iTuvatuva Vakavuvale—Vuli iVolatabu
1 Na iloloma vinaka duadua e rawa ni solia e dua na itubutubu lotu Vakarisito vua na luvena oya na nona vakavulici koya me lomani Jiova. E vanua vinaka sara ga “na nomuni vale” me tekivutaki kina na vuli iVolatabu vakavuvale ena veimacawa. (Vkru. 6:5-7) Ke sega mada ga ni vakabauta o watimu, se ra duidui vakabauta na lewe ni nomu vuvale, se o itubutubu le dua, o se rawa tiko ga ni tuberi luvemu ena nomudrau vuli wasoma mo drau veivolekati kina, me volekati Jiova tale ga.
2 Ni Tekivutaki na Vuli: Me tuvanaki taumada e dua na gauna ni vuli vakavuvale. Ke dou sega ni vakadeitaka rawa na kena gauna, vakacava mo dou veivosakitaka vakavuvale. (Vkai. 15:22) Ke ra tiko na lalai, de dua e vinaka me lekaleka ga na vuli e caka ena veimacawa. Saga mo raica se ituvatuva cava e ganiti ratou e vale. Me biu sara ga e dua na gauna ni vuli vakavuvale ena nomudou ituvatuva, mo dou dei tale ga kina.
3 Na ivola cava beka dou rawa ni vulica? So era dau vulica na kena ena veivosakitaki ena Vulivola ni iVavakoso se na Vuli ni Vale ni Vakatawa. So tale era vulica na kena e vakatabakidua vei ira na itabagone. E kaya e dua na tama e rua na luvena, dua e tagane dua e yalewa: “Dua na vu ni nodrau taleitaka vakalevu na gone na vuli ena veimacawa, oya ni keitou dau dramataka sara ga na italanoa ena ivola iTalanoa Mai na iVolatabu. Na ka era raica kina na gone kei na titobu ni ka era vulica e uasivia sara na vulici ni vica vata na parakaravu.”
4 Vuli e Veimacawa: E dodonu me caka na vuli vakavuvale e veimacawa, me ka tale ga era nanamaki dina kina na lewenivuvale. Ni yaco e so na ituvaki tawanamaki, me navuci e dua tale na siga se gauna ni vuli vakavuvale. De so tale na gauna ena yaco e so na veiveisau ena ka me vulici. Ia, me kua ga ni dede na nomudou gole tani mai na ituvatuva vakavuvale dou sa navuca oti. E kaya e dua na goneyalewa ena dua na vuvale: “Ke dua na veisau ena gauna ni neitou vuli vakavuvale, e dau vakabira o Ta na kena gauna vou ena isogo ni fridge, me keitou rawa ni kila kece.” Sa bau dua dina na ivakaraitaki vinaka me rawa ni dei tiko ga kina na vuli vakavuvale! Koya gona, ni o tuberi ira na luvemu ena “[i]vunau kei nai vakavuvuli ni Turaga [“o Jiova,” NW]” o sa vakaraitaka tiko kina nomu lomani ira kei na Tamada Vakalomalagi.—Efeso 6:4.