Yavu ni Vuvale Mamarau

Ni Vakatitiqataka o Luvemu iTabagone na ka o Vakabauta

Nira tubucake tiko, era vakatulewataka e levu na itabagone mera muria na nodra lotu na itubutubu. (2 Timoci 3:14) Ia eso era sega ni cakava qori. Na cava mo cakava ke vakatitiqataka na ka o vakabauta o luvemu ni tubucake tiko? Ena veivosakitaki ena ulutaga qo na ka era cakava na iVakadinadina i Jiova mera walia kina na leqa qori.

“Au sa sega ni via lako ina nodrau lotu na noqu itubutubu. Au sa soro na muri rau tiko.”​—Kara, 18.a

E KENA ivakarau ga mo tuberi luvemu ena ivakavuvuli o muria ni o vakadeitaka ni vakavulica na ka dina me baleta na Kalou na nomu lotu. O vakabauta tale ga ni veidusimaki na iVolatabu ena ivakarau ni bula vinaka duadua me muri. (Vakarua 6:6, 7) Ia vakacava ke sa sega ni taleitaka na luvemu na veika vakayalo ni tubucake tiko? Vakacava ke vakatitiqataka na ivakavuvuli a rairai rawarawa sara na nona ciqoma ni se gone?​—Kalatia 5:7.

Ke o sotava tiko na leqa qori, kua ni nanuma ni o sa guce ena nomu itavi ni o dua na itubutubu lotu vaKarisito. Me vaka eda na raica ena ulutaga qo, eso tale na ka e rawa ni vakavuna na leqa. Ia nanuma tiko: Na sala o vukei luvemu kina ena nona vakatitiqa ena rawa ni vakatau kina na nona vakatulewa me muria se sega na ka o vakabauta. Ke o nanuma mo vala kei luvemu ena ka e vakatitiqataka, dua na vala kaukaua o na cakava qai kena irairai ni o na druka ga kina.​—Kolosa 3:21.

E vinaka ga me muri na nona ivakasala na yapositolo o Paula, a vola: “E sega ni dodonu me veivala na bobula ni Turaga, me yalomalua ga vei ira kece, me qasenivuli vinaka, me vosota tu ga ni sotava na ka ca.” (2 Timoci 2:24) O na vakaraitaka vakacava ni o “qasenivuli vinaka” ke vakatitiqataka na ka o vakabauta o luvemu itabagone?

Saga mo Kila na Vuna

Saga mada e liu mo kila na vuna e rairai va kina qori na nona rai o luvemu itabagone. Kena ivakaraitaki:

▪ E galili beka qai sega nona itokani ena ivavakoso vaKarisito? “Niu vinakata me so noqu itokani, au kabiti ira kina keimami vuli vata, qori e vakaleqa noqu veiwekani kei na Kalou ena vica na yabaki. Na noqu vakailala ca e dua na vuna levu au sega ni kauaitaka kina na veika vakayalo, au veivutuni sara ga ena gauna qo.”​—Lenore, 19.

▪ E sega beka ni nuidei, qai vakavuna qori me sega ni tukuna kina na ka e vakabauta? “Niu se vuli tiko, e dau dredre meu wasea na ka au vakabauta vei ira na lewe ni noqu kalasi. Au leqataka nira na raici au vakatani se niu ‘viavia lotu.’ E sega ni taleitaki na gone e duidui vei ira na kena vo, au sega ni vinakata me yacovi au ya.”—⁠Ramón, 23.

▪ E nuiqawaqawataka beka na nona muria na ivakatagedegede vaKarisito? “Ena noqu rai, na ka e yalataki ena iVolatabu me baleta na bula tawamudu e toka sara e cake ena dua na ikabakaba balavu, au se sega ni butuka na sitepi se meu bau volekata mada ga. Dua na ka noqu rere meu kabata na ikabakaba oya, au nanuma kina meu sa kua ni muria na ka au vakabauta.”​—Renee, 16.

