Vanua e Maroroi Kina na Keda iTukutuku Makawa
Na iTukutuku Yaga me Baleti Keda
E TALEI na keda ivolatukutuku makawa na dauveiqaravi i Jiova me baleta na noda qaravi koya voli mai ena dua na gauna balavu. Eda sega wale ga ni wilika qori ena ivola vakaivolatabu, ia eda rawa ni kila tale ga ena itaba, ivola, italanoa, kei na so na iyaya makawa e vakayagataki ena ka e vauca noda sokalou, noda cakacaka vakavunau kei na keda itukutuku makawa. Ia na cava e yaga kina me maroroi da qai railesuva na keda itukutuku makawa? Era vakaroti na ulunivale e Isireli mera vakavulici luvedra ena lawa kei na itovo vakasakiti i Jiova me rawa nira “vakararavi ga vei koya na Kalou.”—Same 78:1-7.
E sa dau vakayagataki makawa tu mai na itukutuku makawa era maroroi me vakayacori kina na inaki i Jiova. Kena ivakaraitaki, ena gauna era via tarova kina na dauveitusaqati na kena tara na valenisoro e Jerusalemi, a caka e dua na vakadidike ena vanua ni maroroi itukutuku e Akimeca, na koroturaga kei Mitia qai kune kina e dua na ivola a vola o Tui Sairusi ena nona vakarota me tara na valenisoro e Jerusalemi. (Esera 6:1-4, 12) Koya gona, a tara tale na valenisoro me vaka ga a nakita na Kalou. O Luke, e dua vei ira e vakaitavi ena volai ni Kosipeli a vakayagataka tale ga na itukutuku makawa era maroroi tu ena nona “vakataroga matua na veitaravi ni ka e yaco.”—Luke 1:1-4.
E kauai sara vakalevu na iLawalawa Dauvakatulewa me baleta na noda itukutuku makawa. E tukuna kina e dua na lewe ni iLawalawa Dauvakatulewa me baleta na kena maroroi, vakaivolataki kei na kena vakatakilai na keda itukutuku vakayalo, “E bibi meda kila na vanua eda gole mai kina me rawa nida kila na vanua eda mua tiko kina.” Qori na vuna e tauyavutaki kina mai Brooklyn, Niu Yoka e dua na tabana e vakatokai na Writing Archives. Na tabana vou qo e vakarurugi ena Tabana ni Volavola.
NODA “ITABA NI VUVALE” KEI NA “IYAYA MAKAWA”
E dau totolo ga na kena tasivi na gauna, de dua eda diva tu me maroroi eso na itukutuku me baleta na noda vuvale. Ena tabana vou qo ni Writing Archives, e sa cuqeni tiko kina na cakacaka ni kena maroroi kei na kena vakaivolataki na keda itukutuku makawa. Na itaba era maroroi tu ena keda itukutuku makawa e rawa ni vakatokai me noda “itaba ni vuvale.” Eso tale ga na ka talei era maroroi tu ena vanua e dau maroroi kina noda itukutuku makawa oya na noda ivola vakaivolatabu a tabaki ena gauna e liu, na nodra italanoa eso, kei na so na iyaya me ivakananumi. Na iyaya va qori e “iyaya makawa” ena uqeti keda me baleta na noda itukutuku makawa vakalou, e vukei keda tale ga meda vakanamata ena nuidei me baleta noda vuvale vakayalo ena gauna se bera mai.
Oni sureti moni rai ena tabana vou qo ni Writing Archives ena ulutaga “Vanua e Maroroi Kina na Keda iTukutuku Makawa.” Ena tabaki tiko qo ena Vale ni Vakatawa e vulici. Kena ivakaraitaki, ena dua na ilavelave e se bera mai, e sa nanumi tiko me tabaki e dua na itaba me saumi kina na taro qo: Na cava na Dawn Mobile? O cei e dau vakayagataka? Gauna cava a vakayagataki kina qai cava e kena inaki?
Me vaka ga e dua na itaba ni vuvale, na itukutuku makawa era maroroi e dusia e levu na ka me baleti keda kei ira na tacida vakayalo ena gauna makawa—me baleta na vakabauta kei na nodra yaloqaqa o ira na sa takali, e baleta na marau kei na dredre ni nodra qaravi koya na Tamada vakalomalagi, na nona veidusimaki na Kalou kei na nona tokoni ira na nona tamata. (Vkru. 33:27) Eda nuidei ni o Jiova ena vakalougatataka na kena sagai me maroroi na keda itukutuku makawa vakayalo me rawa nida duavata da qai vakaukauataki meda vakayacora kina nona inaki.
[Kato/iYaloyalo ena tabana e 31]
Ka e Dau Caka
Ena gauna e dau vakarautaki kina na ivola vakaivolatabu, na DVD, kei na so tale, era lai qara itukutuku ga mai ena vanua e maroroi tu kina na itukutuku makawa o ira na vakarautaka na veika qori, o ira na daudroini, ira na dauvakadidike, kei na so tale. Era taqomaka na Writing Archives na itukutuku, e vakaliuliu tale ga ena kena kumuni kei na kena maroroi na veimataqali itukutuku makawa mai na so na vanua me vaka na valenivolavola ni tabana, na veitabana e Peceli, ivavakoso, vuvale, kei na isoqosoqo tale eso. Raica mada na kena caka:
Ka e Rawati kei na Vakadidike: Eso na iyaya era sa maroroi tiko ena vanua dau maroroi kina na itukutuku makawa. E levu vei ira na itukutuku qori era cau mai kina na vuvale e sa dede na nodra qaravi Jiova voli mai. Na kena dikevi kei na kena veidutaitaki na itukutuku va qori e vakalevutaka na noda kila na keda itukutuku makawa kei ira na bula ena gauna oya.
Biu Vakaiwasewase: Na tabana vou qo ni Writing Archives era tu kina e udolu vakacaca na itukutuku, eso e sa dede sara na kena maroroi tu. E levu na veimataqali itukutuku e tu kina qai vinakati gona me maroroi vinaka baleta me rawarawa na kena kunei kei na kena vakayagataki ena vakadidike ena caka ena gauna se bera mai.
Vakavinakataki kei na Maroroi: Na ivola kei na iyaya era sa voleka ni ca ena ripeataki qai maroroi vakamatau. Na ivola, itaba, itukutuku lalai era dau tabaki ena tabana ni vakauitukutuku, iyaloyalo, kei na so na katokatoni era dau maroroi ena komipiuta. E rawa gona nira dikevi ga ena komipiuta me kua kina ni vakacacani na kena ka dina.
Maroroi kei na Qarai ni ka e Yali: Era maroroi vakamatau ra qai taqomaki vinaka na itukutuku me kua kina ni yali, era taqomaki vinaka tale ga me kua ni vakacacana na rarama kei na suasua. Na kena maroroi na itukutuku makawa ena komipiuta e sa vakarawarawataka na vakadidike kei na kena vakalesui mai na itukutuku talei makawa.
[iYaloyalo ena tabana e 32]
1. iTaba mai na “Photo-Drama of Creation.” 2. iVolakerekere. 3. Motoka vakamisini ni kakaburaki. 4. iMatai ni Tabana ni Watch Tower April 15, 1912. 5. Notisi ni valeniveivesu kei J. F. Rutherford. 6. Gusunivosa na WBBR. 7. Qaramavoni. 8. iTawatawa ni vola. 9. Eso na ivola lalai. 10. Telekaramu vei J. F. Rutherford.