“Lako Moni Vakavulici Ira na Lewe ni Veivanua Kece ga Mera Tisaipeli”

1, 2. Na taro cava e basika ena ka e tukuna o Jisu ena Maciu 24:14?

KE RA mani duavata kei keda eso se tusaqati keda vakaukaua, e levu era na kaya nida kilai levu na iVakadinadina i Jiova ena noda cakacaka vakavunau. De dua o sa sotava eso ena cakacaka vakaitalatala era sega ni duavata kei na noda vakabauta, ia era doka na noda cakacaka. Eda kila ni parofisaitaka o Jisu ni na vunautaki mada na itukutuku vinaka ni Matanitu ni Kalou ena veiyasa i vuravura. (Maciu 24:14) Ia eda na kila vakacava ni sa vakayacori tiko na parofisai i Jisu ena cakacaka eda vakaitavi tiko kina? Vakacava e ivakaraitaki ni dokadoka ke da nanuma ni o keda ga eda vakaitavi ena cakacaka qo?

² E levu na matalotu era nanuma nira sa vunautaka tiko na Kosipeli se itukutuku vinaka. Ia na nodra sasaga qori e dau laurai ga ena nodra vunau e valenilotu, porokaramu e kaburaki ena retioyaloyalo se Internet. Eso tale era vakaraitaka qo ena nodra cakacaka ni veivuke se so na sasaga ena veika vakavuniwai se vuli. E tautauvata vakacava qori kei na ka e vakaroti ira kina nona tisaipeli o Jisu mera cakava?

3. Na cava e va na ka mera cakava na imuri i Jisu ena Maciu 28:19, 20?

³ Vakacava o ira na tisaipeli i Jisu, era waraka mera gole yani na tamata? Sega! Ni vakaturi o Jisu, e tukuna vei ira na vica na drau na nona tisaipeli: “O koya gona, ni lako moni vakavulici ira na lewe ni veivanua kece ga mera tisaipeli, ni papitaisotaki ira . . . , vakavulici ira mera muria na ka kece au vakarota vei kemuni.” (Maciu 28:19, 20) E va na ka e vinakati kina. E dodonu meda veivakatisaipelitaki, veipapitaisotaki da qai veivakavulici, ia cava na imatai ni ka meda cakava? E kaya o Jisu: “Lako”! E tukuna e dua na vuku ni iVolatabu me baleta na ivakaro qori: “E nona itavi e dua e vakabauta me ‘lako,’ ke mani taubale e gaunisala se sokota na wasawasa.”—Maciu 10:7; Luke 10:3.

4. Na cava e vakaibalebaletaka na “gonedau ni tamata”?

⁴ Vakacava e vakaibalebaletaka o Jisu ni kena vunautaki na itukutuku vinaka ena gadrevi ga kina noda sasaga yadua se me tuvanaki me dua na ilawalawa? Ke dua ga me na lako e “veiyasa i vuravura,” ena sega ni rawarawa, ena vinakati kina nodra sasaga e levu. Ni sureti ratou nona tisaipeli o Jisu me ratou “gonedau ni tamata” e dusia ni vinakati kina e levu. (Wilika Maciu 4:18-22.) E sega ni vakaibalebaletaka tiko o Jisu nona siwa duadua tiko ga e dua na dausiwa me waraka toka na ika me katia na baca. Ia e dusia ni na vakayagataki na lawa ni qoli, qori e okati kina na cakacaka vakaukaua, tuvatuvanaki vakamatau, me lewe levu tale ga era cakacaka vata kina.—Luke 5:1-11.

5. Na cava e va na taro me saumi, na vuna?

⁵ E bibi meda sauma e va na taro qo meda kila kina se o cei era vunautaka tiko nikua na itukutuku vinaka ena kena vakayacori na parofisai i Jisu:

• Na itukutuku cava me vakasavui ena cakacaka vakavunau?

• Na cava me noda inaki nida vakaitavi ena cakacaka qo?

• Na iwalewale cava me muri?

• Me vakacava na rabailevu kei na dede ni cakacaka vakavunau?

Na isau ni taro qori eda na rawa ni kila kina se o cei era vakayacora tiko na cakacaka ni veivakabulai qo, meda yalodina tale ga kina.—1 Tim. 4:16.