Veitalanoataka

Na leqa cava e rairai sotava tiko o luvemu itabagone? Na sala vinaka duadua mo kila kina qori, oya mo tarogi koya sara ga! Ia mo qarauna me kua ni lai tini ena veiba na nomudrau veitalanoa. Muria ga na ivakasala ena Jemesa 1:19: ‘Totolo ni vakarorogo, berabera ni vosa, berabera ni cudru.’ Kua ni yalototolo, mo ‘vosota ga vakadede qai maqosa ni veivakavulici’ me vaka ga o na cakava vua e dua e sega ni lewe ni nomu vuvale.​—2 Timoci 4:2.

Kena ivakaraitaki, ke sega ni via lako ina soqoni vaKarisito o luvemu itabagone, saga mo kila ke dua tale na ka e leqataka tiko. Ia mo vosa vakamalua vua. Na ka e cakava na itubutubu e vakamacalataki toka qo e ra a sega ni tara na lomai luvena itabagone.

Gone: Au sa sega ni taleitaka na soqoni.

Tama: [kaukaua na rorogo ni domona] Na cava o sega ni taleitaka kina?

Gone: E vakavucesa vei au!

Tama: E vakavucesa vei iko na ka o vulica tiko me baleta na Kalou? Qori qai nomu leqa! O se tiko ena noqu vale, o na lako vata kei keirau​—o taleitaka se sega!

E vinakata na Kalou mera vakavulici luvedra na itubutubu ena veika me baleti koya, mera talairawarawa tale ga na gone vei ira na nodra itubutubu. (Efeso 6:1) Ia o na sega ni vinakata me muria wale tu ga o luvemu na veika e vauca na nomu sokalou qai lako ena voraki ina soqoni vaKarisito. O na vinakata ga me lako ina soqoni ni lomani Jiova, ni kila tale ga ena yaga vua.

Ena rawa qori ke o saga mo kila na vuna e sa veisau kina nona rai. Ni vakasamataki tiko qori, meda raica mada na sala e rawa ni caka kina vakamaqosa na veitalanoa sa laurai oti mai.

Gone: Au sa sega ni taleitaka na soqoni.

Tama: [vosa vakamalua] Na cava sa va kina qori nomu rai?

Gone: E vakavucesa vei au!

Tama: E rawa ni vakavucesa mo dabe tiko me dua se rua na aua. Ia na cava sara mada e leqa me baleta na soqoni?

Gone: Sega ni macala, e vaka me sa sega ga ni lomaqu na tiko kina.

Tama: E va tale ga qori na nodra rai na nomu itokani?

Gone: Qori sara ga na leqa! E sega na noqu itokani​—au dau vakaitokani ga e liu. Ni toki ga na noqu itokani dredre, sa sega tale ni dua e tiko me keirau veitalanoa. Era marautaka tu na bula na kena vo, ia dua na ka na noqu galili!

Ni vakalaiva na tama e tukuni e cake me talaucaka na lomana o luvena itabagone, a rawa kina ni kila na leqa e sotava tiko o gone, oya na galili. Ena uqeti luvena tale ga me nuitaki tamana, qai rawa ni levu tale na gauna me rau veitalanoa kina.​—Raica na kato “Mo Vosovoso!”

Ni toso na gauna, era vulica e levu na itabagone ke ra vorata na ka e vakaleqa tiko na nodra veiwekani kei na Kalou, era dau nuidei ra qai doudou ni tukuna na ka era vakabauta. Kena ivakaraitaki o Ramón na cauravou e tukuni ena itekivu ni ulutaga qo e dau madua ni tukuna e koronivuli ni lotu vaKarisito. Ia a raica ni toso na gauna ni nona tukuna na ka e vakabauta e sega sara ni dredre me vaka e nanuma voli​—ke vakalialiai mada ga. E tukuna:

“A vakalialiai au ena dua na gauna me baleta na noqu lotu e dua na gonetagane e koronivuli. Au tavaiyaya sara ga, au vakila tale ga nira vakarorogo kece tu na lewe ni kalasi. Au mani nanuma meu tarogi koya tale ga ena ka e vakabauta. Au kurabuitaka ni tavaiyaya vakalevu cake o koya! Au qai liaca ena gauna oya ni levu na itabagone e tu nodra vakabauta vakalotu, ia era sega tu ni kila. E vinaka niu rawa ni bau vakamacalataka na ka au vakabauta. O ira ga na noqu lewe ni kalasi mera madua na tukuna na ka era vakabauta​—sega ni o au!”

