Vaqara na Kena iSau

“E duidui na noda rai me baleti [Jisu]. Se mani cava na ivakatagedegede ni noda vakabauta se na ka eda vakatitiqataka, eda na taroga kece, ‘O cei mada na turaga qo?’”​—DAUVOLAIVOLA O STAN GUTHRIE.

E DAU lomatarotarotaki se o cei o Jisu. Sa taleitaki vakalevu na ivola kei na iyaloyalo e talanoataki kina na nona bula. Ia era se lomatarotarotaka tiko ga e levu se o cei o Jisu. O cei sara mada o Jisu? E duidui tu na nodra rai e levu me baleti koya.

Ena vica na yabaki sa oti, erau sureti ira na lewenivanua e rua na dauvolaitukutuku mera sauma yani ena internet na nodrau taro, “O cei o Jisu?” Qo eso na nodra isaunitaro:

● “E dua na rapai (qasenivuli), e laurai ena ka e cakava ni dau yalololoma.”

● “A dua ga na tamata wale, e veivakurabuitaki na ka e dau cakava.”

● “E sega ni dua na ivakadinadina ni a bula dina o Jisu.”

● “E luve ni Kalou, a mai sucu, mate, qai vakaturi me vakabulai keda mai na noda ivalavala ca. E se bula tiko, ena lesu tale mai vuravura.”

● “Au vakabauta ni o Jisu e Luvena duabau ga na Kalou, e tamata, e kalou tale ga ena dua ga na gauna.”

● “E baleti ira ga na gone na italanoa kei Jisu.”

E macala ga ni sega ni rawa ni donu kece na rai qori. E tiko beka e dua na ivurevure ni itukutuku nuitaki e rawa ni sauma vakadodonu na noda vakatataro me baleti Jisu? O ira era vakarautaka na mekesini qo era vakabauta ni iVolatabu e Vosa ni Kalou, qori na vanua duadua ga e volai kina na ka dina me baleti Jisu.a​—2 Timoci 3:16.

Ena veivosakitaki ena ulutaga e tarava na isau vakaivolatabu ni so na taro e dau tarogi me baleti Jisu. A tukuna sara ga o Jisu nira rawa ni bula “o ira era vakabauti koya.” (Joni 3:16) Vakacava mo dikeva na kena isau, qai vakatau sara ga vei iko na nomu vulica se sega eso tale na ka me baleti Jisu kei na sala mo vakabauti koya kina.

[iVakamacala e ra]