Na Ka e Levu Vei Ira e Soli me Vakalevutaka na Ka e Lailai

“[E]RATOU . . . raici me ratou duru ena ivavakoso” o Pita, Jemesa, kei Joni. Ena 49 S.K., eratou lesia e dua na itavi vua na yapositolo o Paula kei na nona itokani vakacakacaka o Panapasa. A vinakati me rau nanumi ira na lotu vaKarisito dravudravua ni rau vunau tiko vei ira na veimatanitu. (Kala. 2:9, 10) A vakayacori vakacava na itavi qori?

E laurai ena ivola e vola o Paula na nona rai me baleta na itavi qori. Kena ivakaraitaki, a vola vei ira na lotu vaKarisito e Korinica: “Ena vuku ni cau me baleti ira na yalosavasava, moni cakava tale ga na ka au a vakaroti ira kina na ivavakoso e Kalatia. Ena imatai ni siga kece e veimacawa, moni biuta vakatikitiki ena nomuni vale eso na ka me salavata kei na ka oni taukena, baleta niu yaco yani me kua tale ni caka na kumuni iyau. Niu yaco yani, au na talai ira oni a vakatura na yacadra ena ivola, mera kauta i Jerusalemi na veika oni solia vakailoloma.”​—1 Kor. 16:1-3.

Ena ikarua ni nona ivola uqeti vakalou vei ira e Korinica, a tukuna tale kina o Paula na inaki ni cau: “Me tautauvata ga, na ka e levu vei kemuni ena gauna qo ni solia vei ira e lailai vei ira me vakalevutaka na ka e lailai vei ira.”​—2 Kor. 8:12-15.

Ena gauna a volavola kina o Paula vei ira na lotu vaKarisito e Roma ena rauta na 56 S.K., sa voleka ni kumuni oti na cau. A tukuna: “Qo au sa vakarau lako i Jerusalemi meu lai qaravi ira na yalosavasava, me vaka nira sa lomavinaka mai Masitonia kei Akaia mera vota na nodra iyau mera vukei kina na yalosavasava era dravudravua e Jerusalemi.” (Roma 15:25, 26) A vakayacora o Paula na nona ilesilesi ni oti ga vakalailai qori. E kilai qori ena ka e tukuna vei Vilikesa na Kovana ni Roma ena gauna a lesu kina o Paula i Jerusalemi qai lai vesu e kea: “Au . . . kauta mai na ilavo me yaga vei ira ena noqu vanua, meu vakacaboisoro tale ga.”​—Caka. 24:17.

E laurai votu na ivakarau ni yalodra na lotu vaKarisito ena imatai ni senitiuri ena ka e tukuna o Paula me baleti ira mai Masitonia. A tukuna nira ‘vakamasuti keitou tiko ga mera bau vakaitavi ena soli ka.’ A uqeti ira mai Korinica na yapositolo o Paula mera vakatotomuria na ivakaraitaki qori. A kaya: “Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e solia na ka ena marau.” Na cava a uqeti ira na ivavakoso qori mera lomasoli? E sega ni nodra inaki “me soli vakalevu ga kina na ka era lekata na yalosavasava, ia me vakacaucautaki tale ga kina vakalevu na Kalou.” (2 Kor. 8:4; 9:7, 12) Qori tale ga na ka ena rairai uqeti keda meda dau lomasoli. Na Kalou o Jiova ena vakalougatataki ira dina era vakaraitaka na ivakarau ni yalo totoka va qori ra qai dauveinanumi qai dau veivakavutuniyautaki dina na nona veivakalougatataki.​—Vkai. 10:22.

[Kato ena tabana e 9]

SALA ERA CAU KINA ESO INA CAKACAKA E VURAVURA RARABA

Me vaka ga ena nona gauna na yapositolo o Paula, e levu nikua era “biuta vakatikitiki” se ra maroroya na ilavo me biu ena kato ni cau ena ivavakoso e volai kina na “Cakacaka e Vuravura Raraba.” (1 Kor. 16:2) Era dau vakauta e veivula na ilavo qo na ivavakoso yadua ina valenivolavola ni iVakadinadina i Jiova ena nodra dui vanua. O rawa tale ga ni vakauta vakadodonu na nomu cau ina isoqosoqo e vakadonui vakalawa meda vakayagataka na iVakadinadina i Jiova. Mo kila na yaca ni isoqosoqo vakalawa e vakayagataki ena nomu vanua, veitaratara ina valenivolavola ni tabana. E rawa ni laurai ena www.pr2711.com na itikotiko ni valenivolavola ni tabana. Qo na cau o rawa ni vakauta sara ga vakadodonu:

CAU E SOLI VAKAILOLOMA

• Cautaki na ilavo, iukuuku vatutalei kei na so tale na ka vakamareqeti.

