Na Cava Eda Vulica Vua na Daubasulawa?

Na daubasulawa e tukuni tiko eke, e taba tiko qo qai vosa tiko vua o Jisu. Sa veivutunitaka na ka a cakava, mani kerei Jisu: “Qai nanumi au ni oni sa tiko ena nomuni matanitu.” E vakaraitaki toka ena itaba qori ni vosa tiko o Jisu vua na daubasulawa. O kila na ka e tukuna tiko vua o Jisu?​—a E yalataka vua: “Au tukuna vakadodonu vei iko nikua, daru na tiko vata mai Parataisi.”

Ena vakacava tu na parataisi?​— Me kilai na kena isau dodonu, daru veivosakitaka mada na Parataisi a bulia na Kalou vei rau na imatai ni tamata o Atama kei Ivi. A tiko e vei na Parataisi? Mai lomalagi se vuravura?​—

Ke o tukuna ni tiko e vuravura, e donu vinaka qori. Nida vakasamataka na “Parataisi” ena bula kina na daubasulawa qori, meda kila tiko ni na bula sara ga ena vuravura qo ena gauna sa na parataisi kina. Ena vakacava na ituvaki ni Parataisi qori?​— Daru raica mada.

Ni sa buli rau na imatai ni veiwatini o Atama kei Ivi na Kalou o Jiova, e kaya na iVolatabu ni biuti rau ena dua na parataisi ena vuravura qo. A vakatokai me ‘were o Iteni.’ O bau vakasamataka na totoka ni ‘were o Iteni’?​— Io, sa bau dua dina na vanua totoka qai rairai vinaka, e sega ni vakatauvatani rawa kei na dua na vanua nikua!

Na cava o nanuma? Erau na bula vata ena vuravura qo o Jisu kei na daubasulawa a veivutuni?​— Sega, ena gauna qori sa na Tui tu mai lomalagi o Jisu me liutaka na vuravura Parataisi. Koya gona, na nona tukuna o Jisu ni rau na tiko vata kei na daubasulawa ena Parataisi, e vakaibalebaletaka tiko ni na vakaturi koya me na bula ena Parataisi e vuravura. Ia na cava a vakadonuya kina o Jisu me bula na daubasulawa ena Parataisi?​— Daru raica mada.

E levu sara na ka ca a cakava na daubasulawa qo. Era cakava tale ga qori e vica vata na bilioni na tamata era a bula ena dua na gauna e liu. E levu vei ira era caka ca nira a sega ni vulica na veika me baleti Jiova kei na ka e vinakata.

O ira qori, wili kina o koya na daubasulawa a lauvako kei Jisu, era na vakaturi ina Parataisi ena vuravura qo. Era na vakavulici ena ka e vinakata na Kalou. Ena qai soli vei ira na gauna mera vakadinadinataka nira lomani Jiova.

O kila na sala era na cakava kina qori?​— Ena nodra cakava na ka e vinakata na Kalou. Sa na dua dina na ka marautaki meda bula ena Parataisi da qai maliwai ira era dauveilomani, era lomani Jiova tale ga!