TOVOLEA MADA QO: Saga mo kila na rai nei luvemu ni o taroga se cava e nanuma me baleta na nona dua na lotu vaKarisito. Na cava e nanuma me baleta na kena yaga? Na veika dredre cava ena sotavi? E levu cake na kena yaga mai na veika dredre? Ke vakaio o luvemu, kerea me vakamacalataka na sala e dina kina oya. (Marika 10:29, 30) E rawa ni vola ena pepa na nona nanuma​—me rua na iyatu, me vola ena yasana imawi na veika dredre ena sotavi qai vola ena yasana imatau na veika yaga ena vakila. Ni raica na veika e vola, e rawa ni kila o luvemu itabagone na leqa e sotava tiko qai saga me walia.

Me “Yalomatua” o Luvemu iTabagone

Era raica na itubutubu kei na vuku ni duidui sara na nodra ivakarau ni vakasama na gonelalai kei ira na itabagone. (1 Korinica 13:11) O ira na gonelalai era sega tale ni vakasamataka na ka e tukuni vei ira, era cakava ga. Ia o ira na itabagone era dau vakasamataka na ka e tukuni vei ira ra qai vakatulewa. Kena ivakaraitaki, e rawa ni vakavulici e dua na gone ni bulia na ka kece na Kalou. (Vakatekivu 1:1) Ia ena rairai vakataroga na itabagone: ‘Au na kila vakacava ke dua na Kalou? Na cava e vakatara kina na Kalou dauloloma me yaco na ka ca? E rawa vakacava ni bula tu ga na Kalou?’​—Same 90:2.

O na rairai nanuma ni sa luluqa na vakabauta i luvemu ke vakataroga na taro qori. Ia na nona cakava qori e vakaraitaka nona toso. E rawa ni tiki bibi sara ga ni nona toso vakayalo e dua na lotu vaKarisito na nona dau taro.​—Cakacaka 17:2, 3.

Kena ikuri, qori ena vukei luvemu itabagone me “yalomatua.” (Roma 12:1, 2) Ena kila tale ga kina o luvemu itabagone “na raba, na balavu, na cere, kei na titobu” ni vakabauta vaKarisito, a rairai sega ni cakava rawa ni se gone. (Efeso 3:18) Sa qai bibi ga mo vukei luvemu itabagone sara ga qo me vakasamataka na ka e vakabauta qai vakatulewa me rawa ni dei na nona vakabauta.​—Vosa Vakaibalebale 14:15; Cakacaka 17:11.

TOVOLEA MADA QO: Drau veitalanoataka tale mada kei luvemu itabagone na yavu ni ivakavuvuli, eso na ulutaga drau a rairai vakawalena. Kena ivakaraitaki, vukei koya me vakasamataka eso na taro qo: ‘Au vakadeitaka vakacava ni tiko e dua na Kalou? Na ivakadinadina matata cava e vakaraitaka ni kauaitaki au na Kalou? Na cava au vakabauta kina ni vinaka duadua ga na noqu talairawarawa ina lawa ni Kalou?’ Qarauna mo kua ni togoraka na nomu rai vei luvemu. Ia mo vukei koya me vakadeitaka ga vakataki koya na ka e vakabauta. Ena rawarawa vua me vakadeitaka kina ni dina na ka e vakabauta.

