E Rawa Beka ni Veivakaisini na Noda Vakabauta Vakalotu?

Ni so era sotava na leqa, era sega ni via kila na veika dina e yaco, era sega ni via vakasama vakavinaka, ra qai vakaisini ira ena nodra qara eso na ka mera vakacegui kina vakalekaleka. Kena ivakaraitaki, eso era lai gunu alakaolo mera guilecava kina nodra leqa. Ia ni toso na gauna ena vakaleqai ira ga nodra vakararavi ena alakaolo. Vakacava e rawa ni tukuni ni va qori tale ga na vakabauta vakalotu?

Eso era tukuna ni vakabauta e vakamuai rawarawa tu ga. Era kaya ni o ira era vakabauta wale ga na ka era sega ni via vakayagataka na nodra vakasama se vakalaiva na ivakadinadina matata era tu me yavutaki kina na nodra vakabauta. Na vakalelewa va qori e dusia ni o ira e dei na nodra vakabauta vakalotu era vakalecalecava na kena dina.

Na iVolatabu e vakamacalataka e levu na ka me baleta na vakabauta. Ia e sega vakadua ni bau uqeti keda meda dau rawai rawarawa se meda kua ni vakasama vakatitobu. Ena yasana adua, e tukuna ga nira yalowai se lailai nodra kila ka o ira era vakabauta na ka kece e tukuni vei ira. (Vosa Vakaibalebale 14:15, 18) E sega gona ni ka vakavuku meda vakabauta ni dina e dua na ivakavuvuli ke da sega ni dikeva na kena ivakadinadina! Qori e vaka ga noda tabonaka na matada da qai saga meda takoso ena dua na gaunisala osooso baleta ga ni tukuna vei keda e dua.

E sega ni uqeti keda na iVolatabu meda vakabauta na ka kece eda rogoca se wilika, ia e uqeti keda ga me yadra tiko na matada vakaivakatakarakara meda kua kina ni rawai. (Maciu 16:6) Eda na yadra tiko ke da “yalomatua.” (Roma 12:1) E vakavulici keda na iVolatabu meda dikeva vinaka na ivakadinadina e tu da qai yavutaka noda vakatulewa ena ka dina. Dikeva mada eso na ivakaraitaki ena veika e vola na yapositolo o Paula.

Na gauna a volavola kina o Paula vei ira na ivavakoso e Roma, a sega ni vinakata wale ga mera vakabauta na Kalou baleta ga ni a tukuna vei ira. Ia a uqeti ira ga mera dikeva na ivakadinadina ni bula dina tiko na Kalou. A vola: “Tekivu mai na gauna a buli kina na vuravura e kilai na veika tawarairai me baleti koya [Kalou], ya na nona kaukaua e sega ni vakaiyalayala, vaka kina ni o koya dina ga na Kalou, e kilai qori ena veika e buli, e sega kina na nodra [o ira era cakitaka na veiliutaki ni Kalou] iulubale.” (Roma 1:20) Na vakasama tale ga qori a vola o Paula vei ira na Iperiu, e kaya: “E macala gona ni tiko o koya e tara na vale yadua, ia o koya e tara na ka kece ga na Kalou.” (Iperiu 3:4) Ena nona ivola vei ira na lotu vaKarisito ena siti o Cesalonaika, e uqeti ira o Paula mera qarauna na veika era vakabauta. E vinakata o koya mera “vakadeitaka na dina ni ka kece.”—1 Cesalonaika 5:21.

Ke sega ni matata na ivakadinadina e yavutaki kina noda vakabauta vakalotu, e rawa ni yaco meda vakaisini keda tiko ga, eda rawa ni vakacalai qai vakaleqai sara. E vola o Paula me baleta eso na tamata lotu ena nona gauna: “Niu kila nira yalogu dina ena nodra qarava na Kalou, ia e sega ni salavata kei na ivakavuvuli dina.” (Roma 10:2) E bibi dina meda muria na ivakasala i Paula vei ira na lewe ni vavakoso e Roma! E vola: “Me vakavoui ga na nomuni vakasama, moni vakadinata kina ni vinaka na inaki ni Kalou, e totoka, qai uasivi.” (Roma 12:2) Ke yavutaki noda vakabauta ena noda kila na ka dina me baleta na Kalou, ena sega ni veivakaisini na noda vakabauta, ia ena vaka ga na “isasabai levu” e taqomaka na lomada, eda na sega tale ga ni vakaleqai vakayalo.​—Efeso 6:16.