Eparama​—Na Turaga Yalomalumalumu

Ni dadabe toka o Eparama ena mata ni nona valelaca donuya na gauna e warumisa sara tu ga kina na katakata ni siga, e tacake qai raica e tolu na turaga eratou veisiko yani ena yasayasa oya.a Sega ni bera nona cici me lai tavaki ratou, a kerea me ratou cegu vakalailai ena nona vale, me lai vakarautaka mai eso na kakana. A lomasoli me solia vei ratou e dua na “tiki ni madrai,” ia a vakarautaka e dua na kakana levu wili kina na madrai se qai vavi ga, na bata, sucu, kei na lewenimanumanu malumu. Dua na ka na nona veikauaitaki o Eparama, ia e dua tale na nona itovo eda na dikeva qo, na yalomalumalumu.​—Vakatekivu 18:1-8.

NA CAVA NA YALOMALUMALUMU? O koya e yalomalumalumu e sega ni dokadoka se viavialevu. E dau okati ira na kena vo mera uasivi koya. (Filipai 2:3) E dau rogoca na nodra nanuma eso tale qai tu vakarau me cakava na itavi lolovira ena vukudra.

A VAKARAITAKA VAKACAVA O EPARAMA NA YALOMALUMALUMU? A dau veiqaravi ena marau o Eparama. Me vaka e tukuni ena itekivu ni ulutaga qo, ni raici iratou na tolu na vulagi o Eparama, a vakusakusa me lai vakarautaka na veika me baleti ratou. E vakarautaka vakatotolo na kakana o Sera na watina. Dikeva mada o cei e oga tale ga vakalevu: A cici o Eparama me lai tavaki ratou na vulagi qai lomasoli me vakarautaka na ka me ratou kania, a cici me lai kauta mai e dua na nona manumanu me vakamatea qai biuta e matadratou na kakana kece a vakarautaka. E sega ni talai ira na nona dauveiqaravi mera cakacaka, a cakava sara ga o koya na ka e gadrevi. E sega ni okata me ka beci na nodra qaravi eso tale.

A rogoca na nodra nanuma na nona lewenivuvale. E tukuni ena iVolatabu e vica na gauna erau veivosaki kina o Eparama kei Sera. Ia e rua na vanua e tukuni kina ni rogoca o Eparama na nanuma i Sera qai cakava sara. (Vakatekivu 16:2; 21:8-14) Ena dua na gauna, na ka e tukuna o Sera a “ka ni rarawa sara vei Eparama.” Ia ni vosa vei Eparama o Jiova qai tukuna ni donu na vakatutu i Sera, a yalomalumalumu o Eparama qai cakava sara.

NA CAVA EDA VULICA KINA? Ke da yalomalumalumu dina, eda na marau ni qaravi ira tale na so. Eda na marau ni cakava na ka eda rawata meda veivakacegui kina.

Eda rawa tale ga ni vakaraitaka na yalomalumalumu nira tukuna eso tale na nodra nanuma. Meda kua ni vakacala na ka e tukuni baleta wale ga ni sega ni noda nanuma, ia meda yalorawarawa ni rogoca na ka era tukuna eso tale. (Vosa Vakaibalebale 15:22) E gadrevi vakalevu me kua ni qiqo na nodra rai o ira e soli vei ira na lewa. E tukuna o John sa dede nona supavaisa voli: “Au raica ke vinaka na iliuliu, era na doudou eso tale mera talaucaka na nodra nanuma.” E tomana: “Ke dua e vakarurugi ena nomu lewa, ena vinakati mo yalomalumalumu ni ciqoma ni vinaka cake na ka e vakatututaka. Ia meda nanuma tiko ni sega ni dua vei keda e dau vinaka tu ga na nona vakatutu, wili kina o ira na iliuliu.”

Nida vakatotomuri Eparama meda rogoca na nodra nanuma eso tale da qai cakava na itavi lolovira ena vukudra, ena vakadonui keda o Jiova. E “cati ira na viavialevu na Kalou, ia e vakaraitaka nona loloma soli wale vei ira na yalomalumalumu.”​—1 Pita 5:5.

[iVakamacala e ra]