E “Sega ni Dau Veivakaduiduitaki” o Jiova

O sa bau sotava na veivakaduiduitaki? De a sega ni vakadonui na nomu kerekere, sega ni vakarautaki vei iko e dua na veiqaravi, se o cati ena vuku ni matatamata o cavutu mai kina, roka ni yagomu se nomu itutu vakavanua? Ke vakakina, sega ni o iko duadua ga o sotava na ituvaki qori. Ia qo e dua na itukutuku veivakacegui: Dina ni yaco tu e vuravura na veivakaduiduitaki, ia na Kalou ena sega vakadua ni vakayacora qori vei keda. E vakadeitaka sara ga qori na yapositolo o Pita ena nona tukuna “ni sega ni dau veivakaduiduitaki na Kalou.”​—Wilika Cakacaka 10:​34, 35.

A cavuta na vosa qori o Pita ni tiko ena vale nei Konilio, dua na turaga e sega ni Jiu. E dua na Jiu o Pita, a bula ena gauna era dau okati kina na sega ni Jiu mera sega ni savasava, era sega gona ni dauveimaliwai. Na cava ga e tiko kina ena vale nei Konilio o Pita? Baleta qori na ka e vinakata o Jiova. A raivotu o Pita qai tukuni vua: “Mo kua ni okata me dukadukali na ka sa vakasavasavataka na Kalou.” A sega ni kila o Pita ni a raivotu e liu o Konilio qai dusimaki koya na agilosi me kacivi mai o Pita. (Cakacaka 10:​1-15) Ena gauna a kila kina o Pita ni veidusimaki o Jiova ena ka e yaco qori, a sega ni tusuka me vosa vei Konilio.

A tukuna o Pita: “E matata vakasigalevu vei au ni sega ni dau veivakaduiduitaki na Kalou.” (Cakacaka 10:34) E tukuna e dua na dauvakadidike ni vosa vaKirisi taumada ni “veivakaduiduitaki” e kena ibalebale: “Ni yavutaka nona vakataulewa na turaganilewa ena kena irairai o koya e beitaki, sega ena ka e beitaki kina.” Na Kalou e sega ni vakaduiduitaka na keda irairai, vanua eda cavutu mai kina, itutu vakavanua se so tale na ka eda kilai kina.

Ia o Jiova e dikeva na lomada. (1 Samuela 16:7; Vosa Vakaibalebale 21:2) E tukuna kina o Pita: “E vakadonui ira era dokai koya ra qai cakava na ka e vinakata mai na veivanua kece.” (Cakacaka 10:35) Na noda doka na Kalou e kena ibalebale meda rokova qai nuitaki koya, eda na sega tale ga ni via vakararawataki koya. Na noda cakava na ka e vinakata e okati kina na noda yalorawarawa ni cakava na ka e dodonu ena mata ni Kalou. O Jiova e taleitaki ira era dokai koya ra qai vinakata mera cakava na ka e dodonu.​—Vakarua 10:​12, 13.

Ke o vakaduiduitaki ena dua na gauna, o na lomavakacegu ena ka e tukuna o Pita me baleta na Kalou. O Jiova sa vagolei ira tiko na tamata mai na veimatanitu ina sokalou dina. (Joni 6:44; Cakacaka 17:​26, 27) E rogoca qai sauma na nodra masu na nona tamata era cavutu mai na duidui vanua, duidui matatamata se itutu vakavanua. (1 Tui 8:​41-43) Eda rawa gona ni nuidei ni raici keda mai lomalagi o Jiova nida dua ga na matatamata. Vakacava e uqeti iko qori mo kila e levu tale na ka me baleta na Kalou e sega ni dau veivakaduiduitaki?