, eso e rawarawa eso e dredre. E tiko tale ga eso na ka me keitou cakava vakavuvale me vaka na vakekeli, droini, keitou dau cakava eso na ivakatakarakara me vaka na waqa i Noa se keitou dau droinitaka tale ga na ituvatuva ni gauna ena iVolatabu. Eso na gauna, keitou dau droinitaki ira era vakamacalataki ena iVolatabu se dua na ka e talanoataki kina. Ena gauna qo, keitou nanuma tiko me keitou droinitaka na iyaragi vakayalo e tukuni ena Efeso 6:11-17, keitou qai lesi me keitou vakamacalataka na ka e vakatakarakarataki ena iyaragi yadua. Keitou raica ni marautaki vakalevu na neitou sokalou vakavuvale ni muri na iwalewale va qori.”
E tukuna o Debi, e dua na tina mai Michigan, Merika: “Ni se qai yabaki tolu toka o luvei keirau yalewa, a dredre na neirau saga vakaveiwatini me kauaitaka na ka e vakavulici kina. Ni keitou wilika tiko vakadomoilevu ena dua na siga na italanoa me baleti rau o Aisake kei Repeka ena ivola iTalanoa mai na iVolatabu, au taura sara e rua na matakau ni vakatatalo me rau matanataka na ka e talanoataki, au qai bulia na ka erau na rairai kaya o rau na talanoataki tiko. E vakarogoca vinaka sara toka o luvei keirau na ka kece e tukuni! Ena vica na vula tarava, erau sa vakayagataki na matakau ni vakatatalo qori me rau vakatakarakarataki ira e levu era talanoataki ena iVolatabu. Ni keitou wilika oti e dua na italanoa, e dau vaqara wavoki e loma ni vale o luvei keirau na iyaya ni vakatatalo se so tale na ka e rawa ni vakayagataki me matanataki kina na italanoa. Na vaqaqara e dau cakava e vaka ga e vaqara tiko na iyau talei! A veisautaki e dua na kateni ni vava me vale nei Reapi, qai kena dali damudamu e dua na reveni damudamu. A vivigi tale ga ena sasa e dua na gata ni vakatatalo e 1.5 na mita na kena balavu, qori e ganita vinaka na gata parasa e tukuni ena Tiko Voli Mai na Lekutu 21:4-9. Keitou maroroya kece tu na iyaya qori ena dua na taga levu. Keirau dau marau ni keirau raici luvei keirau ni dabe toka qai vakayanaka na taga sa vakatokai tiko me nona ‘taga ni italanoa vakaivolatabu.’ E dau vakavumarau dina na nona matanataka na italanoa ena iwalewale e taleitaka sara ga o koya!”
E sega ni rawarawa na susu gone. E bibi mera vukei luvedra na itubutubu mera taleitaka mera qaravi Jiova. E bibi mera cakava qori e veisiga, qai levu na iwalewale era rawa ni cakava kina qori. Ia na sokalou vakavuvale e veimacawa e bibi ena nodra sasaga na itubutubu. E sega ni vakabekataki ni na vakalougatataki dina na nodra sasaga!