O Bau Kila?

E dina beka nona tukuna o Jisu ni rawa ni yali na tuituina ni masima?

Ena nona iVunau ena Ulunivanua, a tukuna o Jisu vei ratou na nona imuri: “O kemuni na masima kei vuravura; ia ke yali na tuituina ni masima, ena qai vakatuituinataki tale ena cava? Sa sega na kena yaga, me kolotaki ga e tuba me butuki.” (Maciu 5:13) Na masima e dau maroroya vakadede na ka. E rairai vakaibalebaletaka gona na vosa vakatautauvata i Jisu ni rawa se dodonu vei ratou na nona tisaipeli meratou taqomaki ira eso tale me kua ni vakaleqai na nodra bula vakayalo kei na nodra itovo savasava.

Ena ka a vakamacalataka o Jisu me baleta na yali ni tuituina ni masima, e tukuna na International Standard Bible Encyclopedia: ‘Ena yasayasa ni Waitui Mate era wakivata tu kei na masima eso tale na mineral; qori e vakavuna me suasua na masima qai waicala, sa qai vo tu ga eso tale na mineral era wakivata tu.’ Sa rauta me tukuna kina o Jisu ni ka e vo e “sa sega na kena yaga, me kolotaki ga e tuba.” E tomana na ivola qori: ‘Na ka era wakivata tu kei na masima ni Waitui Mate e vakavuna me sega ni tuituina me vaka na masima ena so tale na wasawasa, ia e vakayagataki vakalevu e Palesitaina baleta ni rawa ni tomi ga ena baravi.’

Na cava era na vakasamataka na vakarorogo nira rogoca na vosa vakatautauvata i Jisu me baleta na ilavo drakema a yali?

A cavuta o Jisu na vosa vakatautauvata me baleta na yalewa a taukena e tini na drakema qai vakayalia e dua, mani waqaca na nona cina qai taviraka nona vale me vaqara vinaka me yacova ni sa kunea. (Luke 15:8-10) Ena gauna i Jisu, ena via tautauvata e dua na drakema kei na kena isau e dua na tamata cakacaka ena dua na siga, na kena yali gona e dua na drakema sa dua dina na lusi levu. Ia na ituvaki a vakamacalataka o Jisu e dusia eso tale na ka e dau yaco dina ena noda bula.

E vakamacalataka eso na ivola nira dau vakayagataka vakalevu na ilavo na yalewa me iukuuku. De dua a vakamacalataka tiko o Jisu na ilavo vakamareqeti ena vuvale a vakayagataki tu me iukuuku me dua na gauna balavu se na nona ivotavota o yalewa me na solia vua e vakamautaka. Ia se mani cava na kena dina, na nona vakayalia na yalewa e dua vei ira na tini na drakema, e macala ga ni na saga vakaukaua me kunea.

Na itaratara tale ga ni nodra vale na tauvanua ena gauna i Jisu, e caka me tarova e levu na rarama kei na katakata. Ena vica ga se sega sara ga na kena katubaleka. E dau biu ena fuloa na tolo ni co vuata madu se tolo ni kau mamaca. Ena dredre gona na kena vaqarai na ilavo ke lutu kina. E tukuna e dua na daunivakamacala: “Ni lutu gona e dua na ka lailai ena vanua qori, me vaka na ilavo, e dau vakayagataki na cina tabucagi se me taviraki na lomanivale me rawa ni kune tale kina.”