• Me dua na ivola me vakau vata kei na cau qori, me vakamacalataka ni ka e cautaki ya e soli vakailoloma.

CAU E TIKO NA KENA VEIDINADINATI

• Cautaki na ilavo qai tiko na veidinadinati ni na rawa ni suka tale vua e cau ke mani gadreva.

• Me dua na ivola me vakau, me vakaraitaka ni tiko na veidinadinati ni cau qori.

SOLIKA E LALAWATAKI

Me ikuri ni kena cautaki na ilavo kei na ka vakamareqeti tale eso, e tiko eso tale na cau me yaga ena cakacaka ni Matanitu ni Kalou e vuravura. Qori ena qai vakamacalataki ena vica na parakaravu tarava. Se mani sala cava o via cau kina, yalovinaka veitaratara e liu ina valenivolavola ni tabana ena nomu vanua mo rawa ni kila na sala e rawa ni cau kina e dua ena nomu vanua. E duidui na ka vakalawa kei na lawa ni saumi vakacavacava, e bibi gona mo veivosaki kei na dua na daunivakasala ni vakacavacava kei na ka vakalawa ni bera ni o digia na sala vinaka duadua mo cau kina.

Inisua: E rawa ni volai ina dua na isoqosoqo vakalawa e vakayagataka na iVakadinadina i Jiova na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni taura tu ga vakawawa se qai soli me taukena e dua na isoqosoqo vakalawa e vakayagataka na iVakadinadina i Jiova ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa ni dau soli na stock kei na bond ina dua na isoqosoqo vakalawa e vakayagataka na iVakadinadina i Jiova me dua ga na cau vakadodonu se qai soli me taukena ni sa mate e dua.

Qele kei na Vale: E rawa me soli vakadua na qele se na vale ina dua na isoqosoqo vakalawa e vakayagataka na iVakadinadina i Jiova, e rawa tale ga ni caka e dua na veiyalayalati me se tei tawana tiko mada na qele se vale o koya e solia me yacova na nona mate.

iLavo me Saumi e Veiyabaki: Na ilavo e cautaki ina dua na tabana e vakayagataka na iVakadinadina i Jiova qai tuvanaki me dau soli vua e cautaka mai se dua tale e lewa o koya, e dua na kena iwase ena veiyabaki me yacova na nona mate. Ena yabaki e soli kina na ilavo ina ituvatuva qo, ena musu na nona ivakacavacava o koya e cautaka mai.

Wili kei na Trust: E rawa ni soli na iyau se na ilavo ina dua na isoqosoqo vakalawa e vakayagataka na iVakadinadina i Jiova, ena tabaki e dua na wili se rawa ni vakayacori e dua na veidinadinati me maroroya toka na isoqosoqo vakalawa qori na nona ilavo se iyau e dua me yacova na nona mate, sa rawa ni qai taukena na isoqosoqo. Qori ena rawa ni vakalailaitaka na ivakacavacava e saumi.

Na cau va qori e vakatokai me “soli ka e lalawataki,” kena ibalebale ena vinakati me lalawa sara ga vakavinaka o koya e via solika. Sa vakarautaki e dua na brochure vakavalagi kei na kena vakaSipeni e vakatokai na Charitable Planning to Benefit Kingdom Service Worldwide me dusimaki ira na via solika ina cakacaka ni iVakadinadina i Jiova e vuravura raraba. E volai ena brochure qori eso na sala ni solika vakailoloma e rawa ni caka ena gauna qo se dua na gauna e muri, me vaka na gauna sa mate kina e dua. Na ivakamacala ena brochure qori ena rairai sega ni ganita sara na kemu ituvaki ena vuku ni ivakacavacava se so tale na lawa ena nomu vanua. Ni o wilika oti gona na brochure, veivosaki kei na nomu daunivakasala ni lawa se ivakacavacava. Nira solika ena vica na sala sa cavuti oti mai, e levu era sa tokona na noda cakacaka vakalotu kei na noda cakacaka ni veivukei na iVakadinadina i Jiova e vuravura raraba, qai vakalailaitaki kina na ivakacavacava e dau lavaki. Ke tiko ena nomu vanua na brochure qori, o rawa ni kerea vua na vunivola ni ivavakoso.

Ena so tale na ivakamacala, o rawa ni veitaratara ina Charitable Planning Office, o rawa ni volavola ina itikotiko se qiri ena talevoni e toka qo e ra, se veitaratara yani ina valenivolavola ni iVakadinadina i Jiova ena nomu vanua.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Talevoni: (845) 306-0707

[iYaloyalo ena tabana e 8]