“Ka o Vakabauta ena Gauna e Vakadeitaki Kina Vei Iko”

E tukuna na iVolatabu ni kila na cauravou o Timoci na Vosa ni Kalou ni “se gone dramidrami.” Ia a uqeti Timoci na yapositolo o Paula: “Muria tiko ga na ka o vakavulici kina, na ka o vakabauta ena gauna e vakadeitaki kina vei iko.” (2 Timoci 3:14, 15) Me vakataki Timoci ga, a rairai vakavulici tale ga ena ivakatagedegede vakaivolatabu o luvemu itabagone ni se qai sucu. Ia e bibi mo vakadeitaka tiko ga vua qori me rawa ni saga vakataki koya me dei ena ka e vakabauta.

E tukuni ena ivola Questions Young People Ask—⁠Answers That Work, Volume 1: “Ni se tiko e vale o luvemu itabagone, e tu vei iko na dodonu mo lewa me muria na veika e vauca na sokalou. Ia mo saga mo vukei koya me kua ni muria wale tu ga qori, me bucina sara ga e lomana me lomana na Kalou.” Ni o vakasamataka tiko na isausau qori, o rawa ni vukei luvemu itabagone me “tudei” ena ka e vakabauta qai ivakarau sara ga ni nona bula​—sega ni cakava ga ni ivakarau ni bula o muria.b​—1 Pita 5:9.

[iVakamacala era]

TAROGA . . .

▪ Na cava au dau cakava ni vakatitiqataka o luvequ na ka au vakabauta?

▪ E yaga vakacava na idusidusi ena ulutaga qo meu vakavinakataka kina na iwalewale ni noqu vosa vei luvequ?

[Kato ena tabana e 19]

Era Vakacalai na Gone?

Lasu: O ira na itubutubu iVakadinadina i Jiova era dau vakasaurarataki ira na luvedra mera muria na ka era vakabauta.

Dina: Me vaka ga e veivakaroti kina na iVolatabu, era dau saga na itubutubu iVakadinadina i Jiova mera vakavulici luvedra mera lomana na Kalou. (Efeso 6:4) Ia era kila ni tubucake o gone me uabula, ena vakatulewa sara ga o koya ena veika e vauca na sokalou.​—Roma 14:12; Kalatia 6:5.

[Kato/​iYaloyalo ena tabana e 20]

Mo Vosovoso!

Ena rairai gadrevi vakalevu na vosovoso ni o vosa vei luvemu itabagone. Ia ena yaga qori ni o raica ni nuitaki iko vakalevu o luvemu. E kaya e dua na goneyalewa: “Ena neirau veitalanoa wale ga kei Ta ena dua na bogi, au vakaraitaka vua ni dua tiko na noqu site ni vakailala ena internet, sa dua tiko noqu itau, au via dro tale ga mai vale. E sega vakadua ni cudru ena gauna keirau veitalanoa tiko kina. Au sega ni vakasamataka rawa e dua tale na tama me dabe toka ga qai sega ni bau karakara ni kila sa kisiva oti e dua na tagane o luvena yalewa qai sega ni cegu na nodrau vakauitukutuku ena mobail. Au rawa ni tukuna kece vei Ta na noqu leqa. Au kila ni vinakata dina me vukei au.”

[Kato ena tabana e 21]

Yaga ni Veivakauqeti

E dau yaga ena so na gauna vei ira na itabagone na nona veiuqeti e dua na uabula e sega ni lewenivuvale. O kila e dua e dau vakaliuca na veika vakayalo e rawa ni uqeti luvemu? Vakacava mo tuvanaka e dua na gauna me rau veimaliwai kina kei luvemu tagane se yalewa? E sega ni kena ibalebale qori o sa na vakawalena kina na nomu itavi. Vakasamataki Timoci mada. A yaga vakalevu vua na nona ivakaraitaki na yapositolo o Paula, a yaga tale ga vakalevu vei Paula na nodrau veitokani kei Timoci.​—Filipai 2:20, 22.c

[iVakamacala era]