NA ITUKUTUKU

6. Na cava o nuidei kina ni donu na itukutuku eda vunautaka tiko na iVakadinadina i Jiova?

⁶ Wilika Luke 4:43. E vunautaka o Jisu na “itukutuku vinaka ni Matanitu ni Kalou,” e vinakata tale ga mera cakava qori na nona tisaipeli. O cei era vunautaka tiko na itukutuku qori ena “veivanua kece ga”? O keda ga na iVakadinadina i Jiova. Eso mada ga vei ira na dau veitusaqati era vakadinadinataka qori. Kena ivakaraitaki, e tukuna e dua na bete daukaulotu vua e dua na tacida ni sa lakova e levu na vanua, e dau tarogi ira tale ga na iVakadinadina ena veivanua ya se itukutuku cava era vunautaka tiko. E kaya na bete: “Era sa lialia dina, nira kaya kece ga: ‘Na itukutuku vinaka ni Matanitu ni Kalou.’” Ia era sega ni “lialia,” era duavata ga, ni qori e dodonu me nodra ivakarau ga na lotu vaKarisito dina. (1 Kor. 1:10) E voqa tale ga na itukutuku qori ena Vale ni Vakatawa Kacivaka na Matanitu i Jiova. E wiliki na mekesini qori ena 254 na vosa, ena dua na vula ena tabaki kina e voleka ni 59 na milioni na ilavelave, e mekesini veisoliyaki vakalevu duadua kina e vuravura.

7. Eda kila vakacava ni sega ni donu na itukutuku era vunautaka tiko na iliuliu ni lotu ni Veivanua vaKarisito?

⁷ Era sega ni vunautaka tiko na Matanitu ni Kalou na iliuliu ni lotu ni Veivanua vaKarisito. Ia ke ra veivosakitaka, levu era na rairai vakaibalebaletaka tiko ga ina ivakarau ni lomana e dua na lotu vaKarisito. (Luke 17:21) Era sega ni vukei ira na lewenivanua mera kila ni Matanitu ni Kalou e matanitu vakalomalagi e kena iLiuliu o Jisu Karisito. Na Matanitu qori ena walia noda leqa, ena vakarau vakarusa tale ga na ka ca e vuravura. (Vkta. 19:11-21) Ia era vinakata me nanumi o Jisu ena Kirisimasi se Easter. E vaka mera sega ni kila tu se cava ena cakava o Jisu ni sa iLiuliu vou kei vuravura. Nira sa sega ni kila ga na itukutuku e dodonu mera vunautaka, e macala ga nira sega tale ga ni kila na inaki ni nodra cakacaka.

NODA INAKI

8. Na cava e sega ni inaki ni cakacaka vakavunau?

⁸ Na cava me inaki ni noda cakacaka vakavunau? E sega ni kena inaki na kumuni ilavo kei na tara ni vale lelevu. E tukuna o Jisu vei ratou nona tisaipeli: “E soli wale vei kemudou, dou solia wale tale ga.” (Maciu 10:8) Na Vosa ni Kalou e sega ni dodonu me ka ni rawa ilavo. (2 Kor. 2:17, vmr.) E sega ni dodonu mera rawaka ena vunautaki ni itukutuku qo o ira na vakaitavi kina. (Wilika Cakacaka 20:33-35.) E matata tu na idusidusi qori, ia era kauaitaka e levu na lotu na kumuni ilavo se mera rawa ilavo. Ena vinakati mera tokona e dua na iliuliu ni lotu e saumi, okati tale ga kina e levu tale era vakacakacakataki. E levu na gauna era kumuna na iliuliu ni lotu ni Veivanua vaKarisito e levu na iyau.—Vkta. 17:4, 5.

9. Eda vakaraitaka vakacava ni donu na inaki ni noda cakacaka vakavunau?

⁹ Na cava e kilai me baleti keda na iVakadinadina i Jiova ena ka e vauca na soli? E tokoni noda cakacaka ena cau e sega ni lavaki. (2 Kor. 9:7) E sega ni caka na soli ena noda Vale ni Soqoni se soqo ni veiwasewase. Ia ena yabaki sa oti, eda vakayagataka e 1.93 na bilioni na aua ena vunautaki ni itukutuku vinaka, eda vakavulica wale tale ga e sivia e ciwa na milioni ena iVolatabu e veivula. E kurabuitaki kina nida sega ni saumi da qai marautaka meda qaravi keda ga vakailavo. E tukuna kina e dua na daunivakadidike me baleta na noda cakacaka na iVakadinadina i Jiova: “Na ka e bibi duadua na vunau kei na veivakavulici. . . . E sega ni dua na italatala e saumi, qo e vakabula ilavo dina.” Cava gona e noda inaki me baleta na cakacaka qo? Nida lomani Jiova dina mai vu ni lomada kei ira na wekada. Na yalorawarawa qori e vakayacori kina na parofisai ena Same 110:3. (Wilika.)

