Era Yaloqaqa ni Vunautaka na Vosa ni Kalou!

E gadrevi na yaloqaqa kei na doudou nida tusaqati. Era vakaraitaka na itovo qori o ira na lotu vaKarisito dina, e vakadinadinataki ena so na noda ivola me vaka na “Bearing Thorough Witness” About God’s Kingdom kei na Jehovah’s Witnesses​—Proclaimers of God’s Kingdom. Me vakataki ira ga na tacida ena imatai ni senitiuri, eda na kerea na veidusimaki ni yalo tabu i Jiova meda tukuna kina na nona vosa ena doudou.​—Caka. 4:23-31.

E vola e dua na tacida me baleta na cakacaka vakavunau donuya na imatai ni ivalu levu: “Era sega ni cegu ni veisoliyaka na dauveiqaravi ni Kalou na ikavitu ni itabataba ni Studies in the Scriptures, kena ulutaga The Finished Mystery. Dua na ka na levu ni ivola era solia. A sevutaki na tikidua Kingdom News No. 1 ena 1918. Oti qori, e tabaki tale ga na tikidua Kingdom News No. 2, e vakamacalataka na vuna era tarova kina o ira na veiliutaki na veisoliyaki ni ivola The Finished Mystery. E tabaki tarava na Kingdom News No. 3. Era veisoliyaka vakalevu na ilawalawa lumuti yalodina na tikidua kece qori. E vinakati dina na vakabauta kei na yaloqaqa me veisoliyaki kina na tikidua Kingdom News.”

Nikua, o ira na dautukutuku vou ni Matanitu ni Kalou era vakavulici ena iwalewale ni cakacaka vakaitalatala, ia e sega ni dau caka qori ena gauna sa oti. E vola e dua na tacida tagane mai Poladi sa vakaitikotiko e Merika, me baleta na imatai ni gauna e tekivu cakacaka vakavunau kina ena 1922: “Au cakacaka duadua tiko, au mani tukituki sara ena nona ofisi e dua na vuniwai, au sega mada ga ni kila na iwalewale ni kena soli na ivola, au sega tale ga ni kila vinaka na vosa vakavalagi. Dolava sara mai na katuba e dua na nasi. Au na sega ni guilecava rawa na gauna oya, dua na ka na noqu nanamaki toka meu vunau, ia au rere tale ga. Ena gauna au dolava kina noqu beki, era lutu kece na ivola e matai nasi. Au sega ni kila na ka au tukuna, ia au solia ga vua e dua na ivola. Niu biubiu, au vakila na veivakaukauataki i Jiova, au yaloqaqa tale ga. Ena siga oya, au solia rawa e levu na ivola lalai ena yasa ni taoni qori.”

E tukuna e dua na tacida yalewa: “Ena 1933, levu na tacida tagane era vakayagataka na motoka e tiko na kena gusunivosa mera vakatetea kina na itukutuku ni Matanitu ni Kalou.” Ena dua na gauna, a vunau tiko na tacida yalewa qo kei na dua na veiwatini ena veitokaitua ena yasayasa o Kalifonia e Merika. E nanuma lesu na tacida qo: “E dua na tacida tagane e draivataka ina ulunivanua na motoka e tiko na kena gusunivosa, keitou toka ga ena taoni. Ena gauna e vakatagitaka kina na itukutuku katoni, e vaka ga ni rogo tiko mai lomalagi. Dua na ka nodra via vaqarai koya na tacida tagane qori o ira na tiko ena taoni, ia era sega ni kunei koya. Ni sa rogoci oti na itukutuku katoni, keitou vunau sara vei ira na lewenivanua. Ena dua tale na gauna keitou vakayagataka e rua tale na motoka va qori, ia meu tukuna vakadodonu e levu era sega ni via rogoca na itukutuku vinaka. Era na sega ga ni levea rawa baleta nira rogoca sara ga ena nodra dui vale na itukutuku e vakatagitaki tiko yani ena motoka. Keitou raica ni o Jiova e dau vakayagataka na iwalewale e veiganiti ena kena gauna donu. Na iwalewale ni vunau qo e vinakati dina kina na yaloqaqa, ia na inaki ni noda vunau ena vakayacori dina ga, ena vakalagilagi tale ga kina na yaca i Jiova.”

