Na Cava na iTukutuku Vinaka?

“Na itukutuku vinaka . . . ”—MACIU 24:14.

E DODONU mera vunautaka yani na “itukutuku vinaka ni matanitu” na lotu vaKarisito, nira vakamacalataka ni qo na Matanitu duadua ga ena veiliutaki vinaka ena veisiga mai muri. Ia na vosa “itukutuku vinaka” e taurivaki ena so tale na sala ena iVolatabu. Me kena ivakaraitaki, e dau cavuti kina na “itukutuku vinaka ni veivakabulai” (Same 96:2, NW); “na itukutuku vinaka ni Kalou” (Roma 15:16); kei na “itukutuku vinaka kei Jisu Karisito.”—Marika 1:1.

Na itukutuku vinaka e okati kina na ka dina kece a cavuta o Jisu ra qai vola na nona tisaipeli. Ni bera ni lako i lomalagi, a tukuna vei ira na nona imuri: “Ni lako moni vakavulici ira na lewe ni veivanua kece ga mera noqu tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni.” (Maciu 28:19, 20) O ira gona na lotu vaKarisito dina era na sega wale ga ni tukuna vei ira eso tale na Matanitu, ia era na vakavulici ira tale ga mera tisaipeli.

Na cava era sa cakava tiko na veimatalotu ena tikina qo? E levu era sega ni kila na Matanitu ni Kalou, ena sega gona ni donu na ka era vakavulica vei ira tale eso. Era vunautaka ga na vosoti ni ivalavala ca kei na nona vakabauti o Jisu, na ka era taleitaka mera rogoca na lewenilotu. Era vakatorocaketaka na nodra bula na lewenivanua ena nodra tara na valenibula, koronivuli, kei na nodra vale na dravudravua mera rawata kina na nodra lewenilotu. Na nodra cakava qori ena rairai tubu kina na iwiliwili ni nodra lewenilotu, ia era sega ni bulataka na ivakarau ni bula a vakatavulica o Jisu mera muria na lotu vaKarisito dina.

A vola e dua na daunicioloji: “Era duavata e levu na vuku se na iliuliu ni lotu ni dodonu meda vakavulici ira eso tale mera tisaipeli i Jisu, mera cakava tale ga ka kece e tukuna. . . . E matata vakasigalevu na ivakaro i Jisu me baleta na tikina qo. Ia eda sega ni cakava na ka e tukuna. Eda sega ni sasagataka vagumatua. Na kena dina eda sega ga ni kila meda cakava vakacava.”

Ena vakasama vata qo, na nodra vakatarogi na lotu Katolika mai Mereke, e laurai ni 95 na pasede era duavata ni dodonu ena nodra vakabauta mera vunautaka na itukutuku vinaka. Ia voleka nira kaya kece ni sala vinaka duadua oya mera ivakaraitaki vei ira tale eso, mera kua ga ni veivosakitaka. Dua gona vei ira na vakatarogi e kaya: “Na veivakalotutaki e sega ni vosa, vosa, vosa. O keda sara ga meda iTukutuku Vinaka.” E kaya na mekesini e liutaka na veivakatarogi qo na U.S. Catholic, e levu era sega ni via tukuna yani na nodra vakabauta ena vuku ni “rogorogo ca ni lotu nira vakasagai na gone ena dua na gauna wale tiko ga qo kei na veilecayaki ni kena ivakavuvuli.”

Ena dua tale na vanua, e rarawataka e dua na bisovi ni lotu Wesele nira tawase qai veilecayaki nona lotu, era sega ni doudou ni qarava na nodra itavi, kei na nodra ivakarau ni bula e tautauvata ga kei ira na sega ni lotu. Ena levu ni nona rarawa, a kaya: “O cei tale me qai nuitaki me kacivaka na itukutuku vinaka ni Matanitu ni Kalou?”

A sega ni sauma rawa na bisovi na isau ni nona taro. Ia e tiko na kena isau. O na kila qori ena ulutaga tarava.

[Tikina bibi ena tabana e 6]

Na itukutuku vinaka e baleta na Matanitu ni Kalou kei na noda vakabulai nida vakabauti Jisu Karisito