KENA IWALEWALE

10. Na iwalewale cava e muria o Jisu kei ira nona tisaipeli ena vunau?

¹⁰ Na iwalewale cava e muria o Jisu kei ira nona tisaipeli ena vunautaki ni itukutuku vinaka? Era vunau ena vanua kece ga era tu kina na tamata. Kena ivakaraitaki, era vunau ena salatu kei na makete. Era vakasaqarai ira tale ga ena nodra dui vale. (Maciu 10:11; Luke 8:1; Caka. 5:42; 20:20) Na iwalewale qori e sega kina na veivakaduiduitaki.

11, 12. Vakatauvatana na sasaga era cakava na lotu ni Veivanua vaKarisito kei keda na dauveiqaravi i Jiova me baleta na vunautaki ni itukutuku vinaka.

¹¹ Vakacava era cakava tale ga qori na lotu ni Veivanua vaKarisito? Era raica na lewe ni nodra lotu ni nodra itavi ga na italatala mera vunau, nira saumi kina. Ia era sega ni “gonedau ni tamata” na nodra italatala, era kauaitaka ga vakalevu mera karoni ira na lewe ni ivavakoso sa tu rawa. Ena so na gauna, era dau muria eso na nodra italatala eso na iwalewale ni veivakalotutaki. Kena ivakaraitaki, ena itekitekivu ni yabaki 2001 e vola kina na tui tabu o John Paul II: “Ena veiyabaki sa sivi au dau taleva na ivunau me baleta na iwalewale vou ni veivakalotutaki. Au tokaruataka tale qo . . . Meda yalogu tale me vakataki Paula, ni kaya: ‘Au na kalouca keu sega ni vunautaka na Kosipeli.’” E kaya tale na tui tabu ni itavi qo “e sega ni rawa ni vakatautaki ga vei ira na ‘kenadau,’ e dodonu me nodra itavi kece na Tamata ni Kalou.” Ia e le vica era sa muria na ka e tukuni qori?

¹² Ia vakacava o keda na iVakadinadina i Jiova? O keda duadua ga eda vunautaka nona sa veiliutaki tiko mai vakatui o Jisu ena 1914. Eda vakabibitaka na cakacaka vakavunau me vaka na ivakaro i Jisu. (Mari. 13:10) E vakamacalataki ena ivola Pillars of Faith—American Congregations and Their Partners: “E bibi duadua vei ira na iVakadinadina i Jiova na kaulotu.” E tomana o koya e vola na ivola qori, me baleta na ka e tukuna e dua na iVakadinadina: “Nira sotavi ira na walokai, ira na galili, se tauvimate, era na saga mera veivuke, . . . Ia era sega ni guilecava ni nodra itavi bibi mera vakasavuya na itukutuku vakayalo me baleta na icavacava ni vuravura sa roro tiko mai kei na sala me rawati kina na bula tawamudu.” Eda se vunautaka tiko ga na itukutuku qori na iVakadinadina i Jiova, nida muria na iwalewale a vakayagataka o Jisu kei ira na nona tisaipeli.

KENA RABAILEVU, KENA DEDE

13. Me vakacava na rabailevu ni cakacaka vakavunau?

¹³ E tukuna o Jisu me baleta na rabailevu ni cakacaka qo ni na vunautaki e “veiyasa i vuravura” na itukutuku vinaka. (Maciu 24:14) E vinakati mera tisaipeli na “lewe ni veivanua kece ga.” (Maciu 28:19, 20) Qori e vinakati kina na cakacaka e vuravura raraba.

14, 15. Na ivakadinadina cava e dusia nida sa vakayacora na parofisai i Jisu me baleta na rabailevu ni cakacaka? (Raica na imatai ni iyaloyalo.)

¹⁴ Me rawa nida kila se da vakayacora vakacava na iVakadinadina i Jiova na parofisai i Jisu me baleta na rabailevu ni cakacaka vakavunau, meda dikeva mada eso na itukutuku dina. E rauta ni 600,000 na italatala ni lotu Veivanua vaKarisito e Merika, ia na iwiliwili ni iVakadinadina i Jiova ena vanua qori e rauta ni 1,200,000. E vuravura raraba e via 400,000 vakacaca na bete ni Lotu Katolika vakaRoma. Vakasamataka na keda iwiliwili na iVakadinadina eda vunautaka tiko na Matanitu ni Kalou. E vuravura raraba, e rauta ni walu na milioni eda bole meda vunau ena 240 na vanua. E vakatubuqoroqoro dina na cakacaka sa vakayacori tiko, me vakacaucautaki qai vakalagilagi ga kina o Jiova!—Same 34:1; 51:15.

¹⁵ Nida iVakadinadina i Jiova, eda vinakata meda vunautaka na itukutuku vinaka vei ira e levu ni bera na icavacava. Qori na vuna eda duatani kina ena vakadewataki ni ivola vakaivolatabu kei na kena vakarautaki. Eda veisoliyaka wale e levu sara na ivola, mekesini, tikidua, ivola ni veisureti ni soqo vakaiwasewase kei na iVakananumi. E vakarautaki e levu na ivola vakaivolatabu qori ena sivia na 700 na vosa. E vakarautaki rawa e sivia e 200 na milioni na iVolatabu-Vakadewa ni Vuravura Vou ena 130 vakacaca na vosa. Ena yabaki sa oti mada ga e rauta ni 4.5 na bilioni na ivola vakaivolatabu e vakarautaki rawa. Sa tiko tale ga ena noda website vakadonui e sivia e 750 na vosa. Na ilawalawa cava tale ni lotu era cakava tiko qori?

16. Eda kila vakacava ni tokoni keda na iVakadinadina i Jiova na yalo tabu?

¹⁶ Ena vakacava na dede ni cakacaka vakavunau? E tukuna o Jisu ni na yacova sara na ivakataotioti ni veisiga, “sa na qai yaco [e muri] na icavacava.” Na isoqosoqo lotu cava tale e vunautaka tiko na itukutuku vinaka me yacova na iotioti ni veisiga qo? Era na kaya beka eso eda sotava ena cakacaka vakaitalatala, “E tiko vei keimami na yalo tabu, ia o kemuni oni cakava tiko na kena cakacaka.” Na noda vosota tiko na cakacaka qo e vakaraitaka ni tokoni keda na yalo tabu ni Kalou. (Caka. 1:8; 1 Pita 4:14) Era saga eso na matalotu mera vakatotomuri keda na iVakadinadina i Jiova ena noda dau vunau, ia e matewale na sasaga qori. Eso era cakava na cakacaka ni kaulotu ena dua na gauna lekaleka, oti ga era sega ni rawata. Eso tale era saga mada ga mera gole e veivale, ia na cava era lai vunautaka? Na kena isau e vakaraitaka nira sega ni cakava tiko na cakacaka e tekivutaka o Jisu.

O CEI ERA VUNAUTAKA TIKO NA ITUKUTUKU VINAKA NIKUA?

17, 18. (a) Eda vakadeitaka vakacava ni o keda na iVakadinadina i Jiova eda vunautaka tiko nikua na itukutuku vinaka? (b) E rawa vakacava nida tomana tiko ga na cakacaka qo?

¹⁷ O cei gona e vunautaka dina tiko na itukutuku vinaka ni Matanitu ni Kalou nikua? Eda rawa ni tukuna ena nuidei: O keda na “iVakadinadina i Jiova!” Na cava eda nuidei kina? Ni donu na itukutuku eda vunautaka tiko, qori na itukutuku vinaka ni Matanitu ni Kalou. Nida gole yani vei ira na tamata e vakaraitaka nida muria tiko na iwalewale donu ni vunau. E donu na inaki ni noda cakacaka vakavunau—e yavutaki ena loloma, sega ni rawaka vakailavo. E rabailevu duadua na noda cakacaka, eda vunau vei ira kece na lewe ni veimatanitu kei na duivosavosa. Eda na sega ni soro ena cakacaka qo, me yacova na icavacava.

¹⁸ Eda qoroya dina na veika eda sa cakava rawa na dauveiqaravi ni Kalou ena gauna vakatubuqoroqoro eda sa bula tu kina qo. Ia e rawati vakacava? Na kena isau e kune ena ivola i Paula vei ira e Filipai: “Na Kalou sara ga e cakacaka tiko vei kemuni me salavata kei na ka e vinakata, moni kua kina ni vinakata wale ga, moni cakava sara ga.” (Fpai. 2:13) Me uqeti keda tiko mada ga na Tamada dauloloma nida vakacavara vinaka na noda cakacaka vakaitalatala.—2 Tim. 4:5.