Ena yabaki 1930 vakacaca kei na itekitekivu ni 1940 vakacaca, a vakayagataki ena cakacaka vakavunau na qaramavoni kei na vunau vakaivolatabu e dau katoni. E nanuma lesu e dua na tacida yalewa: “A vunau voli e veivalevale e dua na tacida yalewa ni vakayagataka na qaramavoni. Ni vakatagitaka oti ga na vunau ena dua na katuba, e gole mai e dua na turaga e itaukeinivale, qai caqeta na qaramavoni ena levu ni nona cudru. Ia e sega ni vakacacani na disi ni katokatoni. Eratou raica sara tu ga na ka a yaco e tolu na turaga eratou vakasigalevu tiko ena loma ni lori. Eratou kerei koya na tacida qo me ratou rogoca na katokatoni, eratou ciqoma tale ga eso na ivola. Qori e vakacegui koya sara ga mai na ka e sotava ena vale a cemuri kina.” E vinakati dina na yaloqaqa meda vosota kina na veivakatovolei va qori.

E tomana: “Au nanuma lesu na imatai ni gauna au vunau kina e salatu ena 1940. E dau caka ena gauna oya na tayabe. Era na tayabe na mataveitacini ra qai yatuni ena yasa ni gaunisala, ra qai yadua na papa e volai tu kina, ‘Religion Is a Snare and a Racket,’ (Dau Veicoriti na Lotu, Dau Veivakacalai Tale Ga), kei na ‘Serve God and Christ the King,’ (Qarava na Kalou kei Karisito na Tui). E veisoliyaki tale ga eso na tikidua. E vinakati dina na yaloqaqa ena cakacaka va qo, ia e caka qori mera kila na lewenivanua na yaca i Jiova kei ira era qaravi koya.”

E tukuna e dua tale na tacida yalewa: “E sega ni ka rawarawa na soli mekesini ena taoni lalai. Qo na gauna e kaukaua sara tu ga kina na nodra cati na iVakadinadina. . . . E vinakati dina na yaloqaqa meda duri ena kona ni gaunisala, meda taura tu na mekesini, qai vunau ena domoilevu. Ia keimami sega ni dau calata na cakacaka ena siga Vakarauwai. Eso na gauna, era dau veikauaitaki na lewenivanua. Ena so tale na gauna, era dau gole mai eso na ilawalawa dauvakacaca, keimami na dro ni bera ni yaco na leqa.”

Era vakacacani na iVakadinadina i Jiova donuya na iMatai ni iValu Levu, ia era vunau tiko ga ena doudou. A tuvanaki e dua na cakacaka ni soli ivola lalai me 43 na siga, tekivu mai na 1 Tiseba, 1940 ina 12 ni Janueri, 1941. Rauta ni 50,000 na dautukutuku era veisoliyaka rawa e walu na milioni na ivola lalai, e vakatokai na gauna qori me “Courage” Testimony Period (Gauna ni “Yaloqaqa”).

Levu na itabaqase ena isoqosoqo i Jiova era se nanuma vinaka tu ga na ituvaki dredre a vinakati kina vakalevu mera yaloqaqa. E laurai ena nodra yaloqaqa ena nodra dau cavuta e dua na ivosavosa e kena ibalebale meda bili yani me yacova na icavacava (Press the battle to the gate). Eda na sega ni kila na iwalewale cava tale eda na vakayagataka meda vakasavuya kina na itukutuku ni Kalou ni bera ni cava na ituvaki ca qo, ena qai kilai qori ni toso na gauna. Ena veivuke ga ni Kalou eda na vakatetea tiko ga na vosa i Jiova ena yaloqaqa kei na vakabauta.

[Tikina bibi ena tabana e 9]

Ena vinakati tiko ga na yaloqaqa nida vunautaka na Matanitu